Hɛnkilimaya-Kumɛnu 20
20
1Baan-minyɛ si mɔgɛ ma yuwɛ anubɛ sɔnkɔtoe la.
Min bi a nyɛrɛ donna wo ko-sufa rɔ, hɛnkilima ma wo tigi la.
2Mansa-diminyanɛ si ma iko yarɛ tenbi bɔrɔndɔ-bɔrɔndɔla.
Mɔgɛ min bi mansɛ ladiminyala, wo tigi ara a niyi fili a rɔ.
3Kun-takolɔn si sɔnkɛ tɛgɛ tiriya
kɔnɔ ni i ko i ni gbiliyɛ sɔrɔn, fɔ i ni i masɛgi wo ko-sufanu na.
4Wɔli-kɛ-wati wa ke, tinya-mansɛ ti sɔn wɔlila,
ado dɔn-fen-tɛgɛ-wati wa ke, a ti fenfen sɔrɔn.
5Mɔgɔ-burɛ lɔn-koe gbɛlɛ iko yi-suri-koe kɔlɔn-yanma-wɛ rɔ
kɔnɔ hɛnkilimɛ si ke mɔgɔ-burɛ surila le.
6Mɔgɔ-siyaman si a fɔ ko, “Mɔgɔ-nyimɛ le nde la”
kɔnɔ mɔgɔ-latelennɛ yen-koe gbɛlɛ.
7Mɔgɔ-latelennɛla dan si sewa
bawo a fa tagamanta telenbagayɛ rɔ.
8Mansa-mayiginɛ tenbi mɔgɛnu kitila,
a si a lɔn min ya ko-yogomɛ ma.
9Ka a fɔ ko, “N yisi gbɛni de!
Sɔn sa n na.” Yon si ke wo fɔla?
10Min si mɔgɔ kensunya anuna fen-suman-fannu na,
wo tigi ma di Mari ye mumɛ!
11Dennɛ si lɔn a kɛ-nya ma, ni a latelenta.
12Mari ya tole di ma ma alako ma ni ko lamɔɛn.
A ya yɛ fanan di ma ma alako ma ni fen yen.
13I kana kinɔgɛ keni ka to kinɔgɔla,
ni wo ma, i si to bolo-kolonyɛ le tɔ.
I yɛ maka woletɔ i si dɔn-fen-siyaman sɔrɔn.
14Mɔgɛ tenbi fan do sanna, a si a fɔ ko, “A dɛ gbɛlɛ”
kɔnɔ a wa ban a sanna tumɛ min, a sewanɛ si ta a fɔ ko, “Kɛ dɛ diyara n na.”
15Dugu-kɔrɔ-nɔnfuli siya
kɔnɔ hɛnkilimaya-kuma-fɔlɛnu ma siya.
16Ni mɔgɛ ya a nyɛrɛ ma yili-bolomɛ#20.16 Yili-bolomɛ: Mɔgɛ min bi a sɔla yilima-tigi ye. la sundan anubɛ duguran tɛma,
a fisa, fen-tigi-bole ni taran ale yili-bolomɛ la.
17Ni mɔgɛ ya dɔn-fan sɔrɔn kensunyɛ rɔ, wo si diya a da rɔ
kɔnɔ wati wa tenbi, a si ma a da rɔ iko wasakɔrɛ.
18Yanni mɔgɛ ni ko ladan, a ni mɔgɛ do nyini min si hɛnkili di a ma.
Hali mɔgɛ ye kɛlɛ-belebele do kɛla, fɔ a ni mɔgɛ donu sɔrɔn minnu si hɛnkili di a ma.
19Ko-rafɔlɛ ti ke gbundi marala.
I masɛgi kuma-pɔrɔtɔparata-fɔlɛ la.
20Mɔgɛ min bi a na anubɛ a fa mɔɛnna,
wo wara-koe ra si de dogbe iko lɛnpu si dufen pinpi rɔ nya min dɔi!
21Mɔgɛ ye nɔnfuli min sɔrɔnna tiriya, a ma tɔrɔ a nyini tinɛ,
nɔnfuli wo ti a laban a bolo bawo duwa sa nɔnfuli wo rɔ.
22Mɔgɔ kana a tayili sara.
I ni dinya Mari kɔma, ale si ila koe bɛɛ latelen i ye.
23Minnu si kensunyɛ kɛ fen-suman-fannu na,
wonu ma di Mari ye.
24Mari le si mɔgɔ wara-koe latɛgɛ.
Mɔgɔ si a nyɛrɛ-fɛ-koe lɔn kama worɔ?
25Ni mɔgɛ ma a miri a dakan-don-tinɛ Mari wara la,
wo si ma a ye iko gbɛrɛ.
26Mansa-hɛnkilimɛ si ala mɔgɛnu tafɛ anu tɔrɔ tinɛ
ka mɔgɔ-radunɛnu bɔ mɔgɔ-latelennɛnu yala.
27Iko mɔgɛ si lɛnpu sigi pinpi rɔ nya min, a ni waan raka,
ma burɛ siginɛ gbɛ rɔ Mari yala wo nya na le.
28Ni mansɛ ko a ni kun ala mɔgɛnu ma,
fɔ a ni keninteyɛ anubɛ latelan bira a bolo tɔ ala mɔgɛnu bara la.
29Mɔgɛ yɛ si bɔ keminɛ-mɛsɛ la bawo fanka-siyaman bi a bolo
kɔnɔ mɔgɛ si kɛmɔgɛ gbiliya bawo a kunyɛ ara gbɛ.
30Min si karagbɛlɛyɛ bɔ mɔgɔ bolo ma, fɔ gbesili anubɛ tanban.
Wo si a ma, a ni ko-yogomɛ boloka ka sɔn-nyimɛ bi.
Kuranko Common Language Bible © The Bible Society in Sierra Leone, 2006.