Hɛnkilimaya-Kumɛnu 22
22
1Tɔgɔ-nyimɛ tenbira nɔnfuli la.
Mɔgɛ wa to gbiliyɛ rɔ mɔgɛnu bolo, wo tenbira sɛnɛ anubɛ wodi-gbɛ la.
2Mari le ya mɔgɛ bɛɛsi dan, bolo-kolɔn wo, fen-tigi wo.
3Hɛnkilimɛ si tɔrɔyɛ yen nala yarɔ, a ni a masangba.
Kɔnɔ kun-takolɔn wo pɔrɔka-pɔrɔkɛ le ye tala a kun fɛ ka ta a kian layigi nanparan rɔ sokobo! Yarɔ gbɛ, a ni nimisa.
4Ni i ya Mari gbiliya, i ni i nyɛrɛ famayigi a ye.
Wo si a ma, i ni nɔnfuli anubɛ gbiliyɛ anubɛ simayɛ sɔrɔn.
5Wɔnɛnu anubɛ gbɛrɛnu bi mɔgɔ-radunɛnuna kilɛ la.
Ni mɔgɛ ko a ni a nyɛrɛ tanka wo ko-sufanu ma, fɔ a ni a masɛgi kilɛ wo la.
6Mɔgɛ ni ala dan kolo ka a bila kila-nyimɛ fɛ, a bɛnnɛ a ni to min fɛ.
Ni i ya wo ma, a ti kila-nyimɛ wo boloka ha a si kɔrɔya.
7Bolo-kolɔn si to yɔɔnyɛ rɔ fen-tigi kɔrɔ.
Mɔgɛ wa yili tɛgɛ mɔgɔ-wo-mɔgɔ ma, a ara ma wola yɔɔn la.
8Ni mɔgɛ ya telenbɛliyɛ le ki, a si nanparan le tɛgɛ wo gbɛ rɔ nyɔ.
Min sanɛ wo kuma, ala mɔgɔ bira-boloko-yogomɛ si ban de!
9Mɔgɔ-kɔlɛ anubɛ duwɛ le
bawo a ye dɔn-fan dila bolo-kolɔnnu ma.
10Ni wo ya mɔgɔ-wasinɛ gben wo kurun tɔ,
wo si kɛlɛ-nyɔgɔnyɛ anubɛ sɔsɔlɛ ban de wo tɛma.
11Mɔgɛ min kusan kumala, ado a yisi makanɛ de,
wo mɔgɔ-sufa di, hali mansɛ ye.
12Mari ti sɔn foninya-fɔlɛla foninyɛ ma,
kɔnɔ a si tonyɛ kumafunfan.
13Tinya-mansɛ si to sigini bɔn la.
A kɛnɛna a fɔla ko, “Yarɛ ye kilɛ la. Ni n tara, a ye n fagala le.”
14Yɛlan-dɛ mani de iko denka-rayan-bɛ,
minnu bi Marita diminyɛ kɔrɔ, wonu denu bi buila a rɔ.
15Kun-takolonyɛ ye dennɛ le bolo ma
kɔnɔ ni i ya a lasanfan bosɛ la, a si kun-takolonyɛ wo boloka.
16Ni mɔgɛ ya ko-yogomɛ ma bolo-kolɔn la alako a ni ma nɔnfulu-tigi la, fɔ ale fanan ba ma bolo-kolɔn la, yɔ!
Ni mɔgɛ tora fan dila nɔnfulu-tigi ma, ale fanan si ma bolo-kolɔn la.
Hɛnkilimaya-Kuma Bi-Sawɛ Wara-Koe
17Wo ni wo tole masɔ. N si wo karan hɛnkilimaya kumɛ la. Wo ni wo niyi sa a kuma. 18Ni wo tora wo mirila anu ma wo kunyɛ rɔ ka anu fɔ, wo si sewa. 19N bi wo karanna kɛ la bi woletɔ wo si la Mari la wo yisi bɛɛ la. 20N bara kuma bi-sawa sɛbɛ wo ye. Anu bɛɛsi lafanɛ kawandili-nyimɛ anubɛ hɛnkili la. 21Anu si wo karan tonyɛ la woletɔ ni mɔgɛ do ya wo manyinika, wo si tonyɛ fɔ a ye a kilɛ fɛ.
-1-
22Mɔgɔ kana tɔnɛ sɔrɔn bolo-kolɔn kuma anuna bolo-kolonyɛla ko la. I kana bolo-kolɔn kɔndɔfili kiti tɛgɛ tinɛ. 23Mari le si anuna kɛlɛ kɛ anu ye ka wo niyi ragbɛrɛn.
-2-
24Mɔgɛ min yisi kolo, i kana wo ma i diyana-mɔgɛ la. 25Tumado, a sɔn si to i bolo ma, i ti ke min bolokala. Tɔ-a-la, wo si ma gbɛrɛ la i ye.
-3-
26Mɔgɔ kana i nyɛrɛ ma yili-bolomɛ la 27bawo ni i ma ke a sarala, anu si ila sa-fan gbɔrɔndo i kɔrɔ.
-4-
28I benbanu ya dan-kuri min sigini to, i kana wo bɔ a gbɛ rɔ.
-5-
29Mɔgɔ-wo-mɔgɔ kusan wɔlila, wo ti to ata wɔlɛ kɛla dogɔn tɔ. Hali mansɛ, a si a bolo don a wara-koe rɔ ala wɔli-nyimɛ wola ko la.
Kuranko Common Language Bible © The Bible Society in Sierra Leone, 2006.