Hɛnkilimaya-Kumɛnu 19
19
1Yanni i ni to kumala iko kun-takolɔn,
a fisa, i latelennɛ ni to bolo-kolonyɛ rɔ.
2A ma kin, koe do ladan-sɔgɛ ni mɔgɛ do bira min nadan-hɛnkili sa a bolo.
A ma kin, mɔgɛ ni gbaran a nyɛrɛ la ko-ladan tinɛ.
3Mɔgɛ si a nyɛrɛ tinya ala kuntanyɛ la
kɔnɔ hali wo, a si a tɛgɛ sigi Mari ma.
4Nɔnfuli si a ma, mɔgɛ diyana-mɔgɛnu ni siyaya
kɔnɔ bolo-kolonyɛ si a ma, mɔgɛ diyana-mɔgɛnu ni a boloka.
5Sereya-bɔla-yogomɛ-makolɔn ti to wo nya fu, fɔ a wa tɔrɔyɛ sɔrɔn.
Foninya-fɔla-gbɛlɛ-makolɔn ti to wo nya fu, fɔ a wa atɛ sɔrɔn.
6A sɔgɛ ye mɔgɔ-siyaman na, anubɛ mɔgɔ-banu ni to diyanayɛ rɔ.
A sɔgɛ si mɔgɔ-siyaman bira fanan, anubɛ mɔgɔ-kɔlɛnu ni to kirabɔla.
7Bolo-kolɔn ma di a na-kelen-nyɔgɛ ye kan min,
a si na diya mɔgɔ-gbɛrɛkɛ le ye wo rɔ, wa?
Hali a ya diyanayɛ nyini mɔgɛ yakɔrɔ, a ti a diyana-mɔgɛ sɔrɔn.
8Hɛnkili-nyinɛ di mɔgɔ-wo-mɔgɔ ye, wo di a nyɛrɛ ye.
A sɔgɛ ye mɔgɛ min na ka ko-siyaman kɔrɛ lɔn, wo si sabati.
9Sereya-bɔla-yogomɛ ti to wo nya fufafu fɔ a wa tɔrɔyɛ sɔrɔn.
Mɔgɔ-wo-mɔgɔ ye foninyɛ fɔla, fɔ a wa kasara tɔrɔyɛ rɔ.
10A ma kin, kun-takolɔn ni taran a diya.
A ma kin fanan, mansɛnu ni to yɔɔnnu kɔrɔ.
11Hɛnkili ye mɔgɛ min na, wo le ye a yisi birala.
Min bi a yɛ lagbanna mɔgɔ sɔn-yogomɛ kun na, wo tigi ara gbiliyɛ di a nyɛrɛ ma.
12Ni mansɛ diminyara i ma, wo mani de iko yarɛ tenbi bɔrɔndɔ-bɔrɔndɔla
kɔnɔ ni a sewara i la, wo mani de i ye iko banda-kun-fɔlɛ.
13Den-kun-takolɔn si a fa rabunden.
Musi min bi gbɛngbɛrɛnna ala kei dala tuma-wo-tuma, wo mani de iko serende tenbi tintila tisili la.
14Mɔgɛ si bɔn anubɛ nɔnfuli sɔrɔn a na anubɛ a fa kɛɛ rɔ
kɔnɔ musu-nyima-sɔrɔn, wo ye bɔla Mari le bolo.
15Tinya-mansɛ si to sani bɔn la,
kɔnkɛ ye a fisikanna.
16Ni min ya Allala tɔnnu bira, wo si simayɛ sɔrɔn
kɔnɔ ni min ya a kan-kɔ sɔ tɔn wonu na, wo ti siyi labɔ.
17Ni mɔgɛ ya fen di bolo-kolɔn ma, a si ma iko a ara Mari le dɔndɔ
bawo wo le ye fen-dilɛ sarala.
18Yanni ila dan ni kenkeriya, i ni a kolo.
Ni i ma wo ma, i wara a dɛnbɛ a nyɛrɛ-kasara-koe ma.
19Mɔgɛ min yisi lakala, a si nanparan lana a nyɛrɛ kuma tiriya!
I tenbi a bɔla nanparan do rɔ, a ye tala nanparan do ratɛgɛla tun.
20Ni i tara i tole masɔ kawandili-kan la ka a bira,
lunyɛ do, fɔ i wa ma hɛnkilimɛ la.
21Mɔgɛ si a miri le
kɔnɔ Mari, wo le ye a latɛgɛla le.
22Yanni mɔgɛ ni ma kɔrɔnditore la ka a bolo-fan kumagbesi,
a fisa worɔ, a ni ma bolo-kolɔn la bawo miliya-koe le foninya-fɔɛ la.
23Ni min ya Mari gbiliya,
wo si simayɛ sɔrɔn ka taran a fanbolo.
24Tinya-mansɛ donu bi nyɔ, hali a wa a dɔgɔma bi
kɔnɔ ka a ladon a nyɛrɛ dɛ rɔ, a ti ke wo mala.
25Ni min si mɔgɛ mayɛlɛn, mɔgɛ wa wo tigi gbesi, wo si a ma, ale kun-takolɔn ni hɛnkili sɔrɔn.
Ni i ya hɛnkilimɛ labila, a si lɔnnɛ sɔrɔn.
26Mɔgɛ min si a na anubɛ a fa gben bɔn la,
wo ara a na anubɛ a fa lamiliya ka anu nayarabi pɔ!
27Nna den, ni i ya i ban karan la,
i ya min lɔn kɔrɔma la, i si na nyina wo ko.
28Sereya-yogoma-bɔlɛnu si yɛlɛn telenbagayɛ ma.
Ko-yogoma-kɛ-sɔgɛ si to karagbɛlɛ birala.
29Mɔgɛ min si to mɔgɛ mayɛlɛnna, tɔrɔyɛ ye wo makɔnɔna.
Gbesili fanan bi kun-takolɔn makɔnɔna.
Kuranko Common Language Bible © The Bible Society in Sierra Leone, 2006.