Hɛnkilimaya-Kumɛnu 30
30
Ekurita Hɛnkilimaya-Kumɛ Fɔ Koe
1Yekala den Ekuri le ya kumɛ kɛ fɔ Itiyɛli anubɛ Yukali ye, a ko,
2“N hɛnkili mani ma iko mɔgɛnutɛ. A mani de iko sogenutɛ.
3N ma hɛnkilimaya-ko lɔn. Hali Alla wara-koe, n ma a lɔn.
4Kɔnɔ mɔgɔ yon bara yɛlɛ Arinyɛni tɔ ka sɛgi tun?
Mɔgɛ yon bara ke a bole lagburula fɔnyɔ ma?
Mɔgɛ yon bara ke kɔgɔ-yi-mumɛ bɛɛsi kɛla ala duruki rɔ ka ala duruki lagburu a ma?
Mɔgɛ yon bara dugu-kole dan sa?
Mɔgɛ kɛ anubɛ ala dan tɔgɛ ye kama?
Ni min ya wonu tɔgɔ lɔn, i ni anu tɔgɔ ratɛgɛ n ye.
5“Allata kumɛ bɛɛsi sɛninyani de! Fɛɛ sa anu na. A si ma tanka iko nɛgɛ-walan si kɛlɛ-kurugbɛ latanka nya min. 6Mɔgɔ kana fen sa Allata kumɛ kuma. Ni min ya wo ma, a si wo makuma, ado mɔgɛnu si tɛgɛ a rɔ.”
Hɛnkilimaya-Kumɛ Donu
7“E, Alla, n si i matara ko filala ko ma. Yanni n ni faga, i ni wonu kɛ n ye. 8A fɔlɔtɛ, n nabɔ foninya-fɔɛ dafɛ pon! A fila nyɔgɛ, n kana ma fugarɛ la, ado n kana ma bana la fanan. Alako tun, nde ya n beli-koe sɔrɔn. 9Bawo ni n mara fugarɛ la, tumado, n si kankanyɛ kɛ ka ma ile lafɛya-koe la. Ado nfan, ni n mara bana la fanan, tumado, n si a fɔ ko n mako sa ile Alla la.”
10Mɔgɔ kana wɔli-kɛlɛ ratinya ala kun-tigi ye. I si dankalɛ sɔrɔn, ado wo kɔma, i si tɔrɔyɛ sɔrɔn.
11Mɔgɛ donu bi nyɔ, wonu bi anu fanu mɔɛnna, katarala anu nanu ma.
12Mɔgɛ donu fanan bi nyɔ, anu ya a lɔn ko anu nyɛrɛ sɛninyani de kɔnɔ yaga, anu kɔsɔnɛ lass!
13Mɔgɛ donu fanan bi nyɔ, wonuna wasinteyɛ le gbuyɛ sanɛ anu yakɔrɛ ma.
14Mɔgɛ donu fanan bi nyɔ, wonuna wɔli ma fenfen na fɔ ka bolo-kolɔnnu kensunya. Anu bi belenna buila anu ma iko sogo-feremɛnu.
15Den-sunkurun fila ye nuguri bolo. Kelan tɔgɔ le, “N kɔ.” Doi wo fanan tɔgɔ le, “N kɔ.”
A ye wo nya le fanan, fen nani bi nyɔ, wonu ti wasa.
16A fɔlɔtɛ le kanbɛ la.
A fila nyɔgɛ le gbandɛ la.
A sawa nyɔgɛ le dugu-gbalanɛ la. Wo ti wasa yi-koe rɔ.
A nani nyɔgɛ le tɛ la. Wo fanan ti wasa habadan!
17Mɔgɛ min bi a na anubɛ a fa bɔrɔbɔla, a bɛnta, a furi-bolokanɛ ni to. Mansa-wala-kona anubɛ dogɛnu ni a furi dɔn.
18Ko nani bi nyɔ min makawara, ado anu kɔrɛ-lɔn-koe gbɛlɛ.
19A fɔlɔtɛ le kokɛ la. Wo si firifiri san ma nya min, n kawanɛ wo ma.
A fila nyɔgɛ le duguma-fan la. Wo si tagama farɛ ma nya min, n kawanɛ wo fanan ma.
A sawa nyɔgɛ le kulɔn la. Wo fanan si ta kɔgɔ-yi kuma nya min, n kawanɛ wo ma.
A nani nyɔgɛ le kei anubɛ musi la. Wonu si diya nya min, n kawanɛ wo fanan ma.
20Koe do ye nyɔ fanan min makawara iko musu-yɛlan si ta yɛlɛnya-kɛ-tinɛ nya min. A ban fen-dɔn-kɛla ka a dɛ mafiran, wo kɔma, a si a fɔ ko, “Nde ya nfen tinya?”
21Ko nani fanan bi nyɔ min gbɛlɛ duninya kɛ rɔ. Mɔgɛ ti ke munyuna wonu kɔrɔ.
22A fɔlɔtɛ, ni yɔɔn mara mansɛ la, wo gbɛlɛ.
A fila nyɔgɛ, ni kun-takolɔn ya a beli-koe bɛɛsi sɔrɔn, wo fanan gbɛlɛ.
23A sawa nyɔgɛ, musi min sɔn ma kin, ni wo tara kei-wara-sigi rɔ, wo gbɛlɛ.
A nani nyɔgɛ, ni yɔɔn-musi sigira hɔrɛ kun na, wo fanan gbɛlɛ.
24Nima-fen nani bi nyɔ duninya rɔ, anu dɔgɔ kɔnɔ anu hɛnkili kolo.
25A fɔlɔtɛ le mɛnɛ-mɛnɛnɛnu na. Anu ta ma gbɛlɛ kɔnɔ anu si anu yigi sigi dɔn-fen-tɛgɛ-wati le la.
26A fila nyɔgɛ le kɔnkɔbarɛnu na. Anu dɔgɔ kɔnɔ anu barɛ le fara-woe la.
27A sawa nyɔgɛ le kondɔnnu na. Mansa sa anu kun na kɔnɔ anu damasi ye anu gbere kelen de ma.
28A nani nyɔgɛ, wo le dandanma-yirɛ la. Hali basɛ min bira ma gbo, wo le si ta mansɛ warɛ bɔn la, tamayi sa a rɔ.
29Nima-fen nani ye nyɔ min tagama-nya mafɛlɛn di.
30A fɔlɔtɛ le yarɛ la. Sɛnbɛ ye a la sogenu tɛma ado a ti kilan fenfen na.
31A fila nyɔgɛ le dondɔn la, a tenbi kekela sisinu tɛma.
A sawa nyɔgɛ le baa-kɔrɔn la.
A nani nyɔgɛ le mansɛ la a tenbi ala kɛlɛ-dannu tɛma.
32Ni mɔgɛ ara kuntanya-koe ladan ka a nyɛrɛ kɔrɔbi ka ko-yogomɛ rabɛn mɔgɛ do kan ma, a fisa, a ni a bole burun a dɛ la. A kana fenfen fɔ.
33Ni i ya bɛniki-kuran ratugu boloko-yogomɛ-kɛ, a si yɛlɛma toɛ la. Ado ni i ya mɔgɛ tɔntɔn a sunyɛ rɔ, yele si bɔ. A ye wo nya fanan, ni mɔgɛ ya yisi-magboya-koe ladan, wo si kɛlɛ-nyɔgɔnyɛ lana.
Kuranko Common Language Bible © The Bible Society in Sierra Leone, 2006.