Hɛnkilimaya-Kumɛnu 26
26
1Bandɛ min bi tola nala dɔn-fen tɛgɛ wati rɔ, ni wo kin ile yala, nba, mani mɔgɔ wa kun-takolɔn matɔgɔ, wo fanan kin.
2Iko kona ye tenbila mɔgɛnu kuma nya min ka ta a ye pon, mɔgɛ min ma ko tinya, ni i ya wo danka, dankɛ wo fanan bi tenbila wo kuma wo nya na le fɛlɛlɛ!
3Iko gbɛn anubɛ karafɛ bɛnta soee ma nya min, bosɛ fanan bɛnta kun-takolɔn ma wo nya na le.
4Mɔgɛ min bi kun-takolɔn yabila kuntanya-kilɛ fɛ, wonubɛ kun-takolɔn wo rakɛn de! 5Ado nfan, i ni kun-takolɔnla kumɛ yabi a bolo, ni wo ma, a si a nyɛrɛ lɔn hɛnkilimɛ la.
6Ni i ya i sara kun-takolɔn la, wo si ma iko i kian le tɛgɛnɛ a la bawo i ya kilaya-kun-kundi le lata. Wo si a ma, i ni tɔrɔyɛ sɔrɔn.
7Ni namarɛ kin-lɔpɔrɔ-lɔpɔrɛ si a munanfaga, nba, mani hɛnkilimaya-kumɛ fɔnɛ kun-takolɔn bolo si ko nyinya.
8Ka lenfiran lagburu kuri ma, ni hɛnkilimayɛ ye wo rɔ, nba, mani mɔgɛ wa kun-takolɔn matɔgɔ, hɛnkilimayɛ ye wo fanan tɔ.
9Kun-takolɔnla hɛnkilimaya-kumɛ mani de iko wɔnɛ tenbi baantoe bolo tɔ.
10Mɔgɛ min bi tala yuwɛ birala a bole ma ka na wɔlɛ di a ma, wo tigi si mɔgɛnu tɔrɔ iko mɔgɛ min bi kalabɛn lakɛla kan tinɛ bɛɛ rɔ.
11Iko wuli si sɛgi ala teseri dɔn tinɛ nya min, kun-takolɔn fanan si to sɛgila ata kun-takolonyɛ ma wo nya na le.
12Mɔgɛ min bi a fɔla a nyɛrɛ ma ko, “Nde hɛnkili kolo,” yigi ye kun-takolɔn la ka tenbi wo tigi la.
13Tinya-mansɛ si to a fɔla ko, “N ti bɔ bɔn la bawo yarɛ ye kilɛ la.” 14Wo fanan si to a mayɛlɛma-yɛlɛmana ala sa-fan rɔ iko kankan min na ye kala, a la ye togonna. 15Hali ka dɔn-fan kɔ miran rɔ ka a don a da rɔ, wo si gbɛlɛya tinya-mansɛ wo kuma. 16Mɔgɔ-sufa wo kɛnɛna tɛgɛla hɛnkilima wɔrɔnfilɛla kawandili rɔ.
17Mɔgɛ min bi belenna basanna mɔgɛnuna sɔsɔli-kumɛ la, wo tigi mani de iko mɔgɛ min bi tala wuli birala a tole ma, a ma min lɔn.
18-19Yuwɛ min bi tolonna kɛlɛ-kɛ-fannu na, wo mani de iko mɔgɛ min bi a ta-nyɔgɛ yanfala kɔnɔ tɔ-a-la, a ni a fɔ ko, “N bi samakaliyɛ le la nun.”
20Ni sɔgɛ banta, tɛ si dufen. Ni ko-rafɔlɛ fanan sa mɔgɛnu tɛma, sɔsɔlɛ si ban. 21Ni i ko tɛ ni to wɔlɔnna, fɔ i wa kinbi do kɛ a kuma. Ni i ko tɛ ni to birala, fɔ i wa sɔgɛ do sɔ a la. Ni i ko sɔsɔlɛ ni wara, fɔ sɔsɔli-sala-wɛ wa atɛ bila a rɔ. 22Ko-rafɔlɛla kumɛ si diya mɔgɛ tole la iko dɔn-fen-diyamɛ. I si to i mirila ala diya nya ma.
23Kuma-manunkuni-fɔɛ wunduyoge bolo mani de iko bɔnku-daga-sɔlɛ wa bɔnku-dagɛ-kɔmɛ manunku kɔnɔ a burɛ wo yɔgɔdɔlɛ! 24Wunduyoge si ala wunduyogoyɛ dogon ka a da le yira mɔgɛ la. 25A ye kumɛ min fɔla a dɛ rɔ, i kana i bila wonu fɛ bawo a burɛ wo lafanɛ ko-yogomɛ-gbansan le la. 26A si a sɔn-yogomɛ dogon yanfanteyɛ la kɔnɔ tɔ-a-la, mɔgɛ bɛɛ si a lɔn a sɔn-yogomɛ wo fɛ.
27Ni mɔgɛ ya denkɛ tɛgɛ a ta-nyɔgɛ ye, wo tigi ti bui wo rɔ fɔ ale. Ni i ya kuri min nakuru-kurun i bɔla ko la, wo ye bɛnna ile le la. 28Ni i ya tɔgɛ sa mɔgɛ la, wo si a yira ko mɔgɛ wo ma di ile ye. Darɔ-diyɛ si nanparan lana mɔgɛnu ma.
Kuranko Common Language Bible © The Bible Society in Sierra Leone, 2006.