Hɛnkilimaya-Kumɛnu 25
25
Silamɛnita Hɛnkilimaya-Kumɛ Donu
1Mansa Hɛsakaya min siginɛ Yuda nyamanɛ kun na, wola kɛdi-sɛbɛlɛnu ya hɛnkilimaya-kumɛ kɛnu sɛbɛ, Mansa Silamɛni ya minnu fɔ nun.
2Ma si Alla gbiliya bawo a sa-koe bɛɛsi sala ma ye gbɛ ma. Ma si mansɛnu fanan gbiliya bawo anu si koenu fɛsɛfɛsɛ a kilɛ fɛ.
3Ni mɔgɛ si ke san-kolo-burɛ anubɛ kɔgɔ-yi-kɔrɛ lɔnna, nba, mani mɔgɛ si ke mansɛ miriya lɔnna worɔ.
4Ni wodi-gbɛ-layigilɛ ya a boe bɔ a bɛrɛ yala, a si ke le wodi-gbɛ-bɛrɛbɛrɛ wo mala fen-kolomɛ do la. 5A ye wo nya na le fanan, ni mɔgɛ ya hɛnkili-kɔla-yogomɛnu bɔ mansɛ fɛ, wo si a ma, mansɛla nyamanɛ ni ta yarɔ telenbagayɛ bolo.
6 #
Luka 14.8-10
Mɔgɔ kana a nyɛrɛ kɔrɔbi mansɛ yala. I kana sigi mɔgɔ-ba doita sigi tinɛ rɔ. 7Yanni mɔgɛ ni ta a sigi mansɛ dafɛ, a ni tugu i la mɔgɔ-banu yakɔrɔ, a fisa worɔ, i ni i sigi a mafakɔnɔ, ale ni i kele.
8Mɔgɛ ban min tagbɛla, a kana bara koe wo la ka ta a ta-nyɔgɛ la kiti-tɛgɛlɛnu bara. Tumado, ni anu ya wo fɛsɛfɛsɛ, a si ma miliya-koe la ale bolo.
9Ni wobɛ i ta-nyɔgɛ sɔsɔra, a fisa, wo ni a ban wo nyɔgɔn tɛma. Wo kana wola gbundu-koe labɔ gbɛ ma. 10Ni mɔgɔ-gbɛrɛkɛ ya wo lamɔɛn, i wara i nyɛrɛ magboya. Tuma-wo-tuma wobɛ tɔgɔ-tinya le.
11Mɔgɛ min bi hɛnkilimaya-kumɛ fɔla a wati-bɛnnɛ rɔ, wo kin iko anu ba sɛnɛ-mɔlɔnɛ sa wodi-gbɛ tɛma.
12Mɔgɛ min si sɔn a tole masɔla labila-kumɛ la hɛnkilimɛ bolo, kumɛ wo si kinya a ye iko sɛnɛ-foro-hakikɛ min bo sa a yala.
13Yi-kimɛ si kɔrɔ-tɛgɛlɛ yisi kima nya min, kilaya-lakɛla-nyimɛ fanan si a tigi yisi kima wo nya na le.
14Mɔgɛ min si mɔgɔ yili-madiya fen-ni-koe rɔ, ado a ti a ni, wo mani de iko bandɛ wa fin, fɔnyɔ ni sigi a kɔrɔ, a ni foo.
15Mɔgɛ min si a munyu mansɛ kɔrɔ kuma fɔ tinɛ, tumado, wole ye ale mansa-miriya yɛlɛmana. Kuman-kan-diyamɛ le si mɔgɔ nɔ.
16Mɔgɔ kana ta liyi-ladiyɛ fɛ ka a dɔn-belebele-wɛ kɛ. Ni wo ma, i si teseri. 17A ye wo nya na le fanan, mɔgɔ kana na to a sigi-nyɔgɛ warɛ fɛrɛgbɛ-fɛrɛgbɛ! Ni wo ma, ila ko si gboya a ye.
18Mɔgɛ wa foninya-sereyɛ bɔ a sigi-nyɔgɛ ye, wo mani de iko mɔgɛ wa gbeleka-kundi bi, ni wo ma, faan, ni wo ma fanan, tanbɛ.
19Ka la mɔgɔ-lanayabɛlɛ la yakɔrɔ-mamɔɛ rɔ, wo mani de iko mɔgɛ min bi fen dɔnna a nyin-yɔgɔ-yɔgɔnɛ la. A mani de fanan iko mɔgɛ tenbi a tonkanna a kin-namara la.
20Ka sigi sa mɔgɔ-yisi-tinyanɛ ye, wo mani de iko mɔgɛ wa a gbu-makolonya dafere-kimɛ rɔ. A mani de fanan iko mɔgɛ wa kɔgɛ sa tɛlɛ la.
21Ni kɔnkɛ ye i yoge la, a lafa. Ni a kan lagbalanɛ, i ni yi di a ma. 22#Romu 12.20 Ni i ya wo ma, a si miliya i ye dɔgɔma-ma-de, ado Mari si ile barayi.
23Iko fɔnyɔ si bɔ bandɛ la kantɔɛ wara la nya min, nafigi si kɛlɛ-nyɔgɔnyɛ lana wo nya na le.
24Yanni i ni i sigi musu-gbengbɛrɛlɛ fɛ bon-hakikɛ la, a fisa, i kelan ni to bon-nɛ la i dan na.
25Sarakani-nyimɛ min bi bɔla wula-yan la ka mɔgɔ taran, wo si diya i ye iko anu ba yi-kimɛ di mɔgɔ-kan-nagbalanɛ ma.
26Ni mɔgɔ-nyimɛ kofura mɔgɔ-yoge ma ko-yogoma-kɛ tinɛ, wo mani de iko tenke min dundunɛ, ni wo ma, kɔlɔntɔ-yi min nɔgɔnɛ.
27Liyi-dɔn-wɛ si mɔgɛ tɔrɔ nya min, matɔgɔ-belebele-nyinɛ mɔgɛnu bolo fanan si mɔgɛ tɔrɔ wo nya na le.
28Mɔgɛ min ti ke a yisi birala, wo mani de iko soe min tarɛ ara wuya.
Kuranko Common Language Bible © The Bible Society in Sierra Leone, 2006.