Hɛnkilimaya-Kumɛnu 24
24
-19-
1I kana i sanka mɔgɔ-yogomɛnu ma hali ka i gbɛrɛn anu ma 2bawo anu miriya bɛnni ma fenfen ma fɔ ka nanparan ratɛgɛ. Anu ya anu dɛ sɔ mɔgɔ-wo-mɔgɔ ma, wo yisi si tɔrɔ a ma.
-20-
3Hɛnkilimayɛ anubɛ ko-kɔrɔ-lɔn le mɔgɔla bɔn sɔ-fan la. 4Lɔnnɛ ye kan-bo-kan, nyɔ-bɔn la si fa fen-kolomɛ la.
-21-
5Hɛnkilimayɛ tenbira fankalamayɛ la. 6Yanni i ni ta kɛlɛ-kɛ-tinɛ, fɔ i wa mɔgɛ nyini min si i makawandi. Ni i ya i miri kawandili wonu ma a kilɛ fɛ, i si kɛlɛ wo nɔ.
-22-
7Hɛnkilimɛla kuma-kɔrɛ lɔn-koe gbɛlɛ kun-takolɔn bolo. Ni hɛnkilimɛnu siginɛ, anu bi kumala, a fisa, ile kun-takolɔn ni i dɛ madon i la.
-23-
8Ni mɔgɔ-sɔn ma fenfen na fɔ ka a miri ko-yogomɛnu ma a sigi-nyɔgɛnu bara la, nanparan tatɛgɛlɛ le wo tigi la. 9Kun-takolɔn miri ma fenfen na fɔ ko-yogomɛ, ado hakɛ le wo la. Mɔgɛ min si mɔgɔ mayɛlɛn, a wara-koe ti diya wo tigi ye.
-24-
10Mɔgɛ min ti ke a munyuna tɔrɔyɛ rɔ, yutoe le wo tigi la.
-25-
11Anu bara tɔgɛ sa mɔgɛ min na, i kana kilan ka wo bɔ sayɛ kɔrɔ. 12Ni i ya a fɔ ko, “Ndeta sa kɛ rɔ,” Alla ya a lɔn i ya i bole bɔ a rɔ min na, wo si a ma, a ni i kiti. Alla ye i mafɛlɛnna, ado a ya a lɔn min bi i burɔ. A si i sara iko i kɛ-nya ye nya min.
-26-
13Nna den, to liyi dɔnna bawo a di. Iko liyi di i da rɔ nya min, 14hɛnkilimayɛ fanan kin mɔgɔ-sɔndɔmɛ rɔ wo nya na le. To hɛnkili nyinina woletɔ i wara-koe si to tala yarɔ.
-27-
15I kana ma iko karagbɛlɛ minnu bi yanfɛ sigila mɔgɔ-telennɛnu na anu kankan-koe la. 16Hali mɔgɔ-latelennɛ buira iko wɔrɔnfila, a si ke le a lasɔla wo dama rɔ. Kɔnɔ ni karagbɛlɛ buira, a si kasara pɔ!
-28-
17Ni i yoge buira, i kana sewa wo la ka a mayɛlɛn. 18Ni i ya wo ma, tumado, Mari si ata diminyɛ bɔ i yoge wo kuma.
-29-
19I yisi kana tinya mɔgɔ-yogomɛnuna ko la. I kana i sanka anu ma. 20Nba, yigi sa karagbɛlɛ bolo a si a miri min ma. A wara-koe la si to dogbe iko lɛnpu wa dufen dɔi!
-30-
21Nna den, Mari gbiliya. Wo kɔma, i ni mansɛ fanan gbiliya. Ni a sɔgɔ sa i la ka Mari anubɛ mansɛta tɔrɔyɛ sɔrɔn, i kana i dɛndɛn mɔgɔ-murutiyanɛnu na 22bawo Mari anubɛ mansɛ si anu kasara tiriya! Mari anubɛ mansɛ ye tɔrɔyɛ min sigila mɔgɛnu ma, mɔgɔ-wo-mɔgɔ ti ke wo lɔnna.
Hɛnkilimaya-Kumɛ Donu Bara-Koe
23Hɛnkilimɛ le ye kɛnu damasi fɔla.
Kiti-tɛgɛlɛ kana lafisayalɛ kɛ kiti sa tinɛ. 24Mɔgɛ min yilikinɛ, ni kiti-tɛgɛlɛ ya yo di wo ma, kiti-tɛgɛlɛ wola ko si gboya mɔgɛ bɛɛ ye. 25Yo sa minnu bolo, ni kiti-tɛgɛlɛ ya wonu tɔrɔ nya-wo-nya, kiti-tɛgɛlɛ si tɔgɔ-nyimɛ sɔrɔn, ado a si sabati.
26I ta-nyɔgɛ min bi tonyɛ fɔla i ye, i diyana-mɔgɔ-bɛrɛ le wo la.
27Yanni mɔgɛ ni bɔn sɔ, sɛnɛ fɔlɔn sa.
28Mɔgɔ kana i ta-nyɔgɛla sereyɛ bɔ, i ma ban min tagbɛla hali ka kumɛ do fɔ ala ko la i ma min tagbɛ. 29Mɔgɔ kana a tayili sara a ta-nyɔgɛ la. I kana a fɔ ko, “Kɛ ya min ma n na, n si wo fanan ma ale la gben!”
30N bi tenbila tinya-mansɛ dola sɛnɛ rɔ, hɛnkili sa min bolo, kɔni. 31N ya a taran, sɛnɛ wo lafanɛ wɔnɛ anubɛ binyɛ la. Sansan min donnɛ a bolo nyɔ, wo ara tinya. 32N ya wo yen n yɛ la tumɛ min, n ya hɛnkili sɔrɔn. 33Ni mɔgɛ tora a sulenna, hali ka a niyi madɛn doni, 34#Hɛnkilimaya-Kumɛnu 6.10-11 a tenbi kinɔgɔla, bolo-kolonyɛ si na kɛ a ma iko kankan-kɛlɛ-kɛ-fen-tigi.
Kuranko Common Language Bible © The Bible Society in Sierra Leone, 2006.