Hɛnkilimaya-Kumɛnu 17
17
1Yanni mɔgɛ ni fen dɔn ladiyɛ rɔ rayogobo-yagaba, wobɛ kɔndɔfili,
a fisa, a ni to biredi-gbalɛ dɔnna yisi-kimɛ rɔ.
2Bonna-wɔli-kɛla-hɛnkilimɛ si taran bon-tigila den-milibɛlɛ kun na bɔn la.
Anubɛ bon-tigi wola dannu ta si kɛnya kɛɛ-sɔrɔn rɔ bɔn wo la.
3Sɛnɛ anubɛ wodi-gbɛ kɔrɔ si bɔ tɛ rɔ
kɔnɔ Mari le si mɔgɔ yisi kɔrɔbɔ.
4Karagbɛlɛ si a tole masɔ a karagbɛlɛ-nyɔgɛ kuman-kan la.
Foninya-fɔlɛ si a tole masɔ a foninya-fɔ-nyɔgɛ la.
5Min bi yɛlɛnna bolo-kolɔn ma, wo ara bila a Dali-Mari la.
Min bi yɛlɛnna mɔgɔ-magboyanɛ ma, wo fanan si ata tɔrɔyɛ sɔrɔn.
6Benbe si a wasi a mamanɛ la
iko dan si a wasi a fa la nya min.
7I ti i miri hɛnkilimaya-kumɛ ma kun-takolɔn bolo nya min,
i ti i miri foninyɛ fanan ma kun-tigi bolo wo nya na le.
8Mɔgɛ donu ya a lɔn ko anu si kabana-koe ladan dogonta-fan la.
Anu ya a lɔn ko a si koe bɛɛ nyinya anu ma.
9Ni i ko i ni diya mɔgɛnu ye, fɔ i ni anu sɔn yamatogon.
Ni i tora anu sɔn fɔla, i ti i diyana-mɔgɛ sɔrɔn.
10Makuma kelan si ko-nyinya hɛnkilimɛ ma
ka tenbi bosɛ dan-nya kɛmɛ la kuntan ma.
11Mɔgɔ-yogomɛ si to murutiyɛ kun na,
ado anu bi min natala wo bira tinɛ, ni wo kera a ma, a ti kinikini a ma.
12Yanni i ni kun-takolɔn taran masiba-koe ladanna,
a fisa, i ni yara-denbɛ taran minna dannu bara tunu a ma.
13Ni mɔgɛ ya ko-nyimɛ sara ko-yogomɛ la,
yakɔrɔ-mamɔɛ ti bɔ ala bɔn la.
14Ka sɔsɔlɛ lawuli, wo mani de iko yi wa balan sɔgɔ.
I ni sɔsɔlɛ wo ban yona alako a kana na to koloyala.
15Ka yo-tigi yiliki anubɛ ka mɔgɔ-yilikinɛ boloka,
wo fenfen ma di Mari ye.
16Hali yuwɛ ya karan san,
a ti ko nyinya a ma bawo yi sa a kunyɛ rɔ.
17A bɛnta diyana-mɔgɔ filɛ ni to keninteyɛ yirala anu nyɔgɔn na.
A fisa, mɔgɛ ni a na-kelen-nyɔgɛ dɛnbɛ tɔrɔyɛ rɔ.
18Hɛnkili sa mɔgɛ min na,
wo le ye a sɔla yili-bolomayɛ la mɔgɛnu tɛma.
19Sɔsɔli-sɛ di mɔgɛ min ye, hakɛ di wo tigi ye.
Nyɛrɛ-matɔgɔlɛ anubɛ nanparan ti fara.
20Karagbɛlɛ ti da lafaga.
Kuma-fila-fɔlɛ anubɛ nanparan le.
21Ni mɔgɛ ya den-kun-takolɔn sɔrɔn, a si nimisa.
Ni mɔgɛ ya den-karagbɛlɛ sɔrɔn, a ti sewa wola ko la.
22Ni-radiyɛ anubɛ kɛndɛyɛ le ye tala anu nyɔgɔn fɛ
kɔnɔ yisi-tinya si mɔgɔ-siyi madɔgɔya.
23Kiti-tɛgɛla-yogomɛ si dogonta-fan bira.
Wo ko-sunu si telenbagayɛ tinya.
24Hɛnkilimɛ si to a yɛ lakalanna ka hɛnkilimayɛ makofu
kɔnɔ kun-takolon-miriya si ta kan tinɛ bɛɛ rɔ.
25Kun-takolɔn si diyi-kɛ anubɛ yakɔrɔ-mamɔɛ sanba a sɔrɔnnɛnu ma.
26A ma kin, mɔgɛ ni ko-tinyabɛlɛ tɔrɔ.
Ni mɔgɔ-ba ye ko-latelennɛ kɛla, a ma kin, mɔgɛ ni wo gbesi wola ko la.
27Kuma-pɔrɔtɔ-parata-fɔɛ ma di ko-lɔnnɛ ye.
Mɔgɛ min si ko nya-yen, wo yisi ti bɔ yona.
28Ni kun-takolɔn kera kunna a dɛ ma,
mɔgɛnu si a lɔn de hɛnkilimɛ la.
Kuranko Common Language Bible © The Bible Society in Sierra Leone, 2006.