Hɛnkilimaya-Kumɛnu 9
9
Hɛnkilimayɛ anubɛ Kuntanyɛ Wara-Koe
1Hɛnkilimayɛ ya ala bɔn sɔ ka sɛnbɛrɛn-kɔn wɔrɔnfila sɔ a kɔrɔ minnu si bɔn wo bira gben! 2A ya soge faga ka ladiyɛ kɛ. A ya minni-fen-diyamɛ do rabɛn ka mɔgɛnu nadiya. A ya fen-dɔn-tinɛ rabɛn yɔnyɔn! 3Hɛnkilimayɛ ya ala bonna-wɔli-kɛlɛnu nata gbengbinu kuma alako wonu ni mɔgɛnu takele.
4Minnu makoe ye hɛnkilimayɛ la, bonna-wɔli-kɛlɛnu tenbi anu takelela, anu si a fɔ ko, “Wo ni don bɔn la. 5Wo na fen-dɔn-tinɛ ka wo min. 6Ni wo bɔra kuntannu tɛma, wo si simayɛ sɔrɔn. Wo ni bila hɛnkilimaya-kilɛ fɛ.”
7Ni i ya mɔgɔ-wasinɛ latelen, a si diminya i ma. Ni i ya mɔgɔ-yogomɛ latelen, a si i tanban. 8I kana mɔgɔ-wasinɛ latelen bawo ila ko si gboya a ye. Kɔnɔ ni i ya hɛnkilimɛ latelen, a si i gbiliya. 9Ni i ya hɛnkilimɛ labila, a si do sa ala hɛnkilimayɛ kuma. Ni i ya mɔgɔ-telennɛ karan, ala karan ma si to kofula.
10 #
Yobu 28.28; Yaburi 111.10; Hɛnkilimaya-Kumɛnu 1.7 Hɛnkilima-tigiyɛ dabira-fɔlɛ le ka kilan Mari la. Ni i ya ale Sɛnima-Tigi lɔn, i si ko nya-yen. 11Hɛnkilimayɛ si do sa ila simayɛ kuma. 12Ni min ya hɛnkilimayɛ sɔrɔn, wo ara tɔnɛ sɔrɔn. Kɔnɔ ni min ya a kan-kɔ sɔ a la, wo ara bɔnɔ.
13Kuntanyɛ mani de iko musu-milibɛlɛ. A ye tola seren-serenna tuma-wo-tuma, ado a ma kolo fanan. 14-15A si a sigi ala dandan kɔrɔ. Min ba wuli tenbila, a si wo rakele. Kuntanyɛ si ta a sigi gbengbi do kuma soe tɛma. A ni don mɔgɛnu-takele rɔ minnu bi anu hayu rɔ iko musu-milibɛlɛ wo si a ma nya min. 16A kɛnɛna a fɔla kuntannu ma ko, “Wo na! 17Mɔgɛ ye yi min kankanna, wo di a halala-yi ko. Mɔgɛ ye dɔn-fan min kankanna, wo di a tanyininɛ ko!”
18Kɔnɔ mɔgɛ min bi bilala kuntanyɛ wo fɛ, a ma a lɔn ko a ye tala a nyɛrɛ si-matɛn-tinɛ wo la. A ma a lɔn fanan ko min bara ta nyɔ nun kɔrɔma la, wonu bara ta kanbɛ rɔ nun pon!
Kuranko Common Language Bible © The Bible Society in Sierra Leone, 2006.