Hɛnkilimaya-Kumɛnu 16
16
1Mɔgɔ si kuma kɔnɔ Mari, wo ye a mala le.
2Mɔgɔ kɛ-nya kin a nyɛrɛ ya la
kɔnɔ Mari wo ma fili ma sɔndɔmɛ ma.
3I ni i fɛ-koe bɛɛ dantɛgɛ Mari ma,
woletɔ ni i ya i bole don ko-wo-ko rɔ, wo si ta yarɔ.
4Mari ya ko-wo-ko ma, wo ma-kɔrɛ ye nyɔ.
Hali karagbɛlɛnu, a ye wonu namarala kiti-tɛgɛ-telela ko la.
5Mɔgɔ-wasinɛ wo fenfen ma di Mari ye.
Wo ni la a la serr, ko anu bi tɔrɔla le, yɔ!
6Keninteyɛ anubɛ tonyɛ si a ma, mɔgɔ hakɛ ma si koto.
Mɔgɛ min bi kilanna Mari la, wo si fara le ko-yogoma-kɛ la.
7Ni i kɛ-nya ya Mari hɛnɛ,
hali i yoge, Mari si wo ma i diyana-mɔgɛ la.
8Yanni i ni nɔnfulu ladɛn kensunteyɛ la,
a fisa, hali i ya doni de sɔrɔn telenbagayɛ rɔ, wo kin.
9Mɔgɔni-gbuyi si ke a mirila koe ma a burɔ
kɔnɔ Mari wo ye a latɛgɛla le.
10Mansɛta kumɛ mani de iko Maritɛ.
A wa kiti-wo-kiti tɛgɛ, tonyɛ le wo la.
11Ka fan suman telenbagayɛ la, wo ye bɔla Mari le bolo,
ado Mari ti sɔn kensunteyɛ ma.
12A ma bɛn, karagbɛlɛyɛ ni diya mansɛ ye
bawo telenbagayɛ le ye a mala, mansayɛ ni to sɛnbɛ rɔ.
13Tonya-fɔlɛnu di mansɛ ye,
ado min bi tonyɛ fɔla a ye, wonu denu si a hɛnɛ.
14Ni mansɛ diminyara, tumado, mɔgɛ do si na faga
kɔnɔ hɛnkilimɛ si mansɛ wota fondo-bɔɛ makima.
15Ni mansɛ sewara i la, i niyi ra si diya i ma.
Ala sewɛ wo si diya mɔgɛ ye iko banda-kun-fɔlɛ wa bui dugi ma.
16Yanni i ni sɛnɛ-siyamɛ sɔrɔn, a fisa, i ni hɛnkili sɔrɔn.
Yanni i ni wodi-gbɛ-siyaman sɔrɔn, a fisa, i ni lɔnnɛ sɔrɔn.
17Mɔgɔ-nyimɛ ye bilala kila-telennɛ min fɛ, wo kanɛ le ko-yogoma-kilɛ ma.
Ni min ya a tagama-tinɛ yabɔ, wo si simayɛ sɔrɔn.
18Mɔgɔ-wasinɛ ti mɛ buila.
Wasinteyɛ si mɔgɛ kasara.
19Yanni wobɛ mɔgɔ-wasinɛnu ni nɔnfuli tala wo nyɔgɔn tɛma,
a fisa, i ni to sigini bolo-kolonyɛ rɔ mɔgɔ-famayiginɛnu tɛma.
20Ni i ya i tole masɔ i labilalɛ la, i wara-koe si ta yarɔ.
Mɔgɛ min lara Mari la, wo si sewa.
21Mɔgɛnu bi a kalama ko hɛnkilimɛ si koenu nakɔrɔsi ka ko-latelennɛ kɛ a kilɛ fɛ.
A kuma-nya si a ma, ala karan-den ni ta yarɔ.
22Hɛnkilimayɛ si simayɛ di a tigi ma
kɔnɔ kuntanyɛ si kuntannu tɔrɔ.
23Yanni hɛnkilimɛ ni kuma, a si a miri.
Ni a ya kuma-wo-kuma fɔ, hɛnkilimaya-kuma-bɛrɛbɛrɛ le wo la min si mɔgɛ karan a kilɛ fɛ.
24Kuma-nyimɛ mani de mɔgɔ da rɔ iko liyi.
A si a ma, mɔgɛ ni sewa, ado a si mɔgɔ fɛrɛ-bɔnkɛ dɛnbɛ.
25 #
Hɛnkilimaya-Kumɛnu 14.12
Mɔgɛ ye a mirila ko ala kilɛ kin ale nyɛrɛ yala
kɔnɔ tɔ-a-la, wo si ma a bolo saya-kilɛ la.
26Fen-dɔn-sɔgɛ ye mɔgɛ min na, wo le ye a rayala wɔlɛ ma,
ado kɔnkɛ min bi a birala, wo fanan si a ma, a ni a sɛbɛ don.
27Yanfante si to ko-yogomɛ mala mɔgɛnu na.
Hali a ye kumɛ min nabɔla a dɛ rɔ, wo si mɔgɛ mamintan.
28Karagbɛlɛ si to kɛlɛ lawulila.
Nafigi si diyana-mɔgɔ filɛ fara anu nyɔgɔn na feu!
29Karagbɛlɛ si a ta-nyɔgɛ bɔ kila-nyimɛ fɛ.
A si a lasama kilɛ ma.
30Karagbɛlɛ si yanfɛ don a ya-lakalan-bole fɛ ko-yogomɛ rabɛn-tinɛ.
A tenbi ko-yogomɛ mala, a si a dɛ don a kɔrɔ.
31Simayɛ le telenbagɛ sarɛ la,
ado a kun-gbɛ si ma a gbiliya-fan la.
32Yanni i ni sɛnbɛ sɔrɔn ka so-kun kelan gbesi,
a fisa, i ni kun i nyɛrɛ ma ka i nyɛrɛ mara.
33Mɔgɛ si hɛnkili nyini koron-nakɛ fɛ
kɔnɔ a ye koe min nadanna wo la, Mari le ye wo kɔrɛ yirala a la.
Kuranko Common Language Bible © The Bible Society in Sierra Leone, 2006.