Mathiu 26
26
1Ka pǝ re yi ma Yisɔsȧŋ ɔ po gbanthi ȧsim ȧte bɛ-e, ɔ pa ka aŋkarande ŋɔŋ, 2Nǝ tȧrȧ kǝpa ka mǝrei marǝŋ kapainɛ kǝ bek, ɔwa a tǝ lȧnki ɔWan ka wuni kȧmȧ a tȧŋ kɔ ka akǝnt kǝpǝŋkinɛ. 3Ȧŋlɔkɔ ŋati aŋkərbomp kǝtɔŋ ka aŋfode, aŋkarmɔkɔ yi aŋbȧki ŋa aŋfǝm aŋ thoŋklanɛ dɛr rɔkin ka ȧŋbare ŋa ɔfode ubana, ɔwe a bont Kayafas. 4Ɔwa aŋ nǝŋkanɛ dɛr rɔkin kȧmȧ aŋ gbǝli wop Yisɔsȧŋ rǝ mǝsɔth tǝ kǝdif kɔ. 5Kɛrɛ aŋ pa, Ta pǝ te yi ka amet, ta thani atotok aŋ yokanɛ kǝtɔŋ ka aŋfǝm.
6Ɔwa ma Yisɔs ɔ yi ro Bɛthani ka ȧŋseth ŋa Saymɔn ɔwe ba arom-e, 7wuni bom ɔ der ro ŋɔŋ, ɔ ba kǝbos ka mȧro mǝsopa mǝbaki mɔlɔ, kɔ lond ma ka rȧbomp rɔŋ ma ɔ yirȧ ka kǝdi. 8Kɛrɛ ma aŋkarande aŋ nənk ti-e, pǝ bansȧnɛ ŋa, aŋ pa, Ko asabu mǝ a lǝsǝr ame-e? 9kotȧy-e a gbǝli thila ame ta akala agbȧthi, ɔwa a sɔŋ ȧŋmɔnɛ. 10Kɛrɛ ma Yisɔsȧŋ ɔ sɔthnɛ ti-e, ɔ pa ro ŋaŋ, kɔyɛŋ mǝ nǝ sɔmpa ɔbɔrkɔ-e? Ȧtesoma-e ɔ po yɔna mi apanth afinɔ. 11kotȧy-e nǝ ba ȧŋmɔnɛ yi naŋȧŋ lɔkɔ o lɔkɔ, kɛrɛ minɛ i yi hɛ yi naŋȧŋ lɔkɔ o lɔkɔ. 12Ma ɔ sop aŋdɛr a mi yi ȧmȧro mǝsopa ame-e, ɔ yɔ ti tǝ kǝmaŋk mi. 13Tǝ tɛntɛnɛ i kanɛ nu dɛr o dɛr ro mǝ a tamǝs ȧkɛra kǝfinɔ ake ka ȧdȧru bɛ-e, ȧte ɔya ɔwe ɔ po yɔ a tǝ fɔf ti tǝ kǝnanɛ ta atɔŋ.
14Ɔwa ukin ka aŋtɔfɔt ŋarǝŋ ɔwe a bont Yudas Iskariyɔt, ɔ kɔnɛ ka aŋkərbomp kǝtɔŋ ka aŋfode, ɔ pa, 15Ko mǝ nǝ selɔ tǝ kǝsɔŋ mi kȧmȧ i lȧnki kɔ ro nu-e? kaŋ lɔma kɔ ɛbɛm ya akala ȧferȧ kǝgba tɔfɔt. 16Kǝtǝp ka ȧŋlɔkɔ ŋati ɔ thɛns afɛrɛ tǝ kǝlaŋkli kɔ.
17Ɔwa ka ȧŋrey ȧtɔtɔkɔ ŋa kǝbo kǝpaŋi ɛgbith-e, aŋkarande aŋ der ka Yisɔsȧŋ, aŋ pa ro ŋɔŋ, Reke mǝ yema sǝ bɛnɛnɛ ta ȧtȧ mu tǝ kǝdi kapainɛ-e? 18kɔ pa, Kɔnɛ nu ro pet ka wuni wunɔŋ, nǝ pa ro ŋɔŋ, ƆKarmɔkɔ ɔ pa, Ȧŋlɔkɔ a mi aŋ fat. I ti wop amet ma kapainɛ ro seth ka mu yi aŋkarande a mi. 19Ka aŋkarande aŋ yɔ mɔ mǝ Yisɔs ɔ kanɛ ŋa, ka aŋ bɛnɛnɛ amet ma kapainɛ.
20Ma rȧfɔy rǝ bek-e, ɔ yirȧ ka kǝdi yi aŋtɔfɔt ŋarǝŋ. 21Ɔwa ma mǝ aŋ di-e, ɔ pa, Tɛntɛnɛ i kanɛ nu kǝpa ukin ka nu ɔ tǝ sɔnd mi. 22Ka animisa aŋ wop ŋa, aŋ tǝp kǝyif kɔ ukin o kin, Pa, minɛŋ-i? 23kɔ wosa ɔ pa ro ŋaŋ, Ɔwe tɔka kȧta kɔŋ ka ȧŋbɔl yi minɛȧŋ, kɔnɔ gbeŋ ɔ tǝ sɔnd mi. 24ƆWan ka wuni ɔ kɔ mɔ mǝ a gbal ta atɔŋ, kɛrɛ mɔnɛ ka ɔwuni kati ɔwe mǝ sɔnd ɔWan ka wuni. Pǝ tǝ yi ɔfinɔ naŋ ta ɔwuni kati bepi a kom hɛ kɔ naŋ. 25Ka Yudasȧŋ ɔwe sɔnd kɔ ɔ yif, Minɛ-i Karmɔkɔ? kɔ pa ro ŋɔŋ, Munɔ pa yi.
26Ɔwa mɔ mǝ aŋ di-e, Yisɔsȧŋ ɔ gbasi kǝbo, ɔ ruba ki kɔ sim ki, ɔ sɔŋ ki ka aŋkarande, ɔ pa, Gbasi nu, nǝ di. Ake-e, kǝ yi aŋdɛr a mi. 27kɔ gbasi ampɔthi, ɔ muti mɔmɔ, ɔ sɔŋ ŋa, kɔ pa, Mun ri nu bɛ. 28kotȧy-e ame mǝ yi mȧtir ma mi ma aŋlemranɛ afu, ama a loŋ ta agbȧthi ta katerɔ ka ɛhakɛ. 29I kanɛ nu, i mun hɛ sɔ mȧkomi ame ma ɛyɛt ɛgbam, haŋ ka ȧŋrey aŋa mǝ i mun ma ɔfu yi naŋ ka rȧbȧy ra ɔKas kȧmi.
30Ɔwa maŋ po leŋ aleŋ-e, aŋ wur, aŋ kɔ ka kateŋ ka Ɔlif. 31Ka Yisɔsȧŋ ɔ pa ro ŋaŋ, Naŋ bɛ nǝ tǝ pǝnthbǝla ta ȧtȧ mi thonɔŋ tȧtȧk. Kotȧy-e a po gbal kǝpa, A tǝ gbantha ɔtɔl, ɔwa talɔmɛ ŋa akuthi aŋ tǝ sakanɛ. 32Kɛrɛ kǝdarǝŋ ka kȧyokanɛ ka mi-e, i ti tǝma nu kǝdi ro Kalili. 33Kɛrɛ Pitarȧŋ ɔ wosa ɔ pa ro ŋɔŋ, Hali afǝm bɛ aŋ pǝnthbǝla ta ȧtȧ mu-e, minɛȧŋ i gbǝli hɛ pǝnthbǝla thǝbana. 34Ka Yisɔsȧŋ ɔ pa ro ŋɔŋ, Tɛntɛnɛ i kanɛ mu, Rȧrɔy are gbeŋ, yeŋk katǝpi ɔ tam-e, mǝ tǝ pɛnsanɛ mi mǝsas. 35Ka Pitarȧŋ ɔ pa ro ŋɔŋ, Hali i ba kǝfi yi munɔŋ-e, i gbǝli hɛ pɛnsanɛ mu. Yaŋ aŋkarande sɔ bɛ aŋ pa.
36Ka Yisɔsȧŋ ɔ der yi ŋaŋ ka ɔdɛr a bont Kɛthsɛmanɛ, kɔ pa ka aŋkarande ŋɔŋ, Yirȧ nu nɔ, ma mǝ i kɔ ro tǝ kǝramnɛ. 37kɔ banȧnɛ Pitarȧŋ yi aŋwuth aruni ŋarǝŋ ŋa Sɛbidi, kɔ tǝp kǝsaŋ amɔl, ɔwa, ȧŋmerȧ ŋɔŋ aŋ lela kɔ. 38kɔ pa ro ŋaŋ, Ȧŋmerȧ mi aŋ ba ɔnɔsinɛ ɔthasǝr haŋ ka rǝfi. Kar nu nɔ, nǝ kǝlɛnɛ yi minɛȧŋ. 39kɔ kɔ rodi ɔthan, ka ɔgbǝps a ro thɔf, ɔ ramnɛ, ɔ pa, O Pa kȧmi, bepi pǝ fɔi tȧy yɔ ampɔthi aŋe aŋ painɛ mi; kɛrɛ ta pǝ te yi mȧselɔ ma mi-e, ta pǝ yi gbo mȧselɔ ma mu. 40kɔ der ka aŋkarande, ɔ bǝp ŋa aŋ dirȧ, kɔ pa ka Pitarȧŋ, kɔyɛŋ nǝ te gbǝli kǝlɛnɛ yi minɛ ahawa ŋin-e? 41Kǝlɛnɛ nu, ɔwa ramnɛ nu kȧmȧ nǝ te wɔŋ rǝ tȧy tǝgbɔns; ȧŋmerȧ aŋ selɔ tɛntɛnɛ, kɛrɛ aŋdɛr a rant. 42kɔ kȧl kɔnɛ kǝbeka marǝŋ, ɔ ramnɛ, ɔ pa, O Pa kȧmi, bepi aŋe aŋ gbǝli hɛ painɛ mi thambe i mun ŋi-e, ta mȧselɔ ma mu mǝ yɔnɛ. 43Ma ɔ kȧl der-e, ɔ bǝp ŋa aŋ dirȧ sɔ kotȧy-e ɛfɔr yaŋ ɛ lel. 44kɔ tey ŋa, ɔ kɔnɛ sɔ, ɔ ramnɛ kǝbeka mǝsas, ɔ kȧl pa ȧsim tin tati. 45Ɔ kȧl der ka aŋkarande ŋɔŋ, ɔ pa ro ŋaŋ, Dirȧ nu ka-ake, ɔwa fothanɛ nu. Kǝla, ȧŋlɔkɔ aŋ bek, ɔwa a sɔŋ ɔWan ka wuni ka mȧta ma afǝm ŋa ɛhakɛ. 46Yokanɛ nu, maŋ kɔnɛ; kǝlo, kɔnɔ ɔwe sɔnd mi ɔ fat.
47Mɔ mǝ ɔ bɔ fɔf-e, kǝla, Yudasȧŋ, ukin ka aŋtɔfɔt ŋarǝŋ ɔ der, yi runiya rǝbana, aŋ ba ɛgbathɔ yi tǝgbeŋgbeŋ, aŋ wur ka aŋkərbomp kǝtɔŋ ka aŋfode yi aŋbȧki ŋa aŋfǝm. 48Ɔwa, kɔnɔ ɔwe mǝ sɔnd kɔ ɔ po sɔŋ ŋa alomar, ɔ pa, Ɔwe mǝ i mumǝl-e, kɔnɔȧŋ. Wop kɔ nu. 49Ka ɔlɛmp wati ɔ der ka Yisɔsȧŋ, ɔ pa, Kori mu Karmɔkɔ! kɔ mumǝl kɔ. 50Ka Yisɔsȧŋ ɔ pa, Yathki, yɔ ȧte mǝ der tǝ kǝyɔ. Kaŋ der aŋ wop Yisɔsȧŋ, kaŋ kera kɔ. 51Ɔwa kǝla, ukin ka ŋaŋ aŋa yi yi Yisɔsȧŋ, ɔ thanthi kȧta kɔŋ, ɔ tali aŋgbathɔ ŋɔŋ, ɔ tap ȧŋbɔy ŋa ɔfode ubana, ɔ gbǝk aŋlǝns ŋɔŋ. 52Ka Yisɔsȧŋ ɔ pa ro ŋɔŋ, Kala aŋgbathɔ a mu ka aŋbom, kotȧy-e ŋa bɛ aŋa mǝ gbasi aŋgbathɔ-e, aŋ ba kǝdinɛ rǝ aŋgbathɔ. 53Thalɔm mǝ nanɛ kǝpa i gbǝli hɛ nɛmthɛnɛ ɔKas kȧmi, ɔwa ɔ tǝ som mi ka-ake amȧleka athasi ɛsǝfȧ tɔfɔt yɛrǝŋ-i? 54Kɛrɛ to mȧgbal mǝ gbǝli lasǝr, kǝpa ya pǝ ba kǝyi-e? 55Ka ȧŋlɔkɔ ŋati Yisɔs ɔ pa ka ȧsuniya, Nǝ der ro mi yi ɛgbathɔ dɛ yi tǝgbeŋgbeŋ tǝ kǝwop mi mɔ ukey-i? I yirȧ ȧrey o rei ka ȧŋseth ŋa Kuru tǝ kǝthǝksa, ɔwa nǝ wop hɛ mi. 56Kɛrɛ ȧte bɛ tǝ yɔnɛ kȧmȧ mȧgbal ma aŋnabi mǝ lasǝr. Ȧŋlɔkɔ ŋati aŋkarande ŋɔŋ bɛ aŋ tey kɔ aŋ gbukɛ.
57Ɔwa, aŋa po gbip Yisɔsȧŋ aŋ kera kɔ ka Kayafas ɔfode ubana, ro aŋkarmɔkɔ yi aŋbȧki aŋ po thoŋklanɛ. 58Ɔwa Pitarȧŋ ɔ tȧŋ kɔ ɔbɔli poŋ, kǝkɔ ka ȧŋbare ŋa ɔfode ubana, kɔ wɔŋ, ɔ yirȧ yi aŋkurgba tǝ kǝnǝŋk ɔthalnɛ. 59Ŋatǝbomp kǝtɔŋ ka aŋfode yi aŋbȧki ŋa aŋfǝm, yi aŋSanhedrin bɛ aŋ thɛns mǝseri ma rǝyem ta Yisɔsȧŋ, kȧmȧ aŋ dif kɔ, 60kɛrɛ aŋ thamrɔ, hali ma mǝseri ma rǝyem agbȧthi aŋ der. Kǝdarǝŋ kati ŋarǝŋ aŋ der, 61aŋ pa, Ɔlaŋgba ɔwe ɔ pa, Minɛ i gbǝli lǝsǝr ȧŋseth ŋa Kuru, ɔwa, i kȧl tǝmǝr ŋi rǝ mǝrei mǝsas. 62Ka ɔfode ubana ɔ tǝma, ɔ pa ro ŋɔŋ, Mǝ ba hɛ ȧte maŋ gbaki-i? Ko tȧy tȧŋ ȧte aŋe aŋ seri ta ȧtȧ mu-e? 63Kɛrɛ Yisɔsȧŋ ɔ tȧnk thǝm. Ka ɔfode ubana ɔ pa ro ŋɔŋ, I yema mu mǝ gbiŋ ka ɔKuru ukǝli kȧmȧ mǝ kanɛ su bepi mǝ yi ɔKrayst ɔWan ka Kuru. 64Ka Yisɔsȧŋ ɔ pa ro ŋɔŋ, Mǝ po pa ti, kɛrɛ i kanɛ nu, alɔkɔ alɔm nǝ ba kǝnǝnk ɔWan ka wuni ɔ yirȧ ka kȧta kȧdiyɔ ka afɔsɔ, ɔ tǝ der ka tǝrǝnt tǝfera ka ȧkuru. 65Ka ɔfode ubana ɔ gbari ȧsuma tɔŋ, ɔ pa, Ɔ po ŋamnɛ Kuru! Ko mǝseri mǝlɔm mǝ sǝ yema sɔ-e? Kǝla, naŋ nǝ po tǝl mɔ ɔ ŋamnɛ Kuruȧŋ ɔlǝs. 66To naŋ nǝ nanɛ-e? Aŋ wosa aŋ pa, Ubek tǝ kǝdif! 67kaŋ thufǝr kɔ ro der, aŋ tuns kɔ ɛbɔfthar, alɔm aŋ gbantha kɔ yi mȧta maŋ, 68kaŋ pa, Munɔ ɔKrayst, tɔri su ba; Kanɛ gbantha mu-e?
69Ȧŋlɔkɔ ŋati Pitarȧŋ ɔ yirȧ rokaŋ ro bare, ka ȧŋbɔy ubɛra ɔ der ro ŋɔŋ, ɔ pa, Munɔ sɔ mǝ sa yi yi Yisɔs ɔKalilian. 70Kɛrɛ ɔ pɛnsa rodi ka ŋaŋ bɛ-e, ɔ pa, i tɛ hɛ ȧtȧ mǝ pa. 71Ɔwa ma ɔ wur ɔ kɔ ro gbǝnthǝŋ-e, ȧbɔy ubɛra ulɔm ɔ nənk kɔ, kɔ pa ka ŋaŋ aŋa yi ri-e, Ɔlaŋgba ɔwe sɔ ɔ la yi yi Yisɔs ɔwe ro Nasarɛth. 72kɔ pɛnsa sɔ ɔwa ɔ gbiŋ kǝpa, I tɛ hɛ ɔlaŋgba. 73Ɔwa pǝ won hɛ ɔthasǝr-e, aŋfǝm aŋa tǝma ri aŋ der aŋ pa ka Pita, Ka tǝteŋ, munɔ sɔ mǝ yi ukin ka ŋaŋ, mafɔf ma mu mǝ ŋaibi mu. 74kɔ tǝp kǝnal yi kǝgbiŋ, ɔ pa, I tɛ hɛ ɔlaŋgba. Ka ɔlɛmp wati katǝpi ɔ tam. 75Ka Pitarȧŋ ɔ kala ȧmerȧ ka tapa ȧte Yisɔsȧŋ ɔ pa, Yeŋka katǝpi ɔ tam-e, mǝ tǝ pɛnsanɛ mi mǝsas. Kɔ wur, ɔ bok ɔbaŋ.
Currently Selected:
Mathiu 26: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.