Hɛnkilimaya-Kumɛnu 27
27
1 #
Yemesi 4.13-16
Mɔgɔ kana i diya sinanna ko la bawo i ma a lɔn min bi nala mala sina.
2Yanni i ni i nyɛrɛ matɔgɔ, a to, mɔgɔ-gbɛrɛkɛ ni i matɔgɔ.
3Kun-takolɔn ye diminyɛ min nanala mɔgɛnu kuma, wo gbili ka tenbi kuru-dunɛ anubɛ kɛnkɛn-dunɛ la.
4Yisi-bɔɛ si ko-yogoma-siyaman ma ka fen-siyaman tinya kɔnɔ kei-keli tenbira wo la.
5Ni i ya i ta-nyɔgɛla fɛɛ yira a la, wo si a yira ale la ko ale di i ye. Yanni i ni i ta-nyɔgɛla fɛɛ dogon, a fisa, i ni a latelen. 6Ni mɔgɔ diyana-mɔgɔ-bɛrɛ ya i kawandi-koe dola ko la, tumado, a si i tɔrɔ. Kɔnɔ ni i yoge ya a bole sa i kan ma, a ma i fɛrɛma.
7Ni mɔgɛ fara dɔn-fan la pen, liyi-dɔn-sɔgɛ ti a bira tun. Kɔnɔ ni kɔnkɛ ya mɔgɛ rabɔ, hali dɔn-fen-kunayanɛ si diya a da rɔ.
8Musu-tigi min si a warɛ boloka, wo mani de iko kona min sa a nyagan dala.
9Mɔgɔ diyana-mɔgɔta kawandili-kan mani de iko sɛnti-suma-diyamɛ ye nya min.
10Mɔgɔ kana nyina i diyana-mɔgɛ anubɛ i fa-diyana-mɔgɛ ko bawo ni i ya nanparan sɔrɔn, yanni i ni ta i na-kelen-nyɔgɛ do wara wula-yan na, i diyana-mɔgɛ wonu fɔlɔn si i kunyɛ bɔ a rɔ.
11Nna den, ni i si i hɛnkili sɔ, wo si a ma, n ni sewa. Woletɔ mɔgɛ minnu bi n manyinina nun, n si kusanya wonu yabila.
12Hɛnkilimɛ si tɔrɔyɛ yen nala yarɔ, a ni a masangba. Kɔnɔ kun-takolɔn wo ye tala a kun fɛ pɔrɔka-pɔrɔkɛ ka ta a kian layigi nanparan rɔ sogobo! Fɔ yarɔ gbɛ, a ni na to nimisala.
13Ni mɔgɛ ya a nyɛrɛ ma yili-bolomɛ la sundan anubɛ duguran tɛma, a fisa, fen-tigi bole ni taran ale yili-bolomɛ la.
14Mɔgɛ min bi a ta-nyɔgɛ mabanna kinɔgɛ rɔ subagɛ ma, ila kɔndɔli wo si ma wo yala iko i wara a danka le.
15Musi min bi gbɛngbɛrɛnna ala kei dala tuma-wo-tuma, wo mani de iko serende tenbi tintila tisili la. 16Ni i si tɔn sigi fɔnyɔ la wo, ni tuli si to mɔgɔ bolo tɔ wo, mani mɔgɛ si ke musu-sufa wo lakalala.
17Iko nɛgɛ si nɛgɛ dɛ diya nya min, mɔgɛ si a ta-nyɔgɛ hɛnkili kɔ wo nya na le.
18Mɔgɛ min bi ala ki-fan fɛ-birala, wo le ye ala ki-fan wo gbɔɛ dɔnna. A ye wo nya na le fanan, wɔli-kɛlɛ min bi ala kun-tigi fɛ-birala, wo le ye gbiliyɛ sɔrɔnna.
19Iko mɔgɛ si a nyɛrɛ ninɛ yen yi kɔrɔ nya min, a kɛ-nya fanan bi a sɔn labɔla gbɛ rɔ wo nya na le.
20Ni kanbɛ si wasa, mani hadama-dan si wasa.
21Iko tɛ si sɛnɛ anubɛ wodi-gbɛ-boe bɔ a kɛndɛ yala nya min, matɔgɔlɛ fanan si mɔgɛ kɔrɔbɔ wo nya na le.
22Hali i ya kun-takolɔn gbesi ka a niyi madɔgɔya a rɔ, iko mɔgɛ si fui-fan bunden kolɔn rɔ nya min, a ti ala kun-takolonyɛ boloka.
23Mɔgɛ ni ala kolo-fan fɛ-bira a kila-bɛrɛbɛrɛ fɛ 24bawo wodi ti a laban mɔgɛ bolo. Hali kun-tigiyɛ fanan ti a laban. 25Mɔgɛ tenbi binyɛ tɛgɛla ka a sa ala kolo-fan kɔrɔ, do ye matiila wo gbɛ rɔ. A si ta kɔnkɛnu tɔ fanan ka binyɛ madɛn. 26I si saga-siyi tɛgɛ a ma ka wo ma kurɛ la. Wo kɔma, i si baa donu fanan mayira ka dugi do san wo sɔnkɛ la. 27Baa-toe minnu bi tola, i si to wonu burunna ka wonu nonɛ ma ila denbaya-beli-koe la. Hali ila wɔli-kɛla-sunkurun-mɛsɛnu si do sɔrɔn wo rɔ.
Kuranko Common Language Bible © The Bible Society in Sierra Leone, 2006.