Loma 7
7
Kifwanyikizho kya masongola
1Kabiji anweba bakwetu mwayuka, mambo mbena kwamba ku bantu bayuka Mizhilo amba, Mizhilo izhijika muntu po akiji mumi. 2Mambo mwanamukazhi wasongolwa wakaswa na muzhilo ku mwata wanji byo akiji mumi, pakuba umvwe mwata wanji wafwa, wakasululwa ku muzhilo wa masongola. 3Kabiji umvwe wasongolwa ku mwanamulume mukwabo, mwata wanji kasa akiji mumi, abyo bakamutela amba nkende. Bino umvwe mwata wanji wafwa, abyo wakasuluka ku muzhilo, nangwa wasongolwa ku mwanamulume mukwabo kechi bakamutela amba nkende ne. 4Byonkabyo anweba bakwetu, ne anweba mwafwile ku Mizhilo monka mu mubiji wa Kilishitu, amba musongolwe ku ungi, yenkawa wasangwilwe mu bafu, amba tumupangile Lesa bipangwa. 5Mambo byo twakijinga mu buntunshi, bya kusakasaka byetu bya bundengamambo byo bebibushishe ku Mizhilo, byaingijilenga mu bya mibiji yetu na kupanga bipangwa bileta lufu. 6Pakuba pano atweba twakasululwa ku Muzhilo, byo twafwile ku kyokya kyo twalaminweko. Onkao mambo pano kechi tubena kwingijila mu Mizhilo ya kala yanembwa ne, kana mu bumi bupya bwa Mupashi.
Mizhilo ne bundengamambo
7 #
Lupu 20:17; Mpitu 5:21 Kabiji pano tusa kwamba amba ka? Nanchi Mizhilo bo bundengamambo nyi? Ine kabiji, akyo ne. Nangwa byonkabyo, pakubula Mizhilo inge kechi nayukile bundengamambo ne. Mambo umvwe Mizhilo yabujile kwamba amba, “Kechi ukumbwe ne,” inge kechi nayukile mwayila kukumbwa ne. 8Bino bundengamambo byo bwamwene mu Mizhilo mwa kwingijila, bwaingijilenga mwi amiwa misango yonse ya kukumbwa. Mambo pakubula Mizhilo bundengamambo bwafwa. 9Ne amiwa kala najinga mumi pakubula Mizhilo; pakuba byo aishile mukambizho, bundengamambo bwasangukile. 10Ne amiwa nafwile kabiji awa mukambizho wa kumwenamo bumi waalukile ke wa lufu kwi amiwa. 11#Nte 3:13Mambo bundengamambo byo bwamwene mwakuubila, bwanjimbaikile na mukambizho, kabiji bwangipaile.
12Byonkabyo Mizhilo yazhila, ne mukambizho naye wazhila, kabiji waoloka ne kuwama. 13Nanchi akya kyawama kyandetejile lufu nyi? Ine kabiji akyo ne! Bwajinga bundengamambo bo bwandetejile lufu ku akya kyawama, pakuba amba bundengamambo busoloke amba bo bundengamambo. Kabiji amba mu mikambizho bundengamambo bumwekeshetu byo bwatamisha.
Kulwang'ana kuji mwi atweba
14Mambo twayuka namba, Mizhilo yoya bumupashi; pakuba amiwa nakikaswa ku bya buntunshi, napotwa ne kunonkwa ku bundengamambo. 15#Nga 5:17Pakuba akya kyonguba kechi nekiyuka ne, mambo kechi mbena kuuba akya kyonsaka ne, bino akya kyo nashikwa kyokyo nguba. 16Pakuba umvwe nguba byo nabula kusaka, nanchi naitaba namba Muzhilo ye wawama. 17Byonkabyo nanchi pano kechi ye amiwa mwine nekyuba ne, poso bundengamambo bwaikala mwi amiwa. 18Mambo nayuka namba mwi amiwa, kokuuba amba, mu buntunshi bwami, kechi mwaikala nangwa kimo kyawama ne, mambo muchima wa kwikyuba njinanji, bino nkankalwa mwa kwikyubila akya kyawama. 19Mambo akya kyawama kyonsaka kuuba kechi nekyuba ne, kabiji akya kyatama kyombula kusaka kuuba, kyokyo nguba. 20Pano umvwe akya kyombula kusaka, ikyo kyonguba, nanchi pano kechi amiwa nekyuba ne, poso bundengamambo bwaikala mwi amiwa.
21Byonkabyo namona muzhilo wakuuba amba, byo nsaka kuuba kyawama bubi bwankosela. 22Mambo nasekela mu Mizhilo ya Lesa mu muntu mwine wa mukachi. 23Bino namona mu bya mubiji wami muzhilo mukwabo ungi ubena kulwa na muzhilo wa mu muchima wami ne kuntwala mu buzha bwa muzhilo wa bundengamambo waikala mu bya mubiji wami. 24Mama ami kalanda! Ne muntu wa malwa! Ing'anyi ukampokolola ku uno mubiji wa lufu? 25Sante ekale kwi Lesa monka mwi Yesu Kilishitu Nkambo yetu!
Byonkabyo kabiji amiwa mwine ng'ingijila Mizhilo ya Lesa na muchima wami, pakuba na buntunshi bwami ng'ingijila muzhilo wa bundengamambo.
Currently Selected:
Loma 7: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
