Hɛnkilimaya-Kumɛnu 13
13
1Den-hɛnkilimɛ si a fala kawandili-kan bira
kɔnɔ mɔgɛ min si mɔgɔ mayɛlɛn, wo ti kawandili-kan bira.
2Mɔgɔ-nyimɛ si barayi sɔrɔn a darɔ-kan fɛ
kɔnɔ karagbɛlɛ sigi-kunya le ko-yogoma-kɛ la.
3A ma i fɛrɛma kuma-tinɛ woletɔ i niyi la si tanka.
Kɔnɔ mɔgɛ min ti a miri kuma-tinɛ, a si a nyɛrɛ kasara yona.
4Fan-sɔgɛ ya tinya-mansɛ bira nya-wo-nya, a ti a sɔrɔn
kɔnɔ sɛbɛ-donnɛ nyinita fenfen ma, a si wo sɔrɔn.
5Foninyɛ ma di mɔgɔ-latelennɛ ye
kɔnɔ karagbɛlɛla kumɛ si na miliyɛ anubɛ yarabiyi la a ma.
6Ko-telenni-kɛ si mɔgɔ-latelennɛ kandan
kɔnɔ karagbɛlɛyɛ si hakɛ-tigi labui fugbu!
7Mɔgɛ donu bi anu nyɛrɛ mala iko fen bi anu bolo kɔnɔ i si na a taran gbɛ, anu bolo-kolɔn gbɛ perr!
Mɔgɛ donu bi anu nyɛrɛ mala bolo-kolɔn la kɔnɔ yaga, fen bi anu bolo duk!
8Fen-tigi si a nyɛrɛ kunka wodi la
kɔnɔ bolo-kolɔn ti yakɔrɔ-mamɔɛ sɔrɔn wo ko-sunu tɔ.
9Mɔgɔ-telennɛnu bi malanna le iko kuru-lɛnpu
kɔnɔ karagbɛlɛnu manɛ iko lɛnpu min dufennɛ.
10Wasinteyɛ si na kɛlɛ-nyɔgɔnyɛ le la
kɔnɔ min si a tole masɔ kawandili-kan la, hɛnkilimɛ le wo tigi la.
11Mɔgɛ ye wodi min sɔrɔnna yanfanteyɛ la, fɔnyɔ le ye sigila wodi wo kɔrɔ.
kɔnɔ min bi wodi ladɛnna doni-doninyɛ ma, wola nɔnfuli si siyaya a bolo ka sabati.
12Ni i yili-madiyanɛ fan do la kɔnɔ i ma a sɔrɔn, i yisi si tinya.
kɔnɔ ni i yili-madiyanɛ fan do la, i ni wo sɔrɔn, i niyi ra si diya i ma.
13Ni mɔgɛ tɛgɛra kawandili-nyimɛ rɔ, wo si a ma, a ni bui
kɔnɔ min bi lala kawandili-kan la, a ye ko-nyinyala wo le ma.
14Hɛnkilimɛta karan mani de iko tenke-hakikɛ,
ado karan wo si mɔgɛ dɛnbɛ ka a bɔ sayɛ da la.
15Mɔgɛ si hɛnkilimɛ gbiliya
kɔnɔ lanayɛ sa min tɔ, wola ban-bole si gbɛlɛya.
16Yanni hɛnkilimɛ ni ko-wo-ko ma, fɔ a wa a miri
kɔnɔ bɛɛ si kun-takolɔnla kuntanyɛ lɔn.
17Kilaya-lakɛla-yogomɛ si yakɔrɔ-mamɔɛ lana mɔgɛnu kuma
kɔnɔ kilaya-lakɛla-nyimɛ si yisi-kimɛ di mɔgɛnu ma.
18Mɔgɛ min bi a kan-kɔ sɔla kawandili-kan la, wo si to yarabiyi anubɛ bolo-kolonyɛ rɔ.
Min si a tole sigi kawandili-kan kɔrɔ, wo si to gbiliyɛ rɔ.
19Ni mɔgɔ yili-madiyanɛ fan do la, a wa a sɔrɔn, a si sewa.
Kuntan ti sɔn a sɔn-yogomɛ boloka-koe ma.
20Ni mɔgɛ tora a gbɛrɛnna hɛnkilimɛnu ma, ale fanan si ma hɛnkilimɛ la
kɔnɔ ni mɔgɛ tora a gbɛrɛnna kun-takolɔnnu ma, ale fanan si tɔrɔ anu fɛ.
21Kasarɛ si bila ko-yogoma-kɛlɛnu fɛ
kɔnɔ mɔgɔ-latelennɛ si hɛrɛ sɔrɔn.
22Mɔgɔ-nyimɛ mamanɛnu si do sɔrɔn a kɛɛ rɔ
kɔnɔ hakɛ-tiginu bolo-fannu bi tola mɔgɔ-latelennɛ denu ye.
23Bolo-kolɔnnu si ke fen sɔrɔnna le anuna sɛnɛnu tɔ
kɔnɔ ni anu ma anu tanka telenbɛlɛnu ma, wonu si wonu bɔ anu bolo.
24Ni i ma ila dan kolo, ila dan ma di i ye.
Ni minna dan di a ye, a si a kolo a kin na!
25Kɔnkɛ ti mɔgɔ-telennɛ bira
kɔnɔ karagbɛlɛ ti a buyi lafa mumɛ!
Kuranko Common Language Bible © The Bible Society in Sierra Leone, 2006.