YOHANES GI NIGOM 3
3
Allah nimunggwom bat nya
1 #
Yoh. 1:12
Ma jiba jingon srip bram bipia Icig Allah ningon ngakei nye nindig bibor bijem nye nok nimunggwom bat nya. Gima rino ningat ne nimunggwom bat nya rinyeni! Gima rino tungwatu dihyeisi di kinei dini ingon dorti tut nye bi lewo ingon dorti tut Allah bi. 2Disut bat di dingon kieti jen, nyeni ne Allah nimunggwom bat nya ri. Noro tut gima iluei itta ei nidipti bu lene jo nibreisi mem nye bigyo. Noro ingon dorti tut bipia tirigi Kristus ttau hanyen kwei ne iluei itta dem kep nok Noni nitta tirigi ingat ningat brei bou igyai him. 3Bikwop yo di igyok ingon mem nijam di iluei itta noyam kin Kristus niluei nittati yahagom inyohou ingonti bikwes-kwau bit leu nok Kristus ningon kwes-kwau.
4Bikwop no di bon sisar pigau Allah de hanjop tu. Lewo sisar kin nipigau hanjopti hacem noyam. 5#Yoh. 1:29 Jingon dorti tut bipia Kristus kwei ei dihyeisi dini leu binhyepo ciu ser tungwatu nya ide sisar di ibon nya lo, sisar ninyeng hi jo ei Noniti bi sren. 6Gima rino yo di igyaijo nok gom kin Kristus yahagom ibon sisar ninyen bi. Noro yo di ibon sisar ninyen ikan huk Kristus ba, ingon dorti tut Noni bi sren.
7Dimunggwom bat jen, ma jisindui sut ba, hi bindei srawir je au. No di yai kikep Allah ningon kanti mem noni ningon sren bit leu nok Kristus cem ningon sren. 8No di bon sisar ninyen jem niceu bit Bilis lewo Bilis bon sisar ninyen habiei leu nimbie him kikau kwei bipek ammani kep. Gima rino Allah Nipmot kwei ei dihyeisi dini leu binhyepo nggek tut Bilis de midyai nya.
9No di ntun Allah him binok nimunggwom bon sisar ninyen bi. Lewo Allah sindem tut no dima ningonti leu api bit bon noni bon sisar ninyen kan bi lewo Nicig ne Allah ri. 10Allah nimunggwom bat nya kin Bilis nimunggwom bat nya ibon munti niter leu yamti di jo nibreisi. No di yai igbit Allah ningon kanti bi ba, ningon ngakei nisut cem bi ne Allah nimunggwom rin bi.
Ningginausi tut ningon ngakei yamti
11 #
Yoh. 13:34
Nihyet di jimiap habiei ei nimbie him tirigi sindi jingon jo kep Kristus pai bipia suar ingon ngakei yam. 12#Kej. 4:8 Ma igyai bram Kain niyaisi au. Noni jem niceu bit Bilis bikimukep nikinjoi. Nggon rino Kain kimukep noni i? Lewo Kain yai mun tunggwei noro nikinjoi yai mun igbit.
13Gima rino disut bat jen, ma jinga leu sut tungwatu dihyeisi dini di ingon mpo tut je au. 14#Yoh. 5:24 Nyeni ikan tut bipia imai ei ide sisarti bu bi noro icoi ug ei niyaijo nijepti tu. Ingon dorti tut gini lewo ide ningon ngakei yamti ndo bindo binye tu. Nimai sindem tut no di ningon ngakei nisut bi. 15No di ningon mpo tut nisut ne gima dem kep nok hwen noni ei ningonti tu. Jikan tut bipia nihwen kep mun cig hi yai niyaijo nijep di jo kikau ei ningonti bi. 16Ingon dorti tut mun di bindei mbut ningon ngakei yamti tug hon Kristus di kes niyaisi ei mem nye. Ma nyeni cem ikes igyaisi ei mem isut bat nya! 17Gino no di nyeng tut ndigban ngat nisut di nuhwap mbum bingondut noni bi ne bit bon noni kon nihyet tut nonti bipai bipia Allah ningon ngakei yamti jo ei ningonti kan bi. 18Dimunggwom bat jen! Ma indo ingon ngakei yamti tug hon mun di ipai ei yuhui him he au. Noro ma iba ningon ngakei yamti bingondut yam igbit tug hon igyai munti nya.
Nibrim ningkek ei Allah Noho bei
19Tug hon nisinati pima ne ingon dorti tut bipia igyaijo nok gom kin Allah nimunggwom bat di nijit nya ba, ingon jo nyahan ei Allah Noho bei. 20Gino ingon mien paisi pai kep nyenti lene ma igyok ngon kep bipia Allah sindem njiriek ingon mien paisi dima ba, Noni kan tut mun nyeng hagom. 21Gima rino disut bat di dingon kieti jen, gino ingon mien paisi pai kep nye bi lene ma ibrim ingkek tirigi ikuk nye ei Allah Noho bei. 22Mpe dino nyeni ingat nadi tindei mun nyeng hi ne Noni buhup hanyen lewo ibit Nide nicuk nyeti nya bipwoi ningon. 23#Yoh. 13:34, 15:12, 17 Nicuk nyeti dima ne suar ingon jo kep Nipmot Yesus Kristus ba, ingon ngakei yam bit leu nok Kristus nicuk nyeti. 24No di yai igbit Allah nicuk noti nya niyaijo nok gom kin Allah ba, Allah niyaijo nok gom kin noni. Ingon dorti tut bipia Allah niyaijo nok gom kin nye tug hon Ninnei di Noni kes ei ingonti.
Currently Selected:
YOHANES GI NIGOM 3: HAD
Highlight
Copy
Compare
Share
Want to have your highlights saved across all your devices? Sign up or sign in
