Hɛnkilimaya-Kumɛnu 4
4
Hɛnkilimaya-Tɔnɛ Wara-Koe
1Nna dannu, wo ni wo fala karan bira. Ni wo tora wo mala, wo si ko nya-yen, 2ado n bi karan-nyimɛ dila wo ma, woletɔ wo ni to wo mirila kumɛ wo dama ma. 3N den-nɛ wati min, nde le kelen pe ye den-kei la n sɔrɔnnɛnu bolo. 4N fa wa wuli n makawandila nun, a si a fɔ n ye le ko, “I hɛnkili to nna kumɛnu ko ka anu bira. Ni i ya a bira iko n bara a fɔ i ye nya min, i si simayɛ sɔrɔn. 5I si hɛnkilimayɛ anubɛ ko-kɔrɔ-lɔn sɔrɔn. N bara min fɔ i ye, i kana nyina wo ko ka i kan-kɔ sɔ a la. 6Ni i ya hɛnkilimayɛ bira, a si i latanka. I wa a keni, a si i kandan. 7Hɛnkilimayɛ kolo koe bɛɛsi ko woletɔ i ni i raya ha ka a kɔrɛ lɔn. 8Hɛnkilimayɛ keni, a si i ma tɔgɔ-tigi la. I ni a bira gbuturu! Wo si a ma, mɔgɛnu ni i gbiliya. 9Ita gbiliyɛ si ma iko mansɛtɛ. A si ma mansaya-fulɛ la i kuma.”
10nna den, i tole masɔ n na. Ni i ya i sɛbɛ don, i siyi-fɛ si yanya. 11N bi hɛnkilimaya-kilɛ anubɛ telenbagayɛ le yirala i la kɛ la, i si bila min fɛ. 12Ni i ye tagamana hɛnkilimayɛ rɔ, fenfen ti taran nyɔ min si kilɛ tɛgɛ i ma. Hali i ye i burila, i ti tɔnbɔn i kin kun na ka bui. 13I wara minnu karan kɔrɔma la, i ni to i mirila wonu ma. I niyi-kole le ila karan la. 14I kana bila setani-mɔgɛnu fɛ ka anuna misalɛ bi. 15Karagbɛlɛyɛ masangba, i kana bila a rɔ. I ni i ban a la feufeu! I ni ta i ta tinɛ. 16Ko-yogoma-kɛlɛnu ti anu sa fɔ anu ba ko-yogomɛ ma. Anu ti ke kinɔgɔla ni anu ma ko-yogomɛ ladan. 17Karagbɛlɛyɛ le manɛ anu de-nyini-fan la. Masiba-koe le manɛ anu min-kɛ-fan la.
18Kɔnɔ mɔgɔ-telennɛnuna telenbagayɛ si to koloyala iko teleta waan si to koloyala nya min ka a bi sɔgɔma ha tele-latelan. 19Mɔgɔ-yogomɛnuta kilɛ mani de iko pinpi. Ni anu buira, anu ti a lɔn anu ya anu kiannu natugu min na.
20nna den, i hɛnkili ni to nna kumɛ kɛnu ko. 21I kana sɔn, anu ni anu sɔrɔn i la. To i mirila anu ma ka anu mara i yisi rɔ gben! 22Ni min ya kɛnu kɔrɛ lɔn, a si simayɛ anubɛ kɛndɛyɛ di wo tigi ma. 23A ma i fɛrɛma i miri tinɛ bawo tɔ-a-la, i miri-nya si ma i kɛ-nya la. 24I kana kuma-wo-kuma fɔ tonya sa min tɔ. I kana bila foninyɛ anubɛ yanfɛ rɔ. 25I yɛ sɔ telenbagaya-kilɛ la ka to a mafɛlɛnna sin! 26#Hiburunu 12.13 Ni i ya i telen a kin na ko ladan tinɛ, i ya ko-wo-ko ladan worɔ, wo si ma ko-nyimɛ la. 27I ni ko-yogoma-kilɛ masangba ka ta kila-telennɛ fɛ. Hali kin-fa-nya kelan, i kana a bɔ telenbagaya-kilɛ fɛ.
Kuranko Common Language Bible © The Bible Society in Sierra Leone, 2006.