Hɛnkilimaya-Kumɛnu 1
1
Hɛnkilimaya-Kumɛnu si min Nyinya Mɔgɛ Ma
1 #
1 Mansɛnu 4.32
Hɛnkilimaya-kumɛ le kɛnu na Mansa Dawudala den Isirɛlata Mansa Silamɛni ya minnu sɛbɛ.
2Kumɛ kɛnu si wo dɛnbɛ alako wo ni hɛnkili sɔrɔn ka kɛ wo nyɛrɛ marala anubɛ ka ko-kɔrɔ-lɔn-kumɛ kɛnu kɔrɛ lɔn. 3Kumɛ kɛnu si wo karan alako wo ni to hɛnkilimaya-koenu nadanna. A si wo karan fanan alako wo ni to ko-latelennɛ kɛla, min si a ma, wo ti lafisayalɛ kɛ. 4Mɔgɛ minnu hɛnkili sa bɛrɛkɛ, kumɛ kɛnu si wonu nahalliya. Kumɛ kɛnu si a ma, fonikenu ni yarɔmata-hɛnkili sɔrɔn. 5Wole hɛnkilimɛnu, wo ni wo tole masɔ. Kumɛ kɛnu si do kofu wo hɛnkilinu ma. A si kilɛ yira mɔgɔ-karannɛnu na. 6Woletɔ anu si ko-dogonnɛnu kɔrɛ lɔn ka sɔsɔlima-tilinu kɔrɛ yira hɛnkilimɛnu na.
Fonikenu Makawandili-Kumɛ
7 #
Yobu 28.28; Yaburi 111.10; Hɛnkilimaya-Kumɛnu 9.10 Hɛnkilimayɛ dabira fɔlɔtɛ, wo le ka kilan Mari la. Hɛnkilibɔnɛnu si tɛgɛ hɛnkilimayɛ rɔ ka anu ban ata kuma-bira-koe ma.
8Nna den, i ni i fa anubɛ i nala kumɛ bira. 9Ni i ya wo ma, anuna karan si ila kɛ-nya-nyimɛ yira duninya la iko kun-yili anubɛ kan-na-fan si musi lakinya nya min.
10Nna den, ko-yogoma-kɛlɛnu ba anu taya i saganna anuna ko-yogomɛnu tɔ, i kana sɔn kofula anu ma. 11-12Ni anu ya a fɔ i ye ko, “Na, ma ni ta baga mɔgɛ do ma ka a faga alako ma ni ma nyɛrɛ ladiya. Ma si a kɛndɛ taran kɔnɔ ma bɔmatoe si a suyi to nyɔ.” I kana sɔn wo ma. 13-14Anu ba a fɔ i ye ko, “Bila ma fɛ, ma ni ta nɔnfulu nyini tinɛ alako ma ni mala bɔnnu nafa kankanya-fannu na. Ma wa fan minnu sɔrɔn, ma si wonu tala.” Ni anu ya wo fɔ i ye, i ni i ban bilala wonu fɛ.
15Nna den, i masɛgi mɔgɔ-sufa wonu na. I kana bila anu kurun tɔ 16bawo ko-yogoma-kɛ di anu ye. Tuma-wo-tuma, anu denu yili ye mɔgɔ-faga-koe le ko. 17Ni kona ya i yen kose lasigila a ye, a ti a gbɛrɛn nyɔ ma tun! 18Kɔnɔ mɔgɔ-yogomɛ kɛnu bi gbɛrɛ lasigila anu nyɛrɛ ye, anu ya sa a la, ado anu si faga anu nyɛrɛta gbɛrɛ-lasiginɛ la. 19Kankan tɔgɔ si to kankanyɛ le la. Karagbɛlɛnu fanan si ban wo nya na le.
Hɛnkilimaya Makawandili-Kumɛ
20Wo ni wo tole masɔ! Hɛnkilimayɛ#1.20 Hɛnkilimayɛ: Buku kɛ rɔ, ma ara hɛnkilimayɛ ma iko mɔgɛ le kumala. ye wo rakelela soe tɛma anubɛ fere mayira tinɛnu tɔ. 21#Hɛnkilimaya-Kumɛnu 8.1-3 A ye wo kelela ladɛn tinɛ anubɛ kiti fɔ tinɛnu tɔ.
22A ye a fɔla ko, “Wole kun-takolɔnnu! Wole si hɛnkili sɔrɔn muntuma ka wo bɔ wo gba-yogomɛnu dala? Wole si wo fara lɔnnɛ lafɛyala muntuma? 23N tenbi wo makumala, wo ni wo tole masɔ n na. N bi nyɔ ka wo dɛnbɛ ka hɛnkili di wo ma. N bi wo makawandi-nyimɛ-kɛla alako wo ni ko-siyaman nya-yen n bolo. 24N bara wo rakele-siyamɛ kɛ kɔnɔ wo sa wo tole masɔla n na. N bɔrɔ sa wo ye. 25Wo ara wo ban nna makawandili-nyimɛ kɛnu na. A ma di wo ye, n ni wo latelen mumɛ! 26Woletɔ ni wo ye yakɔrɔ-mamɔɛ rɔ, fɔ ni n tora yɛlɛnna wo ma. 27Hali tɔrɔyɛ ya wo bi iko fɔn-belebele si min ma ka wo yigi tɛgɛ, n si wo mayɛlɛn. Hali wo ye dumɛ rɔ, n si wo mayɛlɛn.
28“Wo wa nde, hɛnkilimayɛ rakele wo tumɛ rɔ, n ti wo denkun. Hali wo ya n nyini furr, wo ti n yen 29bawo wo ko wo mako sa ko-lɔn la, ado wo sa sɔnna Mari gbiliyala. 30Tele-kelen-bɛrɛni, wo ma nna makawandili-nyimɛ manyinika. N ba wo latelen wati min, wo ti wo tole masɔ n na muk! 31Woletɔ wo ara yili min sɔ wo nyɛrɛ la, wo ye saganna wo le la. Wo si wola ko-yogomɛnu gberela-yi min. 32Mɔgɔ-rakolɔnnu bi fagala bawo anu bi anu banna hɛnkilimayɛ la. Hɛnkilimayɛ bɔrɔ sa kun-takolɔnnu ye min kɛ, anu bi anu nyɛrɛ kasarala wo le ma. 33Ni mɔgɛ min ya a tole masɔ nna hɛnkilimaya-kumɛ kɛ la ka a bira, wo tigi la si feri. Hɔn ti taran wo la. Wo ko-wo-ko sa nyɔ a si kilan min na.”
Kuranko Common Language Bible © The Bible Society in Sierra Leone, 2006.