Hɛnkilimaya-Kumɛnu 29
29
1Mɔgɛ min ti sɔn a sɔn-boloka-koe ma hali anu bi a makawandila, mɔgɛ wo dɛnbɛn-kila ti taran, ado a si tinya pɔ!
2Ni mɔgɔ-latelennɛ ya tɔgɛ sɔrɔn, mɔgɛ bɛɛ si sewa. Kɔnɔ ni karagbɛlɛ ya tɔgɛ sɔrɔn, mɔgɛ bɛɛ si to kurunna tɔrɔyɛ bolo.
3Ni hɛnkilimayɛ diyara min ye, wo fa si sewa. Ni musu-yɛlan diyara min ye, wo wara-koe si a laban bolo-kolonyɛ ma.
4Ni ko-latelennɛ wara-koe diyara mansa-wo-mansa ye, wola nyamanɛ ra si gbɛlɛya. Kɔnɔ mansa-wo-mansa ya wodi keni, wola nyamanɛ si kasara pɔ!
5Mɔgɔ-wo-mɔgɔ si a da le fɔ a ta-nyɔgɛ ye, wo ye gbɛrɛ le lasigila a ta-nyɔgɛ ye wo la.
6Karagbɛlɛta ko-yogomɛ si ma gbɛrɛ la a nyɛrɛ ye kɔnɔ mɔgɔ-latelennɛ si to sewɛ rɔ.
7Telenbagɛ si mɔgɔ-tɔrɔnɛ dɛnbɛ kɔnɔ karagbɛlɛ ti ke ko-sufa wonu nya-yenna.
8Minnu si mɔgɛnu mayɛlɛn, wonu si soe bɛɛ yabasan. Kɔnɔ hɛnkilimɛ, wo si yisi-kimɛ lana soe burɔ.
9Ni hɛnkilimɛ tara kun-takolɔn la mɔgɔ-banu bara kiti tɛgɛ tinɛ, kun-takolɔn si to a mayɛlɛnna ka sɔnkɔ tɛgɛ. Wo si a ma, yisi-kimɛ ti taran anu tɛma.
10Mɔgɔ-latelennɛ ma di gbalo-salɛnu ye kɔnɔ mɔgɔ-latelennɛnu si wonu niyi lakisi.
11Kun-takolɔn yisi si bɔ perenkenden, kɔnɔ hɛnkilimɛ wo kusan a munyuna ka a yisi bira a rɔ.
12Ni kun-tigi ya a tole masɔ foninya-fɔlɛnu na, ala mɔgɔ-ba bɛɛ si ma wunduyogenu na.
13A mɔgɔ-tɔrɔla wo, a bolo-kolon wo, Mari le ya wonu bɛɛsi dan ka niyi bila anu filɛ bɛɛ rɔ.
14Ni mansɛ tora bolo-kolɔnnuna tonyɛ labɔla gbɛ rɔ, mansayɛ ti bɔ ala bɔn la.
15Bosɛ anubɛ makumɛ le si a ma, dan ni hɛnkili sɔrɔn kɔnɔ ni i ya a to a sako rɔ, wo si ma denbɛ-miliya-koe la.
16Mɔgɔ-yogomɛ wa tɔgɛ sɔrɔn, ko-yogomɛ si to siyayala kɔnɔ hali wo, mɔgɔ-latelennɛnu si karagbɛlɛnuna ban-bole yen.
17Ni i ya ila dan kolo, wo si a ma, i ni sewa, ado i yisi si kimɛ.
18Marita wɔlɔyiya-kumɛ sa minnu bolo, mɔgɛ wonu si murutiya. Kɔnɔ minnu bi Allala tɔn birala, wonu si duwɛ sɔrɔn.
19Kuma-gbansan ti wɔli-kɛlɛ labila. Tumado, a si ila kumɛ lamɔɛn kɔnɔ a ti a bira.
20Ni mɔgɔ-wo-mɔgɔ si kuma tiriya, yigi ye kun-takolɔn bolo ka tenbi wo tigi la.
21Mɔgɔla yɔɔn-pose tenbi, ni i yɛgɛ-yɛgɛra a kɔrɔ, tɔ-a-la, i ti ke a nɔla tun.
22Mɔgɛ min yisi latiri bɔla, a si tɔrɔyɛ anubɛ yakɔrɔ-mamɔɛ lana a nyɛrɛ kuma.
23Wasinteyɛ si mɔgɛ layigi kɔnɔ ni a ya a famayigi, a si gbiliyɛ sɔrɔn.
24 #
Saraka-Masɔlɛnuta Tɔnnu 5.1
Kankan bolo-labiralɛ yoge le a nyɛrɛ la bawo ni a ya tonyɛ fɔ, a si tɔrɔyɛ sɔrɔn. Ni a ma kuma-wo-kuma fɔ, a si dankɛ fanan sɔrɔn Alla bolo.
25 #
Aiseya 51.12
Mɔgɛ min bi kilanna mɔgɛ dɔrɔn na, wo si ma gbɛrɛ la a ye kɔnɔ ni a lara Mari la, wo si a latanka.
26Mɔgɔ-siyaman si ta diyanayɛ nyini tinɛ kun-tigi wara. Kɔnɔ ko-latelenni-bɛrɛ si nyini Mari dɔrɔn de bolo.
27Mɔgɔ-radunɛ ma di telenbagɛ ye, ado mɔgɔ-latelennɛ ma di mɔgɔ-radunɛ fanan ye.
Kuranko Common Language Bible © The Bible Society in Sierra Leone, 2006.