Hɛnkilimaya-Kumɛnu 15
15
1Kuma-makimani-fɔɛ si mɔgɔ-yisi-bɔnɛ kimɛ
kɔnɔ kuma-yogoma-fɔɛ si tɛ tugu mɔgɔ-yisi-bɔnɛ la.
2Hɛnkilimɛta kumɛ si hɛnkili di mɔgɛnu ma
kɔnɔ kuntanya-kumɛ si to tugula kuntan dɛ rɔ.
3Mari kolan ye kan-tinɛ bɛɛ la.
Hali a nyimɛ anubɛ a yogomɛ, a si wo bɛɛ yen.
4Kuma-nyimɛ si simayɛ di mɔgɛ ma
kɔnɔ kuma-yogomɛ si mɔgɔ yisi tinya pɔ!
5Ni min ya a kan-kɔ sɔ a fala kawandili-kan la, yuwɛ le wo tigi la
kɔnɔ ni min ya wo bira, hɛnkilimɛ le wo tigi la.
6Fen-koloma-siyaman bi mɔgɔ-latelennɛ bolo
kɔnɔ karagbɛlɛta tɔnɛ ma fenfen na fɔ tɔrɛ.
7Hɛnkilimɛ si lɔnnɛ ranyɛnsɛn mɔgɛnu tɛma
kɔnɔ kuntanyɛ ti wo ma.
8Hali karagbɛlɛla sarakɛ, Mari ti sɔn a la
kɔnɔ mɔgɔ-latelennɛ tenbi a madiyala, wo di ale Mari ye kosɛbɛ!
9Karagbɛlɛ kɛ-nya ma di Mari ye
kɔnɔ mɔgɛ min bi ko-latelennɛ mala, wo le di Mari ye.
10Min bi kila-latelennɛ bolokala, wo si makololi-belebele sɔrɔn.
Ni min ya a kan-kɔ sɔ kawandili-kan la, a ti siyi labɔ.
11Hali sayɛ min dogonnɛ, ni Mari ye wo yenna,
kumanato a ti ke male mɔgɔni-gbuyi-miriya lɔnna.
12A ma di mɔgɔ-famayɛlɛnɛnu ye, mɔgɛ ni anu denu kawandi.
Anu ti sɔn tala hɛnkilimɛnu bara anu makawandi-koe rɔ.
13Mɔgɛ min sewanɛ a burɔ, wo si to yɛlɛnna mukuyɛɛ!
Yakɔrɔ-mamɔɛ si a ma, mɔgɛ ni a funu.
14A sɔgɛ ye hɛnkilimɛ la, a ni a kunyɛ lafa lɔnnɛ la
kɔnɔ kuntan si kuntanyɛ gburu a gban rɔ.
15Bolo-kolon-gbɛ yisi lafanɛ kɔndɔfili le la
kɔnɔ min si wasa a bolotɛ kuma, tuma-wo-tuma wo sewani de!
16Yanni i ni ma nɔnfulu-tigi la, i yakɔrɔ-mamɔnɛ,
a fisa worɔ, i ni fen-ni sɔrɔn, i kilannɛ Mari la.
17Yanni wo ni to sogo-kɛɛnmɛ dɔnna, koninteyɛ ye wobɛ wo na-kelen-nyɔgɛnu tɛma,
a fisa, wobɛ wo na-kelen-nyɔgɛnu ni to sɔsɛ dɔnna keninteyɛ rɔ.
18Mɔgɛ min yisi lakala, a si a ma, kɛlɛ ni ta yarɔ tiriya
kɔnɔ min si a munyu, wo si kɛlɛ-wuyan bɔ a la.
19Tinya-mansɛ ye tala kila-wo-kila fɛ, a si a fɔ ko wɔnɛnu bi kilɛ wo la
kɔnɔ mɔgɔ-latelennɛ ye tala kan-bo-kan, wola kilɛ lakani de a yala fagba!
20Den-hɛnkilimɛ si a ma, a sɔrɔnnɛnu ni sewa
kɔnɔ kuntan si yoo anu ma.
21Kuntan si to sewala ala kuntanyɛ rɔ
kɔnɔ hɛnkilimɛ si to ko-latelennɛnu nadanna.
22Ni mɔgɛ min ma a kawandililɛ sɔrɔn, wo ti ta yarɔ.
Ni min ya a kawandililɛ sɔrɔn, wo wara-koe si ta yarɔ.
23Mɔgɛ min si kumɛ yabi hakikɛ-kɛ, wo si a diya don a nyɛrɛ rɔ,
ado ni a ya kumɛ labɔ a tumɛ rɔ, wo fanan di a ye.
24Hɛnkilimɛ si to simaya-kilɛ fɛ min si a tanka ka a bɔ saya-kilɛ ma.
25Mari si mɔgɔ-wasinɛnu kɔmɛ rade dogbe
kɔnɔ a si kɛɛ-musi latanka ka a wara-koe lasabati.
26Miriya-yogomɛnu ma di Mari ye
kɔnɔ kuma-nyima-fɔlɛta kumɛnu sɛninyanɛ a yala.
27Tɔnɔ-yogoma-nyininɛ si nanparan lana a kebilɛ kuma
kɔnɔ min ti sɔn dogonta-fan la, wo si simayɛ sɔrɔn.
28Mɔgɔ-latelennɛ si a miri kuma-yabi-tinɛ
kɔnɔ kuma-yogomɛ-latiri ye bɔla mɔgɔ-yogomɛ dɛ rɔ.
29Mari si a wɔlɔ matɔlɔ mɔgɔ-latelennɛnuna madiyalɛnu na
kɔnɔ Mari fɛ-yan karagbɛlɛnu na pon!
30Ni mɔgɛ ya a yakɔrɔ-nyimɛ yira i la, wo si a ma, i yisi ni sewa,
ado kuma-nyimɛ si a ma, mɔgɔ niyi ra ni diya a ma.
31Mɔgɛ min si sɔn a tole masɔla kawandili-kan la,
a di wo ye ka to sigini hɛnkilimɛnu tɛma tuma-wo-tuma.
32Ni min ye a kan-kɔ sɔla latelan la, wo tigi ma di a nyɛrɛ ye
kɔnɔ ni min sɔnta labilɛ ma, wo tigi si ko nya-yen.
33Ni mɔgɛ kilanta Mari la, a si hɛnkilimayɛ wara-koe karan.
Yanni mɔgɛ ni gbiliyɛ sɔrɔn, fɔ a wa a nyɛrɛ famayigi.
Kuranko Common Language Bible © The Bible Society in Sierra Leone, 2006.