NEHEI LEUSI 28
28
Sinsun nibon midut mem imam nya
(Kel. 39:1-7)
1Lene Allah pai bak Musa “Ma ahig akindig Harun kin nipmot bat Nadab kin Abihu kin Eleazar kin Itamar nya kwei. Lene adimig yok bijo ter leu binhyepo igyai kep midyai nok imam mem Da. 2Ma anap sinsun imam mem Harun bijuk leu binhyepo bindei ba, ninyeng jei bou tungwatu igyai him. 3Ma anduk yo di inap sinsun kan nya yahagom di diyai nisindemti dima biyok kwei. Acuk yok bipia inap sinsun imam bak Harun leu api adimig noni bijo ter leu binhyepo yai midyai nok imam mem Da. 4Ma acuk yok bipia inap sinsun minai kin sinsun efod kin sinsun ndok di jei kin sinsun ninda kin topi kin mun di bikri kep nintig bou hagom mem akindig Harun kin nipmot bat nya leu binhyepo igyai midyai nok imam mem Da. 5Ma yo di inap sinsun kan nya iba minyahas wol di nimmun kin nghei nta kin gi ningwoi kin mong mas kin linen di dia-diau kei binap sinsun dima yok hagom. 6Lene iba minyahas wol di nimmun kin nghei nta kin gi ningwoi kin mong mas kin linen di dia-diau kei binap sinsun efod ningat gom ba, 7ibien nimmam can eisi ba, hi ei nite hi lene hi ei nite hi bu leu binhyepo bisrou ninghat dip. 8Lene iba mong ninyeng hagom pima cem bibien mun di bikri kep nintig bou ba, inap kin sinsun efod nok sinsun ningat gom di ibien bikei-kau. 9Ma igyai tig delima ninjep can ba, ikilis Yakub nipmot bat nya ibou simnaibrimigcan inyeng eisi, 10bit leu nok ide njap. Ikilis inyeng muhwindagom ei tig njep gomti lene ikilis inyeng muhwindagom bu ei tig njep gomti bu. 11Ma no di ningon ki tut tig permata kilis Yakub nipmot bat nya inyeng ei tig njep can pima dip leu api kes tig hacem binap bunggan nimpung di noni ba mas bibon. 12Lene noni kes tig permata cin dima ei mas kibiti leu api kon mas kibi dima tut bikes ei sinsun efod nimmam nibijuk ninghatti. Tug hon nisinati dima lene Harun mikon inyeng ei ninghat dip leu binhyepo Da di Allah midiyok ngon kep Ditde limwa nya bikwop mmun-njap. 13Tirigi no dima ba mas bibon bunggan nimpung can dima, 14lene ma noni ba mas bibon lante can dem kep nok kuk mbrei ba, ibien kin yam leu api pek kin mas ninghas pima.”
Sinsun minai mem imam ningget
(Kel. 39:8-21)
15“Lene anap sinsun minai mem Imam Nibou Ndig ningget leu binhyepo noni ba sinsun minai dima bikan tut Da di Allah dingon kanti. Aba minyahas kin mun di ibien ei sinsun efod pimati binap kin sinsun minai dini cem. 16Ma akrop minyahas mem sinsun minai dini kin yam mbigom leu binhyepo nijeisi kin ninyanti hacem senti ningot can ba, can. 17Lene anap tig permata nipuig bitai kin nibiho. Ma anap tig delima kin topas kin baiduri sepah ei nipuig gi nigomti. 18Lene anap tig zamrud kin nilam kin intan ei nipuig gi nicanti. 19Lene anap tig lazuardi kin tig akik kin tig kecubung ei nipuig gi niningaiti. 20Lene anap tig pirus kin yakut kin ratna cempaka ei nipuig gi nibitaiti. Ma anap tig permata dini yok hagom kin bunggan nimpung di iba mas bibon. 21Lene akilis bibikwop Yakub nipmot bat nya inyeng hagom ei tig permata pima dip ba, gom ei tig gom lene gom ei tig gom lene nok leu binhyepo abiyok ngon kep mben Israel ide keret nya. 22Lene aba mas bibon lante can dem kep nok kuk mbrei di abien kin yam mem sinsun minai dini cem. 23Lene aba mas bibon srak can ba, abicim kin sinsun minai nuhuisi di nai. 24Lene anap lante mas can pima kin srak can dini. 25Lene anap lante mas can pima niyenti kin tig delima pima nide bunggan nimpung leu binhyepo sinsun minai kin sinsun efod nimmam nya u yam nok gi kei bijo-jo yam dip. 26Lene aba mas bibon srak can leu api anap hacem kin sinsun minai nuhuisi ndam nibehei hammi ninghas him simiak sinsun efod pima. 27Lene aba mas bibon srak can kin bu leu api anap hacem hammi sinsun efod nimmam niyenti ei nibiho ndam ninghas him leu binhyepo mun di imam bikri kep nintig bou pima jo bijehei bu. 28Lene aba kuk nimmun bikim srak di ndun sinsun minai him kin srak di ndun sinsun efod him kin yam leu binhyepo sinsun minai jo nai mun di imam bikri kep nintig bou ba, kwat bi.
29Tirigi Harun coi ug ei Gumihyep Di Kwes lene noni juk sinsun minai di apas mben Israel ide keret inyeng eisi pima leu binhyepo Da di tuhan midiyok ngon kep Ditde limwa nya bikwop mmun-njap. 30#Bil. 27:21; Ezr. 2:63; Neh. 7:65 Lene akes Urim kin Tumim#28:30: Nipas kep Urim kin Tumim: Angig ayai kep Kamus. bijo nyahan ei sinsun minai ninggreti leu binhyepo Harun mipwoi tirigi noni kwei ya ei Doho bei. Suar noni juk sinsun minai bikwop mpe di noni kwei ya ei Doho bei leu binhyepo noni mikan tut dingon kanti mem mben Israel.”
Sinsun nibon midut nindigsi nya
(Kel. 39:22-31)
31“Aba minyahas wol di nimmun binap sinsun ndok di jei mem imam bijuk ei noniti ba, jo ser sinsun efod. 32Abien sinsun dima ninghas him ndam nikimam bingkiem bibor ser nhyepo nonti rik bi. 33Aba mong wol di nimmun kin nghei nta kin gi ningwoi cem mong linen di dia-diau kei cem bibien mun di nok biei delima ningat lene aba mas bibon brem-brem mien nya bipindur mun dini yok hagom bindun sinsun ndok di jei dima ninghas him ndam dihyeisi. 34Anap brem-brem mas ningat gom lene anap biei delima ningat gom sindam bindun sinsun ndok di jei dima ninghas him ndam dihyeisi. 35Suar Harun juk sinsun ndok di jei dini tirigi noni yai kep midyai nok imam. Tirigi noni kwei ya ei Doho bei ei Ditde Ninsi Di Kwes-Kwau leu api hei hanyen leu ninsi dima lene midimiap brem-brem di nggileng-nggileng nyen apino midikes hukum nimai ei noni dip bi.
36Lene aba mas bibon penen gom leu api akilis kata tuhan Dimig Imam Dini Ei Mem Nonti eisi. 37Lene aba kuk nimmun bingot penen dima kin imam de topi. 38Suar Harun ba penen dima bikri ningwak leu binhyepo Da di tuhan midijoi sut mun di mben Israel ikwas tut Da hagom bitut mun di ikwas tut Da ugwai-gwai bisinggre bi.
39Aba linen di dia-diau kei binap sinsun nda bak Harun. Lene aba linen di dia-diau kei bu binap topi mem noni. Lene abien ninghas linen gom di noni bikri kep nintig boua.
40Lene anap sinsun nda kin ninghas linen di ibikri kep intig bou kin topi mem Harun nipmot bat nya leu binhyepo bindei ba, inyeng jei ei tungwatu igyai him. 41Ajuk sinsun dini yok hagom ei akindig Harun kin nipmot bat nyati. Lene ata yok ba, adimig yok ei cem tug hon gima anden ampou tut mini zaitun ei yok dip leu binhyepo igyai midyai mem Da nok imam nya. 42Lene aba linen binap sinsun bopen mem yok leu binhyepo ijuk ser immai joti. 43Suar Harun kin nide nintun him yamti di bram yam nya ijuk sinsun bopen dini mpe dino icoi ug ei Ditde Prak Meng nsi kin mpe dino igya kui nimbar hum dok bigyai kep midyai nok imam di micoi ug ei Ditde Ninsi Di Kwes-Kwau cem. Nok ser nhyepo itug ndei nimai drek dip immai joti di jo brei ei tungwatu igyai him bi.”
Currently Selected:
NEHEI LEUSI 28: HAD
Highlight
Copy
Compare
Share
Want to have your highlights saved across all your devices? Sign up or sign in
