Hɛnkilimaya-Kumɛnu 31
31
Mansa Lɛmuwɛli Makawandi-Koe
1Mansa Lɛmuwɛli na ya karan minnu di a ma, wo le kɛnu na.
2A ko, “Nna den, n bara ile min dantɛgɛ Mari ma nun, 3i kana i to musinu ma. Wonu bara mansɛ minnu tabunden, wonu siya.
4“Nna den, a ma kin, mansɛnu ni baan min, ado baan-min-sɔgɛ kana anu bira. 5Ni mansɛ ya a min, a si nyina tɔnnu ko tiriya! Ala ko ti taran ala mɔgɛnu bara-ko rɔ ka telenbagaya-ko ladan makolamɛnu ye. 6Mɔgɛ min niyi ma ara dɔgɔya a rɔ anubɛ minnu bi tɔrɔyɛ rɔ, gbɛɛ-minyɛ bɛnta wonu denu denu ma. 7Anu ni anu min alako anu ni nyina anuna tɔrɔyɛnu ko.
8“Mɔgɛ minnu ti ke anu kuma-kuma fɔla, a fisa, ile mansɛ ni kuma wonu ye. 9I ni ma kiti-tɛgɛla-latelennɛ la ka bolo-kolɔnnu anubɛ makolamɛnu dɛnbɛ.”
Musu-Nyimɛ Wara-Koe
10Ka musu-hakikɛ sɔrɔn, wo gbɛlɛ de!
Kɔnɔ ni i bole bɛnta a la, a tenbira dugu-kɔrɔ-nɔnfuli la.
11Ala kei si la a la,
ado ala kei ye nyinina fan min bɛɛsi ma, a ara wonu sɔrɔn.
12A siyi-tele-mumɛ-bɛɛ kɔrɔ, a si ko-nyimɛ le gbansan ma ala kei ye.
A ti ko-yogoma ma a la mumɛ!
13Tuma-wo-tuma, a ye kura-hakika-dan le la. A ti bandan boloma-wɔlɛ la.
14A si na dɔn-fan la iko yila-kulɔn ka bɔ wula-yan la.
15A si a lasɔ banda-ka-da-pinpi ma ka wɔlɛ yira ala yɔɔn-musinu na ka dɔn-fan rabɛn bonna-mɔgɛnu ye.
16A si a yɛ lakalan ka dugu-hakikɛ do san a nyɛrɛ-tɔrɔ-gbɛ la ka ki-fan donu ki wo rɔ.
17Sɛbɛna-mɔgɛ le ale la.
A si a sɛbɛ don a halala-wɔlɛ ma, ado a ragbɛlɛ fanan.
18A ya a lɔn ko a ya wɔli-wo-wɔli kɛ, a si tɔnɛ sɔrɔn wo rɔ.
A si to wɔlila ha su-talɛ ma.
19A si wurundi kɛ ka a ladan kurɛ la.
20A si bolo-kolɔnnu kɔ sewɛ rɔ ka anu dɛnbɛ.
21A ti hɔn ala bonna-mɔgɛnu kuma kimɛ rɔ
bawo a ara anu fɛrɛya-bɔ duruku-hakikɛnu na.
22A si birinkannu nadan a nyɛrɛ ye ka a nyɛrɛ fɛrɛya-bɔ kura-hakikɛ la.
23Ala kei si ma mɔgɔ-malɔnnɛ la nyamanita-mɔgɔ-banu tɛma.
24A si kura-hakikɛnu kara fɛrɛya-bɔɛnu na ka anu mayira yilanu ma.
25A sɛbɛ donnɛ, ado a wara-koe gbili mɔgɛnu ma.
Ale yigi tɛgɛni ma sinanna ko la.
26A si hɛnkilimaya-kumɛnu fɔ ka kila-nyimɛ yira mɔgɛnu na.
27A si ala bɔn fɛ-bira a kilɛ fɛ.
A ti sɔn tinya-mansaya-ko ladanna.
28Ala dannu si duwa a ye.
Ala kei si a tanto.
29Anu si a fɔ ko, “Musu-siyaman bi ko-nyima-siyaman kɛla kɔnɔ ile tenbira wonu na pirr!”
30Musi donu yakɔrɛla kinyɛ si mɔgɛ yanfa, ado a ti a laban.
Kɔnɔ musi minnu bi kilanna Mari la, wonu si gbiliyɛ sɔrɔn.
31A ara ko-nyimɛ min bɛɛsi kɛ, mɔgɛ si a wɔlibɔ wola ko la.
Mɔgɛ si musu-sufa kɛ gbiliya le mɔgɔ-banu tɛma.
Kuranko Common Language Bible © The Bible Society in Sierra Leone, 2006.