Hɛnkilimaya-Kumɛnu 6
6
Makawandili Donu
1nna den, ni i wara i nyɛrɛ ma yili-bolomɛ la, 2wo si a ma, i ni bira gbɛrɛ la i nyɛrɛta kumɛ fɛ. 3Ni a sɔgɛ ye ile la ko i ni bɔ mɔgɔ-sufa wo sɛnbɛ kɔrɔ fɔ i ni kɛnu ma. I buri tala a wara tiriya ka a madiya alako a ni i to nyɔ. 4I ni a ma tiriya! I kana i sa hali ka i sulen. 5I ni i buri gbɛrɛ wo kɔrɔ iko sensɛ si a buri donse kɔrɔ nya min. I ni i buri a kɔrɔ iko kona si a gban a biralɛ kɔrɔ nya min.
6Ile tinya-mansɛ, ta mɛnɛ-mɛnɛnɛnu mafɛlɛn anu bi wɔlila nya min. 7Kun-tigi sa anu bolo anubɛ mansɛ 8kɔnɔ dɔn-fen-tɛgɛlɛnu tenbi anu na, anu bi sinan sigila.
9Tinya-mansɛ si telen sani ala sa-fan rɔ ha wurɛ la. 10#Hɛnkilimaya-Kumɛnu 24.33-34 A tenbi a sala, a si a fɔ ko, “N bi n sala le alako n ni n tasagan doni.” 11A tenbi kinɔgɛ wo rɔ, bolo-kolonyɛ si bui a ma iko kankan-fenkɛri-tigi si ta bui fen-tigi ma nya min.
12Tanyinibɛlɛnu bi belenna foninyɛ fɔla kan-bo-kan. 13Anu si kuma anu yɛ anubɛ anu bole la alako ka to mɔgɛnu yanfala 14kɔnɔ anu miri bɛnnɛ ko-yogomɛ le ma tuma-wo-tuma. Anu bi kɛlɛ tɛgɛla kan tinɛ bɛɛ rɔ. 15Ka a tɛgɛ anu sɔn wo ma, kasarɛ si anu natɛrɛna ka anu tinya pɔ! Anu bi dumɛ minnu sɔrɔnna wo rɔ, wo le ye anu fagala.
16-19Ko-yogoma wɔrɔnfila ye nyɔ Mari ti ke a munyuna minnu kɔrɔ,
1. wasinteyɛ
2. foninya-fɔɛ
3. mɔgɔ-fagɛ min ma ko tinya
4. minnu miriya bɛnnɛ ko-yogomɛ ma tolon
5. minnu nakala ko-yogomɛ ma tinɛ
6. sereyɛ minnu bi foninyɛnu sala anu nyɔgɔn kuma
7. nafigi minnu bi na-kelen-nyɔgɛnu kunyɛ tugula anu nyɔgɔn na.
Yɛlɛnya-Ko-Makawandilɛ
20nna den, i ni i fa anubɛ i nala kumɛ mara i yisi rɔ gben! 21Anu ni ma kan-na-fan la i bolo. 22I tenbi tagama rɔ, karan wo si i sɔ kilɛ ma. I tenbi sani, a si i kandan. I tenbi i yala, a si to i kawandila. 23Anuna kumɛ si waan raka i ma waran! Anuna karan si ma i ye iko kuru-lɛnpu. Anuna makumɛ wo si i kɛ-nya latelen. 24Ni i ya anuna kumɛ bira, wo si a ma, i ti i gbɛrɛn musu-yɛlannu ma hali ka i bole tugu mɔgɔna-musi la anuna darɔ-diyɛla ko la. 25Hali yɛlannu kinyara ka a dan-natenbi, anuna kinyɛ kana i bole labira. Anu bi anu yɛ min tɛgɛla a kɔrɔ, wonu kana i bole labira. 26Yɛlan si i wara-koe lafɛya iko biredi-sɔnkɛ, ado mɔgɔ-gbɛrɛla musi si i lapɛrɛn ha a ni i niyi lato a rɔ. 27Ni mɔgɔ ya ta-wɔlɔn sa a kɔgɔ dɛ ma, ala duruki ti mintan, wa? 28Mɔgɔ si tagama ta-wɔlɔn rɔ, ni a kian ma mintan? 29Ni masiba-koe le wo la i yala, nba, ka i sa kei-gbɛrɛla musi fɛ, masiba-koe le wo fanan na. Mɔgɔ-wo-mɔgɔ ya wo ma, fɔ a wa tɔrɔya.
30Ni kɔnkɔtoe ya dɔn-fan kankan, mɔgɛnu ti a ta-a-la bɛrɛkɛ! 31Kɔnɔ ni anu ya a bira kankanyɛ la fɔ a wa a nyɔgɔ lasɛgi iko wɔrɔnfila. Fan min bɛɛsi ye a bolo, a si bɔnɔ wo damasi rɔ. 32Kɔnɔ kei min bi yɛlɛnyɛ kɛla, kankan fisa wo ko bawo ale hɛnkili mumɛ sa nyɔ rɔ. A ti ko-wo-ko sɔrɔn fɔ nyɛrɛ-kasarɛ. 33Anu si a lamiliya ka a gbesi-wulen-bɛ-kɛ. A si to yarabiyi bolo kɔgɔrɔyɔlɔ! 34Diminya-wo-diminya ti tenbi ala kei-kelitɛ la, ado a tayili-sarɛ dan sa. 35Hali i ya wodi fenfen di a ma a madiya-fenyɛ la, a yisi ti sa.
Kuranko Common Language Bible © The Bible Society in Sierra Leone, 2006.