Hɛnkilimaya-Kumɛnu 2
2
Hɛnkilimaya-Kumɛnu Tɔnɔ-Sɔrɔn-Koe
1Nna den, n bara i karan min na, i ni wo bira gben! I kana nyina wo ko de! 2I tole masɔ hɛnkilimaya-kumɛ la. I ni i raya ka a kɔrɛ lɔn. 3I ni madiyali kɛ alako i ni karan sɔrɔn ka a nya-yen. 4I ni a nyini iko mɔgɛ si dugu-kɔrɔ-nɔnfuli nyini nya min. I ni to a nyinina iko mɔgɛnu bi wodi nyinina nya min. 5Ni i ya wo dama ma, i si Mari-yala-kilan-kɔrɛ lɔn, wo kɔma, i si Alla lɔn bɛrɛbɛrɛ-wɛ-kɛ. 6Mari le si hɛnkilimayɛ anubɛ lɔnnɛ di mɔgɛ ma. Wo kɔma, a si a ma, i ni a nya-yen. 7Minnu natelennɛ, ale le ye hɛnkilimayɛ ladɛnna wo ye ka wo tanka ko-yogomɛ ma. 8Minnu ti lafisayalɛ kɛ, Mari si wonu natanka. Minnu fanan bara anu nyɛrɛ di Mari ma bɛrɛbɛrɛ-wɛ-kɛ, a si wonu nakandan.
9Ni i ya i tole masɔ n na, i si ko-latelennɛ anubɛ ko-nyimɛ lɔn. Koe min kin ka a ma, i si wo fanan lɔn. 10I hɛnkili ma si to kofula. Ila karan si a ma, i ni sewa. 11Ila ko-kɔrɔ-lɔn si i kandan hɛnkilimayɛ rɔ. 12Hɛnkilimayɛ si a ma, i ti bila ko-yogoma-kɛlɛnuta kilɛ fɛ. A si i tanka foninya-fɔlɛnu ma. 13Mɔgɛ le wonu na minnu bara telenbagayɛ boloka ka bila pinpita kilɛ fɛ. 14Wunduyogoyɛ si a diya don anu tɔ iko pɔlɛ. 15Yanfante le wonu na, ado mɔgɔ ti la wonu na.
16Ni hɛnkilimɛ le ile la, i si ke le i bɔla musu-yɛlanla darɔ-diyɛ kɔrɔ 17bawo musi wo ma telen ala kei ye. A ya lanyiri min kiri Alla ye a furu tinɛ, a ara nyina wo ko salon! 18Ni i tara musu-sufa wola bɔn la, i ye tala kanbɛ le magbenna wo la 19bawo ni min tara bɔla a wara, wo kɛndɛ ti sɛgi tun, ado a ti bila nimaya-kilɛ fɛ tun.
20Woletɔ nna dan, ile ni bila mɔgɔ-nyimɛnuta kilɛ fɛ ka telenbagayɛ kɛ. 21Minnu natelennɛ Alla ye, wonu si taran anu diya mala nyamanɛ kɛ rɔ. 22Kɔnɔ minnu karagbɛlɛ, Alla si wonu wurun burutu, iko mɔgɛ si binyɛ wurun nya min sɛnɛ rɔ.
Kuranko Common Language Bible © The Bible Society in Sierra Leone, 2006.