Hɛnkilimaya-Kumɛnu 23
23
-6-
1I wa i sigi kun-tigi fɛ fen-dɔn-tinɛ, i ni a lɔn wobɛ min bi fen-dɔn kun na. 2Ni i si fen-ba dɔn, i ni i buyi-dan lakiri. 3I kana i lagbɛ ala dɔn-fen-diyamɛnu ma. Tumado, a ye i bolo-labira-koe le tɔ kɔrɛ kɔnɔ i ma a lɔn.
-7-
4Ila hɛnkili lawɔli alako i kana i nyɛrɛ tinya nɔnfulu-nyini-tinɛ. 5Ni i ya wo ma, ila wodi si gban i bole tɔ iko kokɛ si gban nya min ka ta a ye pon!
-8-
6I kana fen dɔn kɔrɔnditore warɛ. Ala dɔn-fen-diyamɛnu-sɔgɛ kana to i birala sogesoge! 7A si i latuntun a bolo-fan ma kɔnɔ hali wo, i kɔ-sɔgɔ sa a la bawo a si to a mirila dɔn-fan wo sɔrɔn-bole ma. 8Ni a taranta, i wara fen-nɛ min dɔn, i wa wo lateseri, i wara baraka-birɛ min kɛ a ye, wo damasi si ma fufafuyi la.
-9-
9Hali i ma i tɔrɔ hɛnkilimaya-kumɛ fɔla kun-takolɔn ye bawo a ti sɔn a bira-koe ma fɔ ka i lafɛya.
-10-
10I kana dan-kuri bɔ a gbɛ rɔ ka kelennɛnuna dugi do tɛgɛ a la 11bawo Mari le anu kumafunfannɛ la, ado sɛnbɛ-tigi le ale la.
-11-
12I tole masɔ i karan-mɔgɛ la ka i raya karan ma.
-12-
13Tamayi kana i bira ila dan kolo tinɛ bawo gbesili ti a faga, 14ado wo si a ma, a la ni kisi.
-13-
15Nna den, ni i mara hɛnkilimɛ la, wo si a ma, n ni sewa. 16N ba i yen hɛnkilimaya-kumɛ fɔla tuma-wo-tuma, n si n wasi i la.
-14-
17Keliyɛ kana i bira hakɛ-tiginu wara-koe ma. Marita gbiliyɛ min bi ile rɔ, wo le ni sɛnbɛ sɔrɔn i yisi rɔ yati! 18Ni wo mara, i wara-koe si to sabatila dɛɛ.
-15-
19Nna den, i ni i tole masɔ bɛrɛkɛ! I ni i miri a kila-bɛrɛbɛrɛ fɛ alako i si i sigi nya min duninya kɛ rɔ. 20-21I kana gbɛɛ-minna-wɛnu anubɛ nugulamɛnu ma i diyana-mɔgɛ la bawo anu bara-koe si a laban bolo-kolonyɛ ma. Wo si a ma anu ni to kinɔgɔla, ado anu si to fɛrɛyɛ rɔ.
-16-
22I tole masɔ i fa la bawo ale le ya i sɔrɔn. I kana i na bɔrɔbɔ hali a wa kɔrɔya.
23Tonyɛ wo, karan wo, hɛnkilimayɛ wo, hali i wa fen bɔ alako ka wonu sɔrɔn, wo kin. I kana wonu felen fenfen na.
24Mɔgɔ-latelennɛ fa si sewa le. Ni a taranta mɔgɔla dan mara le hɛnkilimɛ la, wo si a ma, a fa ni a wasi a la. 25I ni a ma, i fa anubɛ i na ni anu wasi i la. A kin, i na ni sewa ila ko la.
-17-
26Nna den, i yɛ sɔ n na. I ni i sanka n ma ka n kɛ-nya bi. 27Musi-yɛlan mani de iko denka-rayan-bɛ. 28A si i makɔni kilɛ la iko kankan. A si a ma, anu ba bila ale musi-yɛlan wo fɛ, kei-siyaman ni lanayɛ tinya anuna musinu bara la.
-18-
29-30Min si gbɛɛ min ka a dan-natenbi, tuma-wo-tuma a ye gbɛɛ-kura mafɛlan le la, ado mɔgɛ wo makinikininta. Tuma-wo-tuma, ale ye kɛlɛ-tɛgɛ anubɛ yasere-masɛ le la. I ya a yen tuma-wo-tuma, a magboro-gboroni de! A ya-kole si mɔ puipui! 31Hali gbɛɛ wo ye a labɔla wose-wose ka kanfa, ado a min-koe ma gbɛlɛ, a kana i yɛ sɔgɔ a la ha a sɔgɛ ni i bira. 32Kɔnɔ ni i ya wo ma, a laban, a si i ma iko duguma-fan wa mara mɔgɛ ma. 33Gbɛɛ si i kunyɛ rafin ha i ni fan donu yen, i ma duru minnu yenna. A si a ma, i ti ke i mirila a kin na! A si a ma, i ni to kuma nigili-nagalɛnu#23.33 Nigili-nagalɛnu: Kurankɔɛ donu si a fɔ ko, “Yuli-yalɛnu.” fɔla. 34A si i ma iko i sa tinɛ ye tinki-tankala i la iko kulɔn tenbi tinki-tankala kɔgɔ-yi kuma. 35I si to a fɔla ko, “A manɛ iko anu bara n gbesi le kɔnɔ n ma kala sɔrɔn wo ma. N ti ke n kunyɛ kɔrɔbila ni n ma n da raka gbɛɛ la.”
Kuranko Common Language Bible © The Bible Society in Sierra Leone, 2006.