Mathiu 24
24
1Ka Yisɔsȧŋ ɔ wur ka ȧŋseth ŋa Kuru tǝ kǝkɔnɛ, ɔwa aŋkarande aŋ der kȧmȧ aŋ tɔri kɔ mabɛmpa ma ȧŋseth ŋa Kuru. 2Ka Yisɔs ɔ pa ro ŋaŋ, Nǝ nənk ɛye bɛ-i? Tɛntɛnɛ i kanɛ nu a ba hɛ kǝtey nɔ ȧsar ŋin rokɔm ka alɔm aŋa mǝ a te fak.
3Ɔwa ma ɔ yirȧ ka kateŋ ka Ɔlif-e, aŋkarande ŋɔŋ aŋ der ro ŋɔŋ sɔy, aŋ pa, Kanɛ su ȧŋlɔkɔ aŋa mȧtȧy ame mǝ tǝ yi-e, dɛ yi ko mǝ yi ȧŋmisali ŋa kȧder ka mu, yi ɔthalnɛ wa raru-e? 4Ka Yisɔsȧŋ ɔ wosa ɔ pa ro rɔŋaŋ, Botnɛ nu kȧmȧ wuni o wuni ɔ te nu yɛthǝs. 5kotȧy-e agbȧthi aŋ tǝ der ka ȧŋes a mi, aŋ tǝ pa, Minɛ yi ɔKrayst, ɔwa aŋ tǝ yɛthǝs agbȧthi. 6Ɔwa nǝ tǝ tǝl ta tǝtim yi tibari ta tǝtim, kɛrɛ ta pǝ te sɔmpa nu kotȧy-e mȧtȧy ame bɛ mǝ ba kǝyɔnɛ. Kɛrɛ ɔlǝpsɔ ɔ tha bek hɛ. 7Abona aŋ tǝ yokar abona, rǝbai rǝ tǝ yokar rǝbai, dor rǝ tǝ yi, afithina ŋa tǝtu dɛ yi kǝyɛr ka ȧŋthɔf rǝ dɛr ɔgbaskɛ gbaskɛ. 8Kɛrɛ mȧtȧy ame bɛ mǝ yi gbo ɔtǝpɛr wa ȧŋsɔmpanɛŋ. 9Ka ȧŋlɔkɔ ŋati a tǝ lȧnki nu rǝ asɔmpanɛ, a tǝ dif nu, ɔwa tǝbona bɛ tǝ tǝ gbɛŋa nu salata ȧŋes a mi. 10Ɔwa afǝm agbȧthi aŋ tǝ pǝnthbǝla, aŋ tǝ sɔndanɛ, ɔwa aŋ tǝ gbɛŋanɛ. 11Ɔwa anȧbi ayem agbȧthi aŋ tǝ yokanɛ, aŋ tǝ yɛthǝs agbȧthi. 12Ɔwa mȧbɔthǝr ma agbȧthi mǝ tǝ gbǝnkɛ pǝkasifɛ mǝlǝs mǝ tǝ bȧrnɛ gbo. 13Kɛrɛ ɔwe mǝ muyu haŋ ka ɔthalnɛ, kɔnɔ kati ɔ tǝ kisi. 14Ɔwa ȧkɛra kǝfinɔ ka rȧbȧy ake-e, a ba kǝtamǝs ki ka ȧdȧru bɛ ta mǝseri ka tǝbona bɛ. Kǝdarǝŋ kati ɔthalnɛ ɔ der tɛnɛ.
15Tiyȧŋ, bepi nǝ nənk ɔtheranɛ ka kadinɛ ɔwe Danɛl ɔnȧbi ɔ lei, ɔ tǝma ka ɔdɛr ɔsǝm-e, (ɔwe mǝ karaŋ ta pǝ sɔk kɔ) 16ka ȧŋlɔkɔ ŋati ta ŋaŋ aŋa yi ro Yudia aŋ gbukɛ ka tȧteŋ. 17Kɔnɔ ɔwe yi ka ȧŋseth rokɔm ta ɔ te thor tǝ kǝwura ɛyɛt ɛyɛ yi ro seth kɔŋ. 18Ɔwa kɔnɔ ɔwe yi ro kor ta ɔ te kȧlanɛ tǝ kǝgbasi aruma rɔŋ. 19Ɔwa mɔnɛ ro ŋaŋ aŋa yi ator, dɛ yi ŋaŋ aŋa mǝ masǝr afɛth ka mȧrey mati! 20Kɛrɛ ramnɛ nu kȧmȧ kagbukɛ ka nu kǝ te yi ka adarǝŋ thalɔm ka aŋsabath, 21kotȧy-e ka ȧŋlɔkɔ ŋati asɔmpanɛ ȧbana aŋ tǝ yi awunɔŋ aŋa te tha la yi kǝbi ȧdȧru rǝ tǝpɛ haŋ ka-ake, dɛ yi aŋa te sɔ ba kǝyi thǝbana. 22Ɔwa thambe a gbǝŋki mȧrey mati-e, wuni o wuni ɔ ba hɛ kǝkisi; kɛrɛ salata aŋthith ŋa Kuru a tǝ gbǝŋki mȧrey mati. 23Bepi wuni o wuni ɔ pa ro nu, Kǝlo, Kraistȧŋ ɔ yi nɔ, thalɔm ɔ yi ro, te ti lanɛ. 24kotȧy-e aKrayst ayem yi anȧbi ayem aŋ tǝ yokanɛ, aŋ tǝ tɔri ɛmisali ɛbana yi mətȧy mǝkabanɛ, kȧmȧ a yɛthǝs aŋthith ŋa Kuru bepi pǝ fɔi tȧy. 25Kǝla i po yeŋk kanɛ nu. 26Tiyȧŋ bepi a pa ro nu, Kǝli, ɔ yi ro wula, te kɔ ri. Thalɔm, Kǝli, ɔ yi ka tǝkoŋko rokor, te ti lanɛ. 27kotȧy-e mɔ mǝ ɔnakthinɛ mǝ ɔ wur ro thɔrɔŋ-e, ɔwa a nənk ŋi haŋ ro pil-e, ya kȧder ka ɔWan ka wuni mǝ kǝ yi. 28Dɛr o dɛr rǝ kabel kǝ yi-e, rǝ ɛyiba mǝ aŋ thoŋklanɛ dɛr rɔkin.
29Ka ɔlɛmp wati, kǝdarǝŋ ka kasɔmpanɛ ka mȧrey mati, aret rǝ tǝ biyȧ, ɔwa aŋof aŋ ba hɛ kǝsɔŋ kawalɛ kati, dɛ yi atɔs tǝ tǝ fumpɔ kǝwur ka ȧkuru, ɔwa ɛfɔsɔ ya ȧturu ɛ tǝ yiŋkthanɛ. 30Ɔwa ka ȧŋlɔkɔ ŋati ȧŋmisali ŋa ɔWan ka wuni aŋ tǝ tɔrinɛ ka ȧkuru. Tȧbona bɛ ka ȧdȧru tǝ tǝ kulɔ, ɔwa aŋ tǝ nənk ɔWan ka wuni ɔ der ka karǝnt ka ȧkuru rǝ afɔsɔ yi ayiki ȧbana. 31Ɔ tǝ som aŋmȧleka ŋɔŋ yi rim rǝbana rǝ kǝthɛma, ɔwa aŋ tǝ thoŋkla aŋthith ŋɔŋ dɛr rɔkin kǝwur ka ɛkoŋ yanlɛ ya ȧdȧru, kǝwur ka ɔthalnɛ wa aŋfena haŋ kǝkɔ ka ɔthalnɛ ɔlɔm.
32Ɔwa thǝkǝs aŋlomɔ ŋa aŋǝnt ŋa aŋgbɔnɔ. Ma aŋra ŋati aŋ po fɛthȧnɛ-e, aŋ wur ɛbɔpǝr, nǝ tȧrȧ ti kǝpa rawok rǝ fat. 33Ya pǝ yi sɔ naŋ-e, ma nǝ nənk mȧtȧy ame bɛ-e, tȧrȧ ti nu kǝpa ɔ yi ɔfati, hali ka tadare. 34Tɛntɛnɛ i pa ro nu, rȧkomra are rǝ ba hɛ kǝthas haŋ mȧtȧy ame bɛ mǝ gbenthis. 35Ȧkȧriyana yi ȧdȧru ɛ ba kǝthas, kɛrɛ ȧsim ta mi tǝ ba hɛ kǝthas. 36Kɛrɛ ta ȧŋrey ŋati yi ȧŋlɔkɔ ŋati wuni o wuni ɔ tɛ hɛ, hali aŋmȧleka ŋa ro riyana, thalɔm ɔWan. ƆKas kȧmi son kɔnɔ tȧrȧ. 37Ɔwa mɔ mȧrey ma Noaȧŋ mǝ sa yi-e, ya mǝ pǝ kȧl sɔ yi ka kȧder ka ɔWan ka wuni. 38kotȧy-e ka mȧrey mati ama yi yeŋka ȧmȧnt mǝfɔl mǝ der, aŋ di-o, aŋ mun-o, aŋ nantȧ-o, aŋ sɔŋ tǝnantǝ haŋ ka ȧŋrey aŋa Nowaŋ ɔ wɔŋ ka ȧŋbil. 39Ɔwa aŋ tɛ hɛ ti haŋ ȧmȧnt mǝfɔl mǝ der, ɔwa mǝ dim ŋa bɛ; ya mǝ pǝ yi ka kȧder ka ɔWan ka wuni. 40Ka ȧŋlɔkɔ ŋati alaŋgba ŋarǝŋ aŋ tǝ yi ro kɔr; a tǝ gbasi ukin, a tǝ tey ukin. 41Afǝm abom ŋarǝŋ aŋ tǝ tɔ; a tǝ gbasi ukin, a tǝ tey ukin. 42Tiyȧŋ, kǝlɛnɛ nu, kotȧy-e nǝ tɛ hɛ ȧŋlɔkɔ ɔMarki ka nu mǝ ɔ der. 43Kɛrɛ tȧrȧ nu ȧte kǝpa bepi ɔmarki ka ȧŋseth ɔ tȧrȧ ȧŋlɔkɔ aŋa ɔkei mǝ ɔ der-e, ɔ tǝ kǝlɛnɛ, ɔ gbǝli hɛ selɔ a bɛs ȧŋseth ŋɔŋ. 44Tiyȧŋ yi nu a bɛnɛnɛ kotȧy-e ka ȧŋlɔkɔ aŋa mǝ nǝ te nanɛ ɔWan ka wuni ɔ tǝ der.
45Kanɛ yi thɔŋ ȧŋbɔy ubɔthi lanɛ yi atempi, ɔwe ɔmarki kɔŋ ɔ po bot kɔ rokɔm ka kabɔr kɔŋ, kȧmȧ ɔ sɔŋ ŋa yɛt ɛdi ka ȧŋlɔkɔ ŋati-e? 46Ȧŋbɔy ŋati ɔ ba aruba ɔwe ɔmarki kɔŋ ɔ bǝp ɔ yɔ mɔ yaŋ bepi ɔ der-e. 47Tɛntɛnɛ i kanɛ nu kǝpa ɔ tǝ sɔŋ kɔ afɔsɔ rokɔm ka ara ɔ ba bɛ. 48Kɛrɛ bepi ȧŋbɔy ulǝs ŋati ɔ pa ka ȧŋmerȧ ŋɔŋ, Ɔmariki kȧmi ɔ tǝ won. 49Ɔwa ɔ tǝp kǝsapǝth aŋkos ŋɔŋ ɛbɔy, ɔwa ɔ di, ɔ mun dɛ yi antis-e. 50Ɔmariki ka ȧŋbɔy ŋati ɔ tǝ der ka ȧŋrey aŋa mǝ ɔ te nanɛ kɔ-e, ɔwa ka ȧŋlɔkɔ aŋa mǝ ɔ te tȧrȧ. 51Ɔwa ɔ tǝ sȧp kɔ kǝsȧp kǝbana, ɔ tǝ bot kɔ dɛr yi ȧŋmunafȧki, ro kȧkulɔ yi kȧŋȧkŋȧk ɛsek kǝ yi.
Currently Selected:
Mathiu 24: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.