Hɛnkilimaya-Kumɛnu 14
14
1Musu-hɛnkilimɛ si ala denbayɛ sɔ
kɔnɔ musu-kun-takolɔn si ala denbayɛ wayan ka a tii mɛmɛ!
2Mɔgɔ-latelennɛ si kilan Mari la
kɔnɔ karagbɛlɛ kɛ-nya si a yira ko Mari ma di a ye.
3Kun-takolɔnta-kumɛ si bosɛ sagan a nyɛrɛ kan ma
kɔnɔ hɛnkilimɛta kumɛ si a tanka tɔrɔyɛ ma.
4Ni sara-ninki sa mɔgɛ min bolo, wola bira-belebele lafani ma dɔn-fan la.
Sara-ninkita-sɛnbɛ si a ma, dɔn-fan ni boroko-baraka.
5Sereya-bɔla-nyimɛ ti foninyɛ fɔ
kɔnɔ sereya-bɔla-yogomɛ si foninya-gbansan de fɔ.
6Hali mɔgɔ-famayɛlɛnɛ ya hɛnkili nyini, a ti a sɔrɔn
kɔnɔ hɛnkilimɛ si ko lɔn yona.
7I kana na i gbɛrɛn kun-takolɔn ma
alako a kana na i karan kuntanyɛ la.
8Nfenna hɛnkilimɛ bolo la ti bira? Bawo yanni a ni ko-wo-ko ma, fɔ a wa a miri fɔlɔn.
Nfenna kuntan si yuwaya-koe ladan? Bawo a ye ko-wo-ko ladanna, a ya a lɔn ko a ye tonyɛ le tɔ kɔnɔ wo fɛ-yan a la.
9Mɔgɛ min si kilan hakɛ la ka a sɔn latelen, kun-takolɔn si yɛlɛn de wo ma.
Kɔnɔ ko-telenni-kɛ si diya mɔgɔ-latelennɛ ye.
10Mɔgɔ kelen pe ya ata tɔrɔyɛ anubɛ sewɛ dan lɔn.
Mɔgɔ-gbɛrɛ ti ke wo nya lɔnna a bolo.
11Mɔgɛ min karagbɛlɛ, ko ti bɔ wo kɔmɛ rɔ
kɔnɔ mɔgɔ-latelennɛ kɔmɛ si to sabatila.
12 #
Hɛnkilimaya-Kumɛnu 16.25
Tumado, mɔgɛ donu si a lɔn ko anu bi kila-nyimɛ le fɛ
kɔnɔ yaga, kanbarɔ-ta-kilɛ le wo la.
13Mɔgɛ do tɔrɔnɛ si taran kɔnɔ hali wo, a si yɛlɛn.
Sewɛ do si a laban tɔrɔyɛ ma.
14Mɔgɔ-yogomɛ si atɛ sɔrɔn ka a tɛgɛ ata ko-yogoma-kɛ ma
kɔnɔ mɔgɔ-nyimɛ si a sarɛ sɔrɔn ala ko-nyima-kɛ rɔ.
15Kuma-wo-kuma fɔra kun-takolɔn ye, a si la wo la
kɔnɔ hɛnkilimɛ si a miri a ta tinɛ ma fɔlɔn.
16Hɛnkilimɛ si kilan Mari la, a ni a bole bɔ ko-yogomɛ rɔ.
Kɔnɔ kun-takolɔn ti a miri ko-ladan tinɛ. A kunyɛ wa wuli koe min na, a ye wo le ladanna.
17Mɔgɛ min yisi lakala, a si kuntanya-koe ladan
kɔnɔ hallintore kusan a yisi birala.
18Kuntan ti fenfen sɔrɔn ata kuntanyɛla ko la fɔ yuwayɛ
kɔnɔ hɛnkilimɛ barayi le lɔnnɛ la.
19Tɔ-a-la, karagbɛlɛnu si to anu madula mɔgɔ-latelennɛnu ye.
Mɔgɔ-yogomɛnu si na anu madu mɔgɔ-nyimɛnu ye.
20Bolo-kolɔn ti diya hali a sigi-nyɔgɛ ye
kɔnɔ fen-tigi si diya mɔgɛ bɛɛ ye tɛrr!
21Ni min ya a yɛ layigi a sigi-nyɔgɛ ma, wo tigi ara hakɛ kɛ.
Kɔnɔ ni mɔgɔ-wo-mɔgɔ ya ko-nyimɛ kɛ bolo-kolɔn ye, wo tigi si barayi sɔrɔn.
22Min bi ko-yogomɛ rabɛnna a hadama-den-nyɔgɛ kan ma, ko-nyima-kilɛ si to-a-rɔ wo ma.
Kɔnɔ min bi ko-nyimɛ rabɛnna a hadama-den-nyɔgɛ ye, wo si diya mɔgɛnu ye. Anu si la a la fanan.
23Wɔli-belebele si tɔnɛ di mɔgɛ ma
kɔnɔ kuma-teleka-teleka-fɔɛ si bolo-kolonyɛ lana mɔgɛ ma.
24Hɛnkilimɛ makiri-fan le ala nɔnfuli la
kɔnɔ kun-takolɔn si lɔn ata kuntanyɛ fɛ.
25Sereya-bɔla-nyimɛ si mɔgɔ-niyi lakisi
kɔnɔ sereya-bɔla-yogomɛ si mɔgɛ yanfa.
26Ni min kilanta Mari la, wo yili latɛgɛni de,
ado anubɛ ala denbayɛ la si fɛrɛ.
27Ka kilan Mari la, wo si simayɛ di mɔgɛ ma iko tenke min ti gbala,
ado kilan wo si a latanka gbɛrɛ ma min si mɔgɛ bira saya-kilɛ ma.
28Mɔgɛnu siya nya min, mansɛla gbiliyɛ ye koloyala wo nya na le,
ado ni mɔgɛnu ma, fenfen ma ale kun-tigi la.
29Ni min si ke a yisi birala, hɛnkilimɛ le wo la.
Kɔnɔ mɔgɛ min ti ke a yisi birala, wo ye a yirala ko hɛnkili sa a la.
30Yisi-kimɛ si kɛndɛyɛ di mɔgɛ ma
kɔnɔ keliyɛ si mɔgɔ-kole tuli.
31Min bi balanna bolo-kolɔnla bolo-fan ma, wo tigi ara bila Alla la
kɔnɔ min bi a kɛ-nya-nyimɛ yirala bolo-kolɔn la, wo mani de iko a ye Alla le gbiliya tinɛ.
32Karagbɛlɛla karagbɛlɛyɛ si a labui
kɔnɔ hali sayɛ wa gbɛrɛn tumɛ min, mɔgɔ-latelennɛnu na si fɛrɛ.
33Hɛnkili si a sa-bole rabɛn hɛnkilimɛ kunyɛ rɔ.
Hali kuntan si hɛnkili yen hɛnkilimɛ rɔ.
34Telenbagayɛ si a ma, nyamanɛ ni ta yarɔ
kɔnɔ hakɛ si mɔgɛnu nayarabi pɔ!
35Mansɛ si sewa ala wɔli-kɛla-nyimɛ la
kɔnɔ a yogomɛ min ti sɔn ala wɔlɛ kɛla, ale mansɛ si wo tɔrɔ.
Kuranko Common Language Bible © The Bible Society in Sierra Leone, 2006.