Hɛnkilimaya-Kumɛnu 18
18
1Mɔgɛ min ti hɔn a ta-nyɔgɛ la fɔ a nyɛrɛ,
wo tigi ye hɛnkilimayɛ lafɛyala.
2Ko-nya-yen ma di kun-takolɔn ye.
Fɔ ka to a nyɛrɛ miriyanu takaranna, wo le di a ye.
3Ko-yogoma-kɛ si miliyɛ lana mɔgɛ kuma.
Miliyɛ si yarabiyi sanba mɔgɛ ma.
4Kumɛ min bi bɔla hɛnkilimɛ da rɔ, a kɔrɛ-lɔn gbɛlɛ iko tungban-kɔrɛ ye nya min.
Ale hɛnkilimɛ si to hɛnkili-kurɛnu nabɔla a da rɔ iko tenke si to bɔla a denkɛ rɔ nya min.
5Mɔgɔ kana lafisayalɛ kɛ ka karagbɛlɛ yiliki ma a yoe la
anubɛ ka mɔgɔ-latelennɛ-yoe ma a yiliki la.
6Kun-takolɔn darɔ-kan si nanparan lana a nyɛrɛ kuma,
ha anu ni a gbesi.
7Kuntanta kumɛ si a ma, a wara-koe ni bui
bawo a ye kumɛ min nabɔla a da rɔ, wo si ma a ye iko gbɛrɛ.
8Nafigila kumɛ si diya mɔgɔ tole la
iko dɔn-fen-diyamɛ si a diya don mɔgɛ rɔ nya min.
9Mɔgɛ min ti wɔlɛ kɛ a kin na,
wonubɛ kasarante rakɛn de!
10Mari le mɔgɔ niyi lakisilɛ la iko so-latankanɛ,
telenbagɛnu si anu buri ka ta anu dogon kan min.
11Nɔnfulu-tigi ya ala nɔnfuli le lɔn ala kisilɛ la.
A ya a lɔn ko tarɛ le ala fen-tigiyɛ wo la, mɔgɛ ti ke tenbila min na.
12Mɔgɔla wasinteyɛ le ye a labuila.
Mɔgɔ-famayiginɛ le ye gbiliyɛ sɔrɔnna.
13Mɔgɔ ni a tole masɔ yanni a ni kumɛ yabi.
Ni min ti wo ma, kun-takolɔn le wo la ado miliyɛ ti bɔ a fɛ.
14Mɔgɛ si ke ka a ragbɛlɛya kirayɛ rɔ
kɔnɔ ni a yigi tɛgɛnɛ a nyɛrɛ la, a ti ke wo mala.
15Hɛnkilimɛ si karan tuma-wo-tuma,
ado tuma-wo-tuma, a ye hɛnkili-kura-nyinɛ la.
16Sanbɛ si kilɛ laka mɔgɛ ye,
ado ni mɔgɔ-ba do yen-sɔgɛ ye i la, i ni a sanba fan do la.
17Mɔgɔ fila wa sɔsɔ, mɔgɔ kelen fɔlɔn ni atɛ rakaran, i si a fɔ ko tonyɛ ye wo le le bolo
kɔnɔ ni a ta-nyɔgɛ fanan ya nyinikalɛ lawuli, i si tɛgɛ ale rɔ.
18Ni mɔgɔ-ba fila sɔsɔra koe dola ko la, wo ni korɔn lakɛ anu tɛma.
Tumado, sɔsɔlɛ wo si ban koron-nakɛ wo fɛ.
19Ni mɔgɛ ya a na-kelen-nyɔgɛ yisi-tinya-koe ladan,
wo burɛ-lɔn-koe gbɛlɛ a bolo iko tarɛ mininɛ soe min ma.
Ala diminyɛ si ma wo tɛma iko tarɛ min dɛ latogonnɛ nɛgɛ-kankan la.
20Hɛnkilimɛ ye kumɛ min nabɔla a dɛ rɔ, wo si fa wo tonɛ la.
A ye fan min sɔrɔnna a darɔ-kan fɛ, wo si a wasa.
21Mɔgɔla kumɛ tenbira niyi anubɛ sayɛ la.
Kuma-siyaman-fɔɛ di min ye, wo si nanparan sɔrɔn ka a tɛgɛ a darɔ-kan ma.
22Ni kei min ya musi sɔrɔn, wo ara fen-nyima sɔrɔn.
A ni a lɔn wo rɔ ko Mari ara ko-nyimɛ kɛ a ye.
23Bolo-kolɔn si a makinikini-kumɛ fɔ madiyalɛ tinɛ
kɔnɔ nɔnfulu-tigi si nyɛɛ a ma a yabi tinɛ.
24Hali mɔgɛ diyana-mɔgɛ si siyaya duk
kɔnɔ mɔgɔ kelen de ye nyɔ anubɛ min si diya ka tenbi a na-kelen-nyɔgɛ la.
Kuranko Common Language Bible © The Bible Society in Sierra Leone, 2006.