NEHEI LEUSI 29
29
Nisinati mem gima ita Harun kin nipmot bat nya nok imam
(Im. 8:1-36)
1Lene Allah pai bak Musa “Gini ne nisinati mem gima ata Harun kin nipmot bat nya nok imam di igya hacan mem Da ri. Aug jem sapi nikre di nehen pap ningut gom kin domba nikre di bon bok-ba bi ningut can kwei. 2Ayai tepun di kei-kau di roti ninjep srigsi bi kin mini zaitun ba, abikang roti nindak poi. Lene abikang gi hi di mini zaitun joti bi nindak hi kin bu. Lene akang tepun niken nok roti di nyop leu api aba mini zaitun bidip. 3Akes mun dima yok hagom ei bansiti leu api ayai biDa tirigi abui sapi nikre kin domba nikre cin ba, andig hagom ei nimbar hum dokti.
4Lene abuwak Harun kin nipmot bat nya kwei bigya kui dimbou hui ei Ditde Prak Meng nuhui. Lene ibon midut nikek minyeiti ei sirima. 5Lene ajuk sinsun imam pima ei Harunti. Nok sinsun nda kin sinsun efod kin sinsun ndok di jei di jo ser sinsun efod kin sinsun minai kin ninghas linen di bikri kep nintig bou hagom. 6Lene akes topi ei nibouti bittin leu api angot penen mas tut ninyeng ‘tuhan Dimig Imam Dini Ei Mem Nonti’ pima kin topi bei noho. 7Lene ayai mini nibon midut ba, asiber ei Harun nibou nggram him.
8Lene acuk nipmot bat nya cem bipia ijuk sinsun nda ei yokti bu. 9Lene ikri kep intig bou leu api ittin ide topi. Ma ata Harun kin nipmot bat nya tug hon nisinati dima. Suar yoni kin ide nintun him yamti di bram yam nya igyai midyai nok imam bijo ninno bijo kikau.
10Lene ajem sapi nikre pima kwei biya kui Ditde Prak Meng noho. Lene Harun kin nipmot bat nya ikes inda ei sapi nibou dip. 11Lene abui sapi dima ei Doho bei hammi dimbou hui ei Prak Meng nuhui. 12Lene ahek sapi ninggrom poi mien leu api atur anda pijum eisi ba, abidip nimbar hum dok ninggai nya. Leu api asiber ninggrom dima niken ei nikiou. 13Lene akus nimmau hagom leu sapi ninghopti kin nisingau igdo hi di kei bibor kin nikimbu hacem bitut nimmau di joti nya leu api andig hagom kep hum ei nimbar hum dokti nok mun di abikwas tut Da. 14Noro andig ninghui kin ningkek kin ninak hagom kep hum ei ngug sai leu jide prak meng yati dima. Gini ne mun di jikwas tut Da leu binhyepo dibikos ser imam nya ide sisar ri.
15Lene ajem domba nikre ningut gom kwei leu api acuk Harun kin nipmot bat nya bipia ikes inda ei domba nibou dip. 16Lene abui domba dima ba, ahek ninggrom leu api abiprok nimbar hum dok nitta bitaisi. 17Lene asrat domba ningut kukiau ba, aba minyei piap bei ninghopti kin nindimuhum hacem leu api adimig ningut hagom kok yam lo, ninghop kin nindimuhum mijo nai nibou dip. 18#Ef. 5:2; Flp. 4:18 Lene andig domba dima titut kep hum ei nimbar hum dokti nok nibon midut nindig mindhe titut kep humti. Lene midijoi sut ninghap di ngge kei dima.
19Lene ajem domba nikre ningut gom kin bu di jibet ei mem nibon midut nita imamti pima kwei leu api acuk Harun kin nipmot bat nya bipia ikes inda ei domba dima cem nibou dip. 20Lene abui domba dima ba, ahek ninggrom poi mien lene abingget Harun kin nipmot bat nya itingou meng kin indapmem kin imig ndapmem hagom ndam inda com. Lene ayai ninggrom niken leu api asiber ei nimbar hum dok nitta bitaisi. 21Lene ayai ninggrom di jo ei nimbar hum dokti poi mien kin mini nibon midut poi mien leu api abiprok Harun kin nipmot bat nya bitut ide sinsun cem. Ma adimig Harun kin nipmot bat nya bitut ide sinsun hagom ei mem Da tug hon nisinati dima.
22Lene akus domba nikre nimmau leu domba ningut bitut nimmau leu nipu kin ninghopti kin nisingau igdo hi di kei bibor kin nikimbu hacem bitut nimmau di joti nya kin nindimuhum di ndam ninda com hagom. 23Lene ayai roti po akang kin mini zaitun kin gi hi di mini zaitun joti bi kin roti nyop di akang po aba mini zaitun bidip pima hagom leu bansi po akwas tut Da pima. 24Lene akes mun dini yok hagom bijo ei Harun kin nipmot bat nya indati leu binhyepo ikon bijo nai ei Doho bei nok mun di bon ninyeng mem Da. 25Lene ayai mun dima yok hagom hanyen leu yok leu api akes bijo ei mindhe ningut po andig kep hum pima dip lene andig hagom kep hum ei nimbar hum dokti. Lene midijoi sut ninghap di ngge kei dima.
26Lene ayai domba nikre pima ningget leu api adimig ei nok mun di bon ninyeng mem Da. Leu api abet mikwau dima ei mem jenti jiyem kep.
27Bikwop mpe dino jibon midut nita imam nijepti lene jidimig domba nikre di jibui mem nita imam nijepti dima ningget kin nindimuhum nok mun di bon ninyeng ei mem Da. Lene jibet mikwau dima ei mem jenti bijiyem kep. 28Gini ne mun di dikos tut rin ba, bit bon hi srep tut kan bi. Tirigi Ditde limwa nya ikwei kwas mindhe tut Da mem nibon midut nibiyai ningon kwes kin Allahti lene imam nya ibet ningget kin nindimuhum ei mem yonti igyem kep. 29Mpe dino Harun mai su lene nipmot bat nya iba yokep nide sinsun imam pima leu binhyepo ijuk ei yokti tirigi ata yok nok imam nijep bu. 30Suar Harun nipmot gom di ya luei nohoti coi ug ei Ditde Prak Meng nsi leu binhyepo yai midyai nok imam ei Ditde Ninsi Di Kwes-Kwau cem juk sinsun imam pima kikau mem mmun-njap muhwindacan cem.
31Lene ayai mikwau leu domba nikre po abui mem nibon midut nita Harun kin nipmot bat nyati pima leu api akwen ei yengti ei mpia di kwes-kwau. 32Yoni igyem kep mikwau dima kin roti niken di jo ei bansiti tirigi igya kui dimbou hui ei Ditde Prak Meng nuhui. 33Igyem mun di indig kep hum ei nimbar hum dokti mem nibon midut nibiyai nikos ser sisarti pima tirigi ata Harun nok imam. Apigig ser mun di indig kep hum nok gima ei ba, imam nya yongkom igyem kep. 34Gino mikwau kin roti dini niken jo mem njap di hyep bu lene andig hagom kep hum. Ma igyem kep au lewo apigig ser mikwau dima ei su.
35Nibon midut nita Harun kin nipmot bat nyati dima mimbut mem mmun-njap muhwindacan bit leu nok dicuk nati tu. 36Abui sapi nikre ningut gom ba, andig kep hum ei nimbar hum dokti bikwop njap kikau mem njap muhwindacan leu binhyepo dibikos ser ide sisar. Nibon midut dima mibindei ba, nimbar hum dok kwes-kwau ri. Lene attin ampou tut mini zaitun ei nimbar hum dokti leu binhyepo abipigig sut ei mem Da. 37Abon midut dima bikwop njap kikau mem mmun-njap muhwindacan leu binhyepo bindei ba, nimbar hum dok kwes-kwau kei. Mun mindei rino ngget nimbar hum dok dima rinok mun di ikwas tut Da di tuhan. Tungwa tou rino ngget nimbar hum dok dima mitug midut drek dip lewo nimbar hum dok nikwes-kwausi sindem bibor.”#29:37: Nipas kep mitug midut drek dip lewo nimbar nikwes-kwausi sindem bibor: Ei nijam dima lene tungwatu ingon jo kep bipia gino limwa nya kin ndigban cem ngget mun di bon nikwes-kwausi di sindem bibor lene mitug midut drek dip.
Nibon midut bikwop njap-njap
(Bil. 28:1-8)
38“Lene imam nya ibui domba nehen pap di ide njap ug ei ari bingwam gom ningut can ba, indig kep hum ei nimbar hum dokti bikwop njap ngwa hagom. Lene nok gima bijo ninno bijo kikau. 39Ibui domba ningut gom ba, indig kep hum mem njap bigyokti lene ibui bihi mem mmunti. 40Tirigi indig domba ningut kep hum mem njap bigyokti lene ikwas ide tepun di kei-kau kilo gom kin mini zaitun di kei-kau cem liter gom srigsi. Lene ikwas ba anggur ngei liter gom tut Da. 41Nok gima cem tut domba di indig kep hum mem mmunti bitut tepun kin mini zaitun kin ba anggur ngei cem. Gini ne mun di ikwas tut Da tug hon hum rin ba, midijoi sut ninghap di ngge kei dima. 42Ibui domba dima ba, indig kep hum ei nimbar hum dokti ei Doho bei hammi dimbou hui ei Ditde Prak Meng nuhui bijo ninno bijo kikau. Midiya um Ditde limwa nya ei mpia dima ba, midimbrap bit na ei sirima. 43Midiya um Ditde limwa di mben Israel ei sirima ba, Ditde nikei-kau-keisi mibindei ba, mpia dima kwes-kwau kei. 44Midibindei ba, Prak Meng kin nimbar hum dok kwes-kwau kei leu api mididimig Harun kin nipmot bat nya bijo ter leu nindigsi nya leu binhyepo igyai kep midyai nok imam mem Da. 45Midikwei bong bit mben Israel leu binhyepo ikuk yok biDa leu api midinok ide Allah. 46Mijo nibreisi mem yok bipia Dani ne tuhan Allah ba, dibuwak yok kwei leu minu Mesir leu binhyepo dibong bit yok ri. Dani ne ide tuhan Allah ri.”
Currently Selected:
NEHEI LEUSI 29: HAD
Highlight
Copy
Compare
Share
Want to have your highlights saved across all your devices? Sign up or sign in
