Hɛnkilimaya-Kumɛnu 5
5
Yɛlɛnya-Ko-Makawandilɛ
1nna den, i tole masɔ ka i miri nta hɛnkilimaya-kumɛ kɔrɛ ma. 2Ni i ya wo ma, i si kusanya i nyɛrɛ birala. I kuma-nya si a yira ko i wara a nya-lɔn.
3Tumado, kei-gbɛrɛla musi da-gbole si diya i ye iko liyi, ado ala kuma-diyamɛnu si i bolo labira 4kɔnɔ tɔ-a-la, a si a lakunaya i kuma iko kotuli ka i sanba dumɛ la. 5A si i bi ka i layigi kanbɛ rɔ. A si i telen nyahanama-kilɛ la. 6Musi wo sa tagamana simayɛta kilɛ fɛ, ado a ma a lɔn ko a tagama-nya ma telen.
7Nna dannu, wo ni wo tole masɔ n na. Wo kana nyina nna kumɛnu ko. 8Wo ni wo masɛgi musu-sufa wonu na. Wo kana wo gbɛrɛn anuna bonda-dɛ ma. 9Ni wo ya wo tui ka ta nyɔ, wo ye gbiliyɛ min tɔ nun, wo si to wo ta-nyɔgɛnu ye. Ni wo ma, kinikinibɛlɛnu si wo pose faga. 10Wo tɔrɔ-gbɛnu si to sundannu ye, ado wo si to wɔli-gbɛlɛmɛ kɛla Alla-batobɛlɛnuna bɔn la. 11Sayɛ wa gbɛrɛn wo ma, wo si to kurunna ha wo ni faga. Wo si bara kirayɛ bolo. 12Wo si to a fɔla wo nyɛrɛ ma ko, “Nfenna n ma hɛnkili sɔrɔn yona? Nfenna n ma n tole masɔ mɔgɛnu na? 13N ma sɔn n tole masɔla n karan-mɔgɔ la. N ya n tengberenya n makawandilɛnu na. 14A ara to se, n tatinyanɛ ni taran mɔgɛ bɛɛ tɛma.”
15I ni i latelen ila musi ye ka a keni. 16I kana musu-gbɛrɛkɛ latenbi i kɔma. Wobɛ musu-gbɛrɛkɛ kana diya. 17Diyanayɛ min bi wobɛ ila musi tɛma, wo ni to wo mɔgɔ fila tɛma. I kana wo ratala anubɛ musu-gbɛrɛkɛ tɛma. 18Woletɔ a fisa, i dennɛ ye musi min furula, wobɛ wo ni to sewɛ rɔ. 19Ila musi wo ni kinya i yala iko mina. A wara-koe ni i hɛnɛ. I ni to ala keninteyɛ kɔrɔ iko birinkan. 20nna den, nfenna i si ila keninteyɛ yira musu-gbɛrɛkɛ la ka ila musi to nyɔ? I kana mɔgɔ-gbɛrɛla musi bira a bole ma.
21I ya ko-wo-ko ladan, Mari kolan bɛnnɛ i ma, yɔ! I tara kan-bo-kan, a ye i mafɛlɛnna. 22Ko-yogomɛ si ma gbɛrɛ la ko-yogoma-kɛlɛ ye, ado a si bira a halala gbɛrɛ-lasiginɛ wo la, yɔ! 23A ye fagala bawo a ma sɔn a nyɛrɛ marala. Ata kuntanya-hakɛ si a latuntun kanbɛ rɔ.
Kuranko Common Language Bible © The Bible Society in Sierra Leone, 2006.