Hɛnkilimaya-Kumɛnu 8
8
Hɛnkilimayɛta Matɔgɔ Koe
1-3 #
Hɛnkilimaya-Kumɛnu 1.20-21
Wo ye kan-bo-kan, wo ni wo tole masɔ.
Hɛnkilimayɛ ye wo rakelela.
Wo taranta kila la wo, wo taranta kɔnkɔ kuma wo,
wo taranta kiti-fɔ-tina wo, wo tole masɔnɛ ni to.
4A ko, “Hadama-dan min bɛɛsi ye dugu-kole kuma,
n bi wo damasi rakelela.
5Ni denniya-koe le i bolo ma, i fara wonu na.
I ni don kinaya-ko-ladan rɔ.
Ni i ye yuwaya-ko-ladan le la, i fara wo la.
I ni don hɛnkilimaya-ko-ladan rɔ.
6-7I tole masɔ nna kuma-hakikɛnu na.
N bi min bɛɛ fɔla i ye, tonyɛ le wonu na, ado anu bɛnta.
A ma di n ye, n ni n dɛ bila karagbɛlɛya-kumɛ rɔ.
8N ba kuma-wo-kuma fɔ, tonyɛ le wo la.
Hali foninya kelen, a basanni ma a la.
9Nna kumɛ kɛnu, hɛnkilimɛnu denu bi anu kɔrɛ lɔnna.
Minnu bara karan, wonu denu bi nna kumɛ kɛnu lɔnna tonyɛ la.
10Yanni wo ni sɛnɛ anubɛ wodi-gbɛ bi, wo ni nta karan bi.
11Nde hɛnkilimayɛ tenbira dugu-kɔrɔ-nɔnfuli la.
I ye fan min nyinina duninya-latɛgɛ kɛ rɔ,
nde tenbira wo dama la tɛrr!
12“Nde hɛnkilimayɛ, ko-kɔrɔ-lɔn ye nde le tɔ.
Karan ye nde le tɔ.
Ka ko latɛgɛ n nyɛrɛ ma, wo fanan bi nde le tɔ.
13Ni i ko i ni Mari gbiliya, fɔ i ni i ban ko-yogomɛ la.
Wasinteyɛ anubɛ foninya-fɔɛ anubɛ ko-yogoma-kɛ,
wonu ma di nde ye.
14Kɔnɔ miriya-nyimɛ anubɛ hɛnkilimayɛ ye nde bolo,
ado n sɛnbɛ kolo de!
15N bi mansɛnu anubɛ kun-tiginu dɛnbɛna ka kun-tigiya-nyimɛ kɛ.
16Kun-tigi-telennɛ min bɛɛ ye duninya rɔ,
anu makoe ye nde leta dɛnbɛnɛ la.
17Ni min ya n keni, wo tigi si diya n ye.
Ni min ya n nyini, wo tigi si n yen.
18N si a ma, mɔgɛnu ni gbiliyɛ anubɛ fen-kolomɛnu sɔrɔn.
Nde si anu nasabati ka nɔnfuli di anu ma.
19Mɔgɛnu bi tɔnɛ min sɔrɔnna nde rɔ,
wo tenbira sɛnɛ anubɛ wodi-gbɛ la.
20N bi tagamana telenbagɛnuna kilɛ le fɛ.
N bi lafisaya-kilɛ le ma.
21N di mɔgɛ minnu ye,
n si wonuna bɔnnu nafa fen-kolomɛnu anubɛ nɔnfuli la.
22-23 #
Lankɛnimayɛ 3.14
“Yanni duninya da ni bira, nde, hɛnkilimayɛ ye nyɔ nun.
Yanni Mari ni duninya dan tumɛ min, a ya nde, hɛnkilimayɛ ma dali-fen-kunyɛ la.
24Yanni kɔgɔ-yi anubɛ tenke ni sa anu worɔn la,
n bi nyɔ nun.
25Yanni kɔnkɛnu ni dan duninya rɔ,
wo ya a taran, n bi nyɔ nun.
26Yanni Alla ni dugu-kole kɛ ladan, hali a bolo-fa-kelan bɔnkɛ la,
wo la ma dan n kɔma.
27Alla ye san-kole rafulenna kɔgɔ-yi kuma tumɛ min,
n bi nyɔ nun.
28A ya banda-finyɛ sa san-kole ma n yala le.
Yinu tugura a rɔ n yala le ka ma kɔgɔ-yi la.
29Alla ya kɔgɔ-yi-dan sa n yala le.
Alla ya duninya kurukɛ n yala le.
30A ye kɛ damasi ladanna tumɛ min, n bi a fɛ iko boloma-wɔli-kɛlɛ.
A sewanɛ n na tuma-wo-tuma.
Nde bɛrɛni sewanɛ a la wo nya na le.
31Duninya ladanta nya min, n nyagalenta wo la.
N nyagalenta hadama-dannuna dan-bole la fanan.
32“Kɔnɔ fonikenu, wo ni wo tole masɔ n na kaka.
Ni wo ya nna kumɛ bira, wo si sewa.
33N bara wo karan min na, wo ni to wo mirila wo ma.
Wo kana wo ban nde, hɛnkilimayɛ la.
34Mɔgɛ min si to nala tuma-wo-tuma ka a tole masɔ n na, wo tigi si sewa.
Wo si to n makɔnɔna ka a yɛ bɛn kilɛ ma.
35Mɔgɛ min si to n nyinina tuma-wo-tuma, wo le ye simayɛ sɔrɔnna,
ado a wara-koe si Mari hɛnɛ.
36Kɔnɔ mɔgɛ min sa sɔnna n nyinina,
wo ara a nyɛrɛ tanban, ado a ara sayɛ keni.”
Kuranko Common Language Bible © The Bible Society in Sierra Leone, 2006.