Mathiu 25
25
1Ka ȧŋlɔkɔ ŋati rȧbȧy ra ro riyana rǝ tǝ bȧlȧnɛ mɔ afanɛ tɔfɔt aŋa gbasi tamulɛ taŋ, aŋ wur tǝ kǝgbans ɔnȧntȧ ufu. 2Antamath aŋ yi atempi, ɔwa aŋtamath aŋ yi apǝŋk, 3ȧtesoma-e ȧŋpǝnk aŋ gbasi tamulɛ taŋ kǝte keranɛ mȧro. 4Kɛrɛ aŋtempi aŋ keranɛ mȧro yi tamulɛ taŋ. 5Ɔwa ma ɔnȧntȧ ufu ɔ te der-e, ŋa bɛ aŋ rɔns, kaŋ dirȧ, 6kɛrɛ ka kǝrendatɔŋ a tam kǝpa, Kǝlo, ɔnȧntȧ ufu ɔ bek! Wur nu nǝ kɔ gbans kɔ. 7Ȧŋlɔkɔ ŋati aŋfanɛ ŋati bɛ aŋ yokanɛ, aŋ bɛmpa bɛmpa tamulɛ taŋ. 8Ka ȧŋpǝnk aŋ pa ka aŋtempi, Yer su nu ȧmȧro ma nu mǝlɔm, kotȧy-e tamulɛ ta su tǝ yema dimsɛ. 9Kɛrɛ aŋtempi aŋ wosa aŋ pa, Thalɔm mǝ gbǝli hɛ bek ta ȧtȧ su yi naŋ-e. Pǝ tǝ yi ɔfisa bepi nǝ kɔ wayanɛ ka ŋaŋ aŋa mǝ thila. 10Ɔwa maŋ kɔnɛ tǝ kǝway-e, ɔnȧntȧ ufu ɔ der. Ɔwa ŋaŋ aŋa po bɛnɛnɛ aŋ wɔŋ yi kɔnɔ ka amet ma kanantǝ; ka a kantha kadare. 11Kǝdarǝŋ kati aŋfanɛ alɔm aŋ der sɔ, aŋ pa, Pa, Pa, kanthɛ su. 12Kɛrɛ ɔ wosa ɔ pa, Tǝ tɛntɛnɛ i kanɛ nu, i tɛ hɛ nu. 13Tiyȧŋ kǝlɛnɛ nu kotȧy-e nǝ tɛ hɛ ȧŋrey thalɔm ȧŋlɔkɔ aŋa ɔWan ka wuni mɔ der.
14kotȧy-e pǝ yi mɔ wuni ɔwe mǝ kɔ rǝ athɔf alɔm, ɔ tela ɛbɔy yɔŋ, kɔ laŋklia ŋa ɛyɛt yɔŋ. 15kɔ sɔŋ ukin ɛtalent tamath, ka ulɔm ɛtalent yɛrǝŋ, ka ulɔm sɔ atalent ŋin; rǝ ukin o kin mɔ mǝ kagbǝli kɔŋ kǝ yi-e. Kɔ kɔnɛ ka ȧŋbiyas ŋɔŋ. 16Ka ɔlɛmp wati-e, ɔwe sɔthɔ ɛtalent tamath-e, ɔ kɔnɛ ɔ sǝkinɛ yi, kɔ sɔthɔ tamath rokɔm kati. 17Ya pǝ yi sɔ ta ɔwe sɔthɔ ɛtalent yɛrǝŋ-e, ɔ sɔthɔ yɛrǝŋ rokɔm kati. 18Kɛrɛ kɔnɔ ɔwe sɔthɔ atalent ŋin-e, ɔ kɔnɛ ɔ bɛs ro thɔf, ɔ maŋk aŋkala ŋa ɔmarki kɔŋ. 19Ɔwa ma pǝ won haŋ-e, ɔmarki ka ɛbɔy yati ɔ der, ka ɛbɔy aŋ kanɛ ro ŋɔŋ. 20Ka ɔwe sɔthɔ ɛtalent tamath ɔ der ɔ kȧrȧ ɛtalent tamath ɛlɔm, kɔ pa, Pa, mǝ laŋklia mi ɛtalent tamath. Kǝla, i po sɔthɔ ɛtalent tamath rokɔm kati. 21Ɔmariki kɔŋ ɔ pa ro ŋɔŋ, Mǝ yɔ ɔlompi, munɔ mun bɔy ufinɔ ubɔthi lanɛ. Mǝ po yi ubɔthi lanɛ rǝ yɛt ɛthan. I ti bot mu rokɔm ka yɛt ɛgbathi. Wɔŋ ka mabɔnɛ ma ɔmarki ka mu. 22Kɔnɔ sɔ ɔwe sɔthɔ ɛtalent yɛrǝŋ-e, ɔ der ɔ pa, Pa, mǝ laŋklia mi ɛtalent yɛrǝŋ. Kǝla, i po sɔthɔ ɛtalent yɛrǝŋ rokɔm kati. 23Ɔmariki kɔŋ ɔ pa ro ŋɔŋ, Mǝ yɔ ɔlompi, munɔ mun bɔy ufinɔ ubɔthi lanɛ; mǝ po yi ubɔthi lanɛ rǝ yɛt ɛthan, i ti bot mu rokɔm ka yɛt ɛgbathi. Wɔŋ ka mabɔnɛ ma ɔmarki ka mu. 24Ka kɔnɔ ɔwe sɔthɔ atalent ŋin-e, ɔ der sɔ, ɔ pa, Pa, i tȧrȧ mu kǝyi wuni bȧk mǝdɛr, mǝ rɔk ro mǝ te sak, mǝ thoŋkla ro mǝ te sakthi. 25Tǝ i nesa, i kɔnɛ maŋk aŋkala a mu ro thɔf. Kǝla, mǝ ba ara mu. 26Kɛrɛ ɔmarki kɔŋ ɔ pa, Munɔ mun bɔy ulǝs dɛ yi uyai. Mǝ tȧrȧ kǝpa i rɔk ro i te sak, i thoŋkla ro i te sakthi. 27Mǝ yi naŋ tǝ kǝsɔŋ aŋkala a mi ka aŋsinkanɛ ɛkala, kȧmȧ ma i der-e, i gbǝli sɔthɔ kǝthɛksɛ rokɔm kati. 28Tiyȧŋ nɔy kɔ nu aŋtalent ŋin kȧmȧ nǝ sɔŋ ŋi ka ɔwe ba ɛtalent tɔfɔt. 29kotȧy-e rǝ wuni o wuni ɔwe ba-e a tǝ bȧrȧ kɔ, ɔwa ɔ tǝ ba ɔgbȧthi. Kɛrɛ ka ɔwe te ba-e, hali ara ɔ ba-e, a tǝ nɔy kɔ ri. 30Kama nǝ fitha ȧŋbɔy uyai ɔwe ka ȧŋsum rokaŋ. Ro kǝkulɔ yi kȧŋȧkŋȧk ɛsek kǝ yi.
31Kɛrɛ ma ɔWan ka wuni ɔ po der ka aŋyiki ŋɔŋ, yi aŋmȧleka aŋa yi yi kɔnɔȧŋ, ka ȧŋlɔkɔ ŋati ɔ tǝ yirȧ ka kawaŋ ka rȧbȧy ka aŋyiki ŋɔŋ-e, 32ɔwa ɔ tǝ thoŋkla tǝbona bɛ rodi kɔŋ. Ɔ tǝ gbaski ŋa kǝtɔŋ mɔ utɔl tǝlɔmɛ mǝ ɔ gbaski talɔmɛ ka atirȧŋ. 33Ɔ tǝ tǝmǝr talɔmɛ ka kȧdiyɔ kɔŋ, kɛrɛ atir ka kȧmɛrɔ kɔŋ. 34Ka ȧŋlɔkɔ ŋati ɔBȧy ɔ tǝ pa ro ŋaŋ ka kȧdiyɔ kɔŋ, Der nu naŋ aruba ŋa ɔKas kȧmi, wɔŋ nu ka rȧbȧy ara a bɛnɛnɛ ta ȧtȧ nu kǝbi ma ȧdȧru rǝ tǝpɛ. 35kotȧy-e ma i yi udor-e, nǝ sɔŋ mi da rǝdi. Ma rǝmun rǝ bȧk mi-e, nǝ sɔŋ mi i mun. Ma i yi utik-e, nǝ yia mi. 36Ma i yi utiŋ-e, nǝ lonsǝr mi. Ma i yi utuy-e, nǝ kori mi. Ma i yi ka ȧŋseth ŋa tǝrǝŋka-e, nǝ der ro mi. 37Ɔwa aŋlompi aŋ tǝ pa ro ŋɔŋ, Pa, alɔkɔ areke sǝ nənk mu mun dor-e, sǝ fantha mu-e, thalɔm mǝ fela tǝ kǝmun sǝ yer mu mant-e? 38Ɔwa alɔkɔ areke sǝ nənk mu utik-e, sǝ yia mu-e? Thalɔm, mun tiŋ-e, sǝ lonsǝr mu-e? 39Alɔkɔ areke sǝ nənk mu mun tuy-e, thalɔm ka ȧŋseth ŋa tǝrǝŋka, ka sǝ der ro mu-e? 40Ɔwa ɔbȧy ɔ tǝ pa ro ŋaŋ, Tɛntɛnɛ i kanɛ nu kǝpa, kǝbi ma nǝ po yɔ yi ka ukin ka aŋwɔnt mi-e, hali aŋlɔl lɔl aŋe-e, nǝ po yɔ ti ro rɔmi. 41Ȧŋlɔkɔ ŋati ɔ tǝ pa ro ŋaŋ aŋa yi ka kȧmɛrɔ kɔŋ, wur mi nɔ naŋ aŋa ba ȧranka, kɔnɛ nu ka anant na tǝbana ana a bɛnɛnɛ ta ɔkǝrǝfi yi aŋmȧleka ŋɔŋ. 42kotȧy-e, ma i yi udor-e, nǝ sɔŋ hɛ mi da rǝdi. Ma rǝmun rǝ bȧk mi-e, nǝ sɔŋ hɛ mi i mun. 43Ma i yi utik-e nǝ yer hɛ mi. Ma i yi utiŋ-e, nǝ lonsǝr hɛ mi. Ma i yi utui thalɔm ka ȧŋseth ŋa tǝrǝŋka-e, nǝ kori hɛ mi. 44Ȧŋlɔkɔ ŋati aŋ tǝ pa, Pa, alɔkɔ areke sǝ nənk mu udor-e, thalɔm mǝ yema mun, thalɔm mǝ yi utik, thalɔm mǝ yi utiŋ, thalɔm mǝ yi utui, thalɔm mǝ yi ka ȧŋseth ŋa tǝrǝŋka-e, ɔwa sǝ te mu yɔna-e? 45Ɔwa ɔ tǝ pa ro ŋaŋ, Tɛntɛnɛ i kanɛ nu kǝpa, kǝbi ma nǝ te yɔ yi ka ukin ka aŋlɔl lɔl aŋe-e, nǝ yɔ hɛ ti ro rɔmi. 46Ɔwa aŋe aŋ tǝ kɔ ka athalǝr ŋa thǝbana, kɛrɛ aŋlompi aŋ tǝ kɔ ka aŋesǝm thǝbana.
Currently Selected:
Mathiu 25: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.