Hɛnkilimaya-Kumɛnu 3
3
Makawandili-Kumɛnu Bira-Koe Fonikenu Bolo
1nna den, i kana nyina nna karan ko. I ni nna kumɛnu namara i yisi rɔ. 2Ni i ya nna kumɛ kɛnu bira, i siyi-fɛ si yanya, ado i si sabati fanani!
3I kana i bɔ keninteyɛ rɔ, wo kɔma, i kana lanayɛ boloka. Wonu ni ma ila kan-na-fan la ka anu sɛbɛ i yisi rɔ. 4#Luka 2.52 Ni i ya wo ma, i wara-koe si Alla hɛnɛ anubɛ mɔgɛnu.
5I ni la Mari la i yisi bɛɛ la. I kana la i nyɛrɛta hɛnkili la. 6I ye ko-wo-ko mala, i ni Mari fɔlɔn gbiliya, woletɔ a si kila-telennɛ yira i la. 7#Romu 12.16 I kana to i mirila ko i kelan le ya ko lɔn. Mari kelen peta kumɛ bira tun. I ni i ban ko-yogomɛ kɛla. 8Ni i ya wo ma, a si ma i bolo iko bɛsɛ min si tɛlɛ dandan ka i kolenu tagbɛlɛya.
9I ni to kɔ-fen-nyimɛnu bila ila sɛni-hakikɛ rɔ ka Mari gbiliya wonu na. 10Ni i ya wo ma, ila fen namara tinɛnu na si fa, ado i si minni-fan sɔrɔn ha a ni tagbaya i ma.
11 #
Yobu 5.17
nna den, Mari tenbi i latelenna tumɛ min, i ni i tole masɔ a la a kin na! I ni a lɔn ko a ye i makawandila le hali i ma i ban a la 12#Hiburunu 12.5-6 bawo mɔgɛ min di Mari ye, fɔ a wa wo latelen iko fa-nyimɛ si a diyana-dan latelen nya min. #Lankɛnimayɛ 3.19
13Mɔgɔ-sewanɛ le wo tigi la min bi mala hɛnkilimɛ anubɛ ko-lɔnnɛ la. 14Tɔnɛ ye hɛnkili-nyinɛ la ka tenbi wodi-nyinɛ la, ado a tenbira sɛnɛ-bɛrɛ fanan na. 15Mɔgɔ ti hɛnkili-nyinɛ sanka dugu-kɔrɔ-nɔnfulinu ma. I ye nyinina fan min bɛɛsi ma duninya kɛ rɔ, hɛnkilimayɛ tenbira wonu na pirr! 16Hɛnkilimayɛ si simayɛ anubɛ sabatiyi anubɛ gbiliyɛ di i ma. 17A si a ma, i niyi ra ni diya ka yisi-kimɛ di i ma i siyi-tele-bɛɛ kɔrɔ. 18Minnu bara ma hɛnkilimɛnu na, wonu bara sewa. Ni minnu ya wo sɔrɔn, a si simayɛ di wo tigi ma.
19Mari ya dugu-kole kɛ dan hɛnkilimayɛ le tɔ.
A ya san-kole sa a sa-tinɛ ata lɔnnɛ rɔ.
20Ata hɛnkili-wɛ le ya a ma, bɛnu sara anu worɔn la.
Wo le ye a mala fanan, san-kole ye bandɛ layigila dugi ma.
21nna den, hɛnkilimayɛ anubɛ ko-kɔrɔ-lɔn bira i bolo filɛ la. I kana sɔn, anu ni anu purukulu i bolo mumɛ! 22A si wasinteyɛ anubɛ sewɛ di i ma iko kan-na-fan si mɔgɛ lakinya nya min. 23Wo si a ma, i tara kan-bo-kan, i ti nanparan sɔrɔn kilɛ la. Wo kɔma, i ti i kian latugu. 24I wa i sa suyi rɔ, i ti kilan. I si kinɔgɔ i fanbolo. 25Kasarɛ anubɛ yakɔrɔ-mamɔɛ min bi sigila karagbɛlɛnu ma, i ti kilan wonu na 26bawo Mari si i tanka alako i kian kana na bira gbɛrɛ la.
27Ni ko-nyimɛ kɛ-fɛrɛ ye i bolo, minnu makoe ye i la, i ni wo kɛ anu ye. 28Ni i sigi-nyɔgɛ dɛnbɛn-fɛrɛ taranta i ma, i ni a kɛ a ye. I kana a fɔ a ye ko, “Ta fɔlɔn, sina i ni na.”
29I kana ko-yogomɛ miri i sigi-nyɔgɛ ye, wobɛ min siginɛ, ado a lanɛ i la. 30Ni min ma baga i ma, wobɛ wo kana sɔnkɔ. 31I kana karagbɛlɛnu makeliya anuna karagbɛlɛyɛla ko la, ado i kana na ma iko anu denu 32bawo wunduyogenu sɔgɔ labɔnɛ Mari la lasi! Kɔnɔ a si a gbundi yira mɔgɔ-telennɛnu na.
33Mari si dankɛ ladon karagbɛlɛnuna bɔn la kɔnɔ a si duwɛ layigi mɔgɔ-telennɛnu barɛ. 34#Yemesi 4.6; 1 Pita 5.5 A mako sa mɔgɔ-wasinɛnu na kɔnɔ a si ata kɛ-nya-nyimɛnu yira mɔgɔ-famayiginɛnu na. 35Hɛnkilimɛnu si tɔgɔ-nyimɛ sɔrɔn kɔnɔ a si to yarabiyi sala hɛnkilibɔnɛnuna hɛnkilibɔninyɛ kuma.
Kuranko Common Language Bible © The Bible Society in Sierra Leone, 2006.