NEHEI LEUSI 30
30
Nimbar hum dok mem biei nggrai
(Kel. 37:25-28)
1Mpe dima lene tuhan pai bu bak Musa “Ma aba biei meng dia bibon nimbar hum dok mem gima andig biei nggrai di ui-gwang kei nipriot eisi. 2Abon nijeisi kin ninyanti noyam ba, hacem senti ningot bitai ba, muhwi. Lene nanaisi senti ningot muhwindatai. Abon ninggai di rap nuhuisi bitaisi bingkiem. 3Aba mas binggai kep nidip kin nitta bitaisi kin ninggai nya lene aba mas hi kin bu bimau ninghas him nya cem. 4Aba mas bibon srak can bicim ninghas him nibehei ei nite hi nite hi bu leu binhyepo acim ug ningat can eisi mem abikon nimbar hum dok dima. 5Aba biei meng dia bibon ug ningat can dima lene aba mas binggai hacem. 6Lene akon ba, akes nimbar hum dok dini ei ban mbrawin po jo hammi Brua Gi Preu nuhui pima bei nisai. 7Tirigi Harun coi ug ei Prak Meng nsi bikwop njap mem gima nyohou mini njeng nya lene ma noni ndig biei nggrai di ui-gwang kei ei nimbar hum dok dimati. 8Suar noni yai igbit niyai kepti dima mem mmunti cem tirigi noni kwei tin mini njeng bu. Suar imam nya indig kep biei nggrai di ui-gwang kei nipriot bijo ninno bijo kikau. 9Ma akwas biei nggrai di ui-gwang kei di dicuon ser yok tut kin mindhe nibon midut ningut kin njita nibon midut ei nimbar hum dok diniti au. Lene ma asiber ba anggur ngei di akwas tut Da eisi au. 10Ma Harun bon midut di bindei di nimbar hum dok dini kwes-kwau tug hon nisinati dini. Noni ba mindhe po indig kep hum mem nibon midut nibiyai nikos ser sisarti pima ninggrom biprok nimbar ninggai bitai mbigom mem ari bingwam gom mbigom mem ari bingwam gom lene nok bijo ninno bijo kikau. Apiga nimbar dini ba, kwes-kwau kei mem Da di Allah.”
Belasten mem tuhan De Prak Meng
11Lene tuhan pai bak Musa, 12“Tirigi akwop mben Israel yahagom imangti lene ma tungwagom-gom go mitiei gau nonti bak Dani ser nhyepo mun di kinei micut igkep noni mem nijam di akwop yahagom imangti dima bi. 13#Kel. 38:25-26; Mat. 17:24 Ma bikwop tungwagom-gom di ninyeng tibim kin daptar imangti dima go gau nonti bit leu nok mitiei nibuhunti di dem mem Ditde Prak Meng ba, kwas hagom tut Da mikuisi. 14Ma pinai nya di ide njap ug ei ari bingwam ningot can nima kui di inyeng tibim kin daptar dima yahagom ikwas mitiei dima tut Da mikuisi. 15Tirigi igo gau yonti lene ma no di nyeng bibor go mitiei nindig bibor ba, no di nuhui mbum migo mitiei nimien bibor au. 16Imam nya imbus mben Israel ide mitiei dini hagom keyam mem gima ibikinding Ditde Prak Meng. Mitiei dima nimangti nok mun di ibigo gau yonti ri. Lene midinyohou yok kikau ba, midingon prion ser yok bi sren.”
Bokor di iba ngkimom-tembaga bibon
17Lene tuhan pai bak Musa, 18#Kel. 38:8 “Ma aba ngkimom-tembaga bibon bokor gom bitut nidihim cem. Lene atas bokor dima ei Prak Meng kin nimbar hum dok ikieti ba, atau minyei eisi.
19Lene Harun kin nipmot bat nya ipiap imig kin inda eisi, 20nipou tirigi icoi ug ei Prak Meng nsi ba, idideu nimbar hum dok bibon midut nindig mindhe titut kep humti cem bigyo. Gino igyai bit leu nok dicuk nati dini lene midikes hukum nimai ei yok dip bi. 21Suar ipiap imig kin inda ser nhyepo imai bi. Suar yoni kin ide nintun him yamti di bram yam nya ibit dicuk nati dini bijo ninno bijo kikau.”
Mini mem nibon midut nya
22 #
Kel. 37:29
Lene tuhan pai bak Musa, 23“Ma ayai mun di ui-gwang kei di kei-kau nok mur ngei kilo muhwindagom kin biei ningkek di nyop kilo ningai kin nghai di ui-gwang kei kilo ningai kin biei teja kilo muhwindagom. 24Lene akwop nibuhunti noyam kin nibuhunti di ace tut mem Ditde Prak Meng. Lene ayai mini zaitun liter bitai. 25Lene abiwir mini mem nibon midut ba, noyam kin mini ibou. 26Lene attin ampou tut mini dini ba, akiber ei Ditde Prak Meng kin Brua Gi Preu, 27kin meja tut nimbumbati nya kin mini njeng nidihim tut nimbumbati nya kin nimbar hum dok mem biei nggrai, 28kin nimbar hum dok mem nibon midut nindig mindhe titut kep humti tut nimbumbati nya kin bokor minyei tut nijou di jo dip nya hagom. 29Adimig mun dini yok hagom ei tug hon nisinati dini apino mun mindei rino ngget mun di adimig ei dima rinok mun di akwas tut Da di Allah. Tungwa tou rino ngget mun di adimig ei dima mitug midut drek dip lewo mun di adimig ei dima nikwes-kwausi sindem bibor.#30:29: Nipas kep mitug midut drek dip lewo nimbar nikwes-kwausi sindem bibor: Angig ayai kep Kel. 29:37. 30Lene attin ampou tut mini ba, akiber ei Harun kin nipmot bat nya ibou nggram him ba, ata yok nok imam di igyai kep midyai mem Da. 31Lene atri tut bak mben Israel bipia apigig sut mini nibon midut dima ei mem Da di Allah bijo ninno bijo kikau. 32Ma imam nya ittin ampou tut mini dini ba, ikiber ei ide limwa nya ibou nggram him au. Ma iba mini di nok gini ba, ibiwir mun di ui-gwang kei noyam kin mini nibon midut dini srig yamti mem yonti cem au. Lewo mini dini kwes-kwau. Suar jibibon mini dini nok mun di kwes-kwau. 33Tungwa tou rino bibon mini di noyam kin mini dini ba, ttin ampou tut bikiber ei no di imam bi nibou nggram him lene no dima minok Ditde limwa bu bi sren.”
Biei nggrai mem nimbar hum dok
34Lene tuhan pai bak Musa “Ma ayai biei nggrai di ui-gwang kei kin lokan kin rasamala kin kemenyan ba, nimangti hagom noyam. 35Lene aba biei nggrai di ui-gwang kei dini bibon mun di ui-gwang kei di ninghap noyam kin mini ibou. Lene aba nsim srigsi leu binhyepo pimbai kei ba, kwes-kwau cem. 36Ayai biei nggrai di ui-gwang kei dini ndrim hi ba, aho bindung. Lene apwoi gima ug ei Ditde Prak Meng leu api abigimahap Brua Gi Preu nuhuia. Ma apigig sut biei nggrai di ui-gwang kei dini ei nok mun di kwes-kwau mem Da. 37Ma tungwatu iwir biei nggrai di ui-gwang kei nok gini srig yamti noyam kin biei nggrai di ui-gwang kei dini mem yonti au. 38Tungwa tou rino bibon biei nggrai di ui-gwang kei di noyam kin biei nggrai di ui-gwang kei dini mem nonti nok mini ibou lene no dima minok Ditde limwa bu bi sren.”
Currently Selected:
NEHEI LEUSI 30: HAD
Highlight
Copy
Compare
Share
Want to have your highlights saved across all your devices? Sign up or sign in
