YOHANES GI NIGOM 4
4
Ningginausi tut Ninnei Di Nijit kin ninnei di bindei srawir
1Disut bat di dingon kieti jen! Ma jingon bit yo di ipai sut yonti bipia igyai Allah Ninnei ei ingonti yahagom au. Noro ma jibinai ighyet leu binhyepo jingon dorti tut ninnei dima nikwei leusi. Lewo nabi nitrowai nya imang bibor imbut-mbut nyen bidem dihyeisi dini nisurti-nipekti hagom. 2Gino hi pai jit bipia Yesus Kristus srek kwei ei dihyeisi dini nok tungwatu lene no dima yai Ninnei di kwei leu Allah. Jingon midorti tut bipia no dima yai Allah Ninnei ei ningonti tu. 3Noro no di tte tut Yesus nisrek kwei ei dihyeisi dini nok tungwatuti yai Ninnei di kwei leu Allah bi. Noni yai ninnei di kwei leu No Di Ba Nitok Bak Kristus. Jimiap tut ninnei dima ninghapti tu bipia mikwei rin lo, ammani ne no rinaha ei dihyeisi dini.
4Noro dimunggwom bat jen, Allah ninyeng tak kep je ba, jibindei cut nabi nitrowai nya tug hon Allah Ninnei di jiyai ei jingonti tu. Ninnei dima sindem bibor dor njiriek ninnei di tungwatu dihyeisi dini igyai ei ingonti. 5Nabi nitrowai nya ipui kep mun di pror yon ei dihyeisi dini leu api tungwatu dihyeisi dini ingon bram ighyet lewo dihyeisi dini ninyeng tak kep yok. 6Noro Allah ninyeng tak kep nyeni. No di ningon dorti tut Allah bit nyeni ighyet. No di Allah ninyeng tak kep bi bit nyeni ighyet bi. Tug hon nisinati di ibingat Ninnei di nijit kin ninnei di bindei ba, tungwatu nya israwir niter leu yamti.
Allah ne nibousi mem ningon ngakei yamti ri
7Disut bat di dingon kieti jen! Jikwei ba, yahagom ingon ngakei yam lewo Allah ne nibousi mem ningon ngakei yamti ri. No di ningon ngakei Allah kin tungwatu nya ne Allah nimunggwom rin ba, ningon dorti tut Noni. 8No di ningon ngakei Allah kin tungwatu nya bi ningon dorti tut Allah bi lewo Allah ne nibousi mem ningon ngakei yamti ri. 9Allah ndo ningon ngakei nyeti brei binye tirigi pinak Nipmot di nimig gom ngat kwei ei dihyeisi dini leu binhyepo igyai niyaijo nijep tug hon Noni. 10Ningon ngakeisi rinok gini. Ingon ngakei Allah bibie bi. Noro Noni ningon ngakei nye bibie leu api pinak Nipmot kwei ei dihyeisi dini leu binhyepo igyai nikos ser ide sisarti tug hon Noni.
11Disut bat di dingon kieti jen, gino Allah ningon ngakei nye nok gima lene ma nyeni cem ingon ngakei yam. 12#Yoh. 1:18 Hi ngat Allah bou niyai him bi sren lo, gino ingon ngakei yam ne Allah niyaijo nok gom kin nye ba, ingon ngakei tungwatu nya mungkun tu.
13Noni kes Nonti Ninnei ei ingonti tu. Gima rino ingon dorti tut bipia igyaijo nok gom kin Noni ba, Noni niyaijo nok gom kin nye. 14Ningat Nipmot bou niyai him tu. Gima rino nitri tut bipia Icig Allah pinak Nipmot kwei ei dihyeisi dini nok Nibou Ndig di teu tungwatu nya leu sisar biyai niyaijo nijep biyok. 15No di pai jit bipia Yesus ne Allah Nipmot rin lene Allah niyaijo nok gom kin noni ba, noni cem niyaijo nok gom kin Allah. 16Nyenti ingon dorti tut ba, iba ingon com bipia Allah ningon ngakei nye.
Allah ne nibousi mem ningon ngakei yamti ri. Gino ningon ngakeisi tak kep tungwa hi lene no dima niyaijo nok gom kin Allah ba, Allah niyaijo nok gom kin noni. 17Ingon ngakei yam mungkun tu lewo Kristus kin nyeni igyaijoti noyam tirigi ingat rin ei dihyeisi dini lene gima bindei ba, mibrim ingkek mem Njap di Allah mbus tungwatu nya ingonti. 18No di yai ningon ngakei yamti leu Allah ningon digit bi. Lewo ningon ngakei yamti di kwei leu Allah bindei pror ningon digitti hagom bingwig. Gino hi ningon digit tut Njap dino Allah migwam nok Nikei mem tungwatu nya ne no dima yai ningon ngakei yamti ei ningonti bi.
19Ingon ngakei yam lewo Allah ningon ngakei nye bibie. 20Gino hi pai bipia ningon ngakei Allah noro ba nitok bak nisut no di Kresten hi lene no dima nok no di ris ri. Gino ningon ngakei nisut no di Kresten di noni ngat bou niyai him bi lene bit bon ningon ngakei Allah di noni ngat bou niyai him bigyo cem bi. 21Tut gima lene Kristus nicuk nyeti pai bipia suar no di ningon ngakei Allah ningon ngakei nisut no di Kresten cem.
Currently Selected:
YOHANES GI NIGOM 4: HAD
Highlight
Copy
Compare
Share
Want to have your highlights saved across all your devices? Sign up or sign in
