Hɛnkilimaya-Kumɛnu 10
10
Mansa Silamɛnita Hɛnkilimaya-Kumɛnu
1Den-hɛnkilimɛ si a ma, a sɔrɔnbagɛnu ni sewa
kɔnɔ den-hɛnkilibɔnɛ si a ma, a sɔrɔnbagɛnu yisi ma ni gboya.
2Mɔgɔ ye nɔnfuli minnu sɔrɔnna kensunyɛ rɔ, wo ti a munanfaga
kɔnɔ ko-latelennɛ si mɔgɛ matanka siyi-matɛn ma.
3Mari ti sɔn mɔgɔ-telennɛ ni ki-a-la
kɔnɔ mɔgɔ-yogomɛ ye nyinina min ma, a si a ma, wo ti wo sɔrɔn.
4Tinyabagayɛ si bolo-kolonyɛ lana mɔgɛ kuma
kɔnɔ sɛbɛ-don-belebele si mɔgɛ ma fen na.
5Min bi ala dɔn-fan kundɛnna dɔn-fen-tɛgɛ-wati la, hɛnkilimɛ le wo la.
Kɔnɔ min ti sɔn atɛ tɛgɛ-koe ma fɔ ka kinɔgɔ, yuwɛ le wo la. A ara milibɛlitaya-koe le ladan wo la.
6Mɔgɔ-nyimɛ si duwɛ sɔrɔn
kɔnɔ mɔgɔ-karagbɛlɛ si belenna karagbɛlɛya-kumɛnu fɔla.
7Mɔgɔ-nyimɛnu tɔgɛ si ta wuu!
Kɔnɔ mɔgɔ-karagbɛlɛnu tɔgɔ si tunu yen!
8Hɛnkili ye mɔgɛ min bolo, wo si makawandili-kuma-nyimɛnu bira.
Kɔnɔ min bi kuntanya-kumɛnu fɔla, wo si to fu!
9Minnu natelennɛ, wonu nafɛrɛni de!
Kɔnɔ minnu natelenni ma, wonu si bira mɔrɔtɔ!
10Minnu bi anu yɛ makerila foninyɛ kuma, wonu si nanparan lana anu na-kelen-nyɔgɛnu kuma,
ado minnu bi kuntanya-kumɛnu fɔla, wonu si kasara.
11Mɔgɔ-nyimɛnu darɔ-kan si ma niyi-tenke la,
kɔnɔ karagbɛlɛya-kumɛnu si to bɔla mɔgɔ-yogomɛ dɛ rɔ.
12 #
Yemesi 5.20; 1 Pita 4.8 Gboyanayɛ si bɛnbɛlitayɛ lawuli
kɔnɔ keninteyɛ si ko-yogomɛ damasi yamatogon.
13Hɛnkilimaya-kumɛ ye hɛnkilimɛnu denu da rɔ
kɔnɔ bosɛ ye hɛnkilibɔnɛnu kan ma.
14Hɛnkilimɛ si to lɔnnɛ ladɛnna a kunyɛ rɔ
kɔnɔ kasarɛ ti mɛ bɔla hɛnkilibɔnɛla kumɛ fɛ.
15Nɔnfuli si fen-tigi kandan
kɔnɔ bolo-kolonyɛ si bolo-kolɔn kasara.
16Ko-nyima-kɛ-sarɛ le simayɛ la
kɔnɔ ko-yogoma-kɛ-sarɛ si na tɔrɔyɛ la.
17Minnu si sɔn anu natelennɛnu bolo, wonu siyi-fɛ si yanya.
Kɔnɔ minnu ti anu nyɛrɛla ko-tinya-gba yen makawandilɛ bolo, wonubɛ gbalo ti fara.
18Mɔgɔ-wo-mɔgɔ min si a ta-nyɔgɛla koninteyɛ sigi a burɔ, foninya-fɔlɛ le wo tigi la,
ado mɔgɔ-wo-mɔgɔ min si a ta-nyɔgɛ tɔgɔ tinya, yuwɛ le wo la.
19Kuma-pɔrɔtɔ-parata-fɔɛ si mɔgɛ don hakɛ rɔ
kɔnɔ ni min kunta a dɛ ma, hɛnkilimɛ le wo la.
20Mɔgɔ-nyimɛta kumɛ mani de iko wodi-gbɛ
kɔnɔ tɔnɔ sa mɔgɔ-karagbɛlɛ-miriya la.
21Mɔgɔ-nyimɛta kumɛnu si tɔnɛ di mɔgɛnu ma
kɔnɔ kun-takolɔnnu-tɔgɔ si to anuna kuntanyɛ la.
22Marita duwɛ, wo le kelen pe si mɔgɛ ma nɔnfulu-tigi la,
ado mɔgɔ ti ke fen sala wo kuma a nyɛrɛta sɛnbɛ la.
23Kuntan si nyagalen ko-yogoma-kɛ-tinɛ nya min,
hɛnkilimɛ fanan si nyagalen hɛnkilimayɛ la wo nya na le.
24Mɔgɔ-telennɛ nyinita fenfen ma, fɔ a wa wo sɔrɔn
kɔnɔ mɔgɔ-karagbɛlɛ kilanta fenfen na, wo le ye a birala.
25Gbɛlɛyɛ si ta karagbɛlɛnu na iko fɔnyɔ si ta fen-gbalɛnu na nya min
kɔnɔ mɔgɔ-latelenni-banbannɛ si to iko fara-kole.
26I kana tinya-mansɛ sɔ ila wɔlɛ la.
Ni i ya wo ma, a si i tɔrɔ iko i wa kotuli sa i nagan ma.
A si ma fanan iko ta-sisi tenbi i yɛ la.
27Ni i ya Marila kumɛ bira, i si simayɛ sɔrɔn
kɔnɔ karagbɛlɛ si faga yanni ala wati ni ban.
28Yigi min bi mɔgɔ-telennɛnu ma, wo le nyagalan la
kɔnɔ yigi sa karagbɛlɛnu ma muk!
29Mari si mɔgɔ-telennɛnu natanka
kɔnɔ minnu bi ko-yogomɛ kɛla, a si wonu kasara.
30Mɔgɔ-telennɛnu yisi-kimanɛ lafɛrɛ rɔ
kɔnɔ karagbɛlɛnu ti simayɛ sɔrɔn dugu-kole kɛ kuma.
31Mɔgɔ-telennɛnu si hɛnkilimaya-kumɛ fɔ
kɔnɔ karagbɛlɛnu nagan si wurun a dɛ rɔ.
32Mɔgɔ-telennɛnu ti mɔgɔ-gboyana-kuma fɔ
kɔnɔ karagbɛlɛnu darɔ-kan ti bɛn mɔgɛnu ma.
Kuranko Common Language Bible © The Bible Society in Sierra Leone, 2006.