Hɛnkilimaya-Kumɛnu 7
7
1Nna den, n bara min fɔ i ye, i kana nyina wo ko. 2Ni i ya a ma iko n bara a fɔ i ye nya min, i siyi-fɛ si yanya. I ni a ma i fɛrɛma. I ni nna kumɛnu bira iko i si i yɛ fɛ-bira nya min. 3Nna karan-lamaranɛ ni to i yisi rɔ tuma-wo-tuma. Anu fɛ kana yanya i la. 4I ni hɛnkilimayɛ bira iko i tirisan-musi. I ni ko-kɔrɔ-lɔn ma i na-kelen-nyɔgɛ la. 5Wonu si i tanka kei-gbɛrɛla musila darɔ-diyɛ ma.
Musu-Yɛlan Wara-Koe
6Lun kelen, n ya n yɛ labɔ nna bon-wundan la. 7-9A la ara wuli finna, n ya kemini-mɛsɛ do yen min kun-takolɔn a ta-nyɔgɛnu tɛma. A ye tala soe tɔnkɔn do rɔ musi dola bɔn magbenna.
10Musi wo bɔra ka a taran luyi ma. Musi wo makirinɛ ala yɛlɛnya-fanɛnu na. A ya keminɛ wola nyinɛ dabira. 11Musi wo yɛ ragbalata, ado a milibɛlɛ. A ti sigi a warɛ. 12A si keminɛnu makɔni kila-farannu anubɛ fere mayira tinɛnu anubɛ barɛnu tɔ. 13A ya a bole sa keminɛ wo kan ma ka a sunbu tagbayi! A ban a sunbula, a ya a yɛ tɛgɛ a kɔrɔ keminɛ wo mafɛlɛn tinɛ ka a fɔ a ye ko, 14“N bara nna yisi-kima-sarakɛ bɔ bi. A sogo-toe ye n bolo bɔn la. 15N bi i nyinɛ le kun na nun, mala da-kunyɛ ara na bɛn yan le gben! 16Iyipiti-kura-hakikɛ min bi n bolo, n bara wo rasa nna sa-fan rɔ. 17N bara sɛnti-subolo sawa purupuru nyɔ ma. 18-20Nna kei ara wodi-siyaman bi ka ta tagama rɔ. A ti na fɔɔ lɔgɔkun fila wa tenbi. Woletɔ na, ma ni ta ma sa nyɔ. Ma ni ki diyɛ-kolo-bɔla kudu, ha sɔgɔma.”
21A ya keminɛ wo bolo labira ala darɔ-diyɛ la. 22A ma mɛ lefan, keminɛ wo kungban-kungban bilara a fɛ iko ninki-tigi tenbi tala ala ninki la a faga tinɛ. Keminɛ wo ye tala yɔlɔn-yɔlɔn iko mina tenbi tala a kunyɛ ladonna kan-birɛ la. 23Anu bi a taranna nyɔ rɔ ka a sɔn-kole sɔgɔ kalabɛn la. A manɛ le fanan iko kona ye tala birala kose la nya min bawo a ma a lɔn ko a ye nala fagala nyɔ le.
24Nna dannu, wo ni wo tole masɔ. N bi nala min fɔla wo ye, wo ni wo tole masɔ wo la. 25Wo kana sɔn, musu-sufa wo wara-koe ni banban wo yisi rɔ. Wo kana wola kila-nyimɛnu boloka ka kilɛ bira min bi tala ale warɛ. 26Kei minnu bara kasara nyɔ rɔ, mɔgɔ ti wonu dan lɔn. 27Ala bɔnna-kilɛ si ma kila-wɛ la ka ta kanbɛ rɔ.
Kuranko Common Language Bible © The Bible Society in Sierra Leone, 2006.