Hɛnkilimaya-Kumɛnu 12
12
1Ni min si sɔn latelan ma, lɔnnɛ di wo tigi ye
kɔnɔ ni min ti sɔn latelan ma, kun-takolɔn le wo la.
2Mari diyana-mɔgɛ le mɔgɔ-nyimɛ la
kɔnɔ a si yanfante tɔrɔ.
3Mɔgɔ ti ko lasa karagbɛlɛyɛ rɔ
kɔnɔ ni mɔgɔ-latelennɛ ya ko lasa, a la ti maga tun.
4Furu-musu-nyimɛ si a ma, ala kei ni sewa ala ko la
kɔnɔ musu-kɔndɔgbɔɛ si ala kei tɔrɔ iko kolota-kirayɛ wa mɔgɔ bira.
5Mɔgɔ-latelennɛ le si a miri telenbagayɛ ma
kɔnɔ mɔgɔ-yoge-miriya bɛnnɛ yanfanteyɛ le ma.
6Mɔgɔ-yoge-darɔ-kan bɛnnɛ mɔgɔ-fagɛ le ma
kɔnɔ mɔgɔ-nyimɛ-darɔ-kan si mɔgɔ dɛnbɛ ka a kisi.
7Mɔgɔ yogela ban-bole si a ma, a ti a nyɔgɔn to tun
kɔnɔ mɔgɔ-latelennɛ tɔgɔ ti tunu.
8Mɔgɔ si hɛnkilimɛ gbiliya iko a ye ala hɛnkilimayɛ lawɔlila nya min
kɔnɔ kuntan ma di mɔgɛnu ye.
9Yanni mɔgɛ ni a nyɛrɛ ma iko fen-tigi, kɔnkɛ ye ala bɔn la,
a fisa, a ni wɔli alako a ni a beli-fan sɔrɔn.
10Mɔgɔ-nyimɛ kusan ala kolo-fannu fɛ-birala
kɔnɔ karagbɛlɛ ye anu bira boloko-yogomɛ le kɛla.
11Dɔn-fan ti dasa wɔli-kɛla-nyana-warɛ bɔn la
kɔnɔ mɔgɛ min ti sɔn a nyɛrɛ tɔrɔ koe ma fɔ ka nɔnfulu-lakalamɛ nyini, hɛnkilima ma wo la.
12Karagbɛlɛ si nyini a karagbɛlɛ-nyɔgɛ le bolo-fan ma.
Kɔnɔ mɔgɔ-latelennɛ munna ara faga bawo a mani de iko kɔlɔma min si gbɔ yisikiri!
13Mɔgɔ-karagbɛlɛ si bira a nyɛrɛta kuma-yogomɛ la iko gbɛrɛ
kɔnɔ mɔgɔ-latelennɛ kunyɛ si bɔ tɔrɔyɛ rɔ.
14Mɔgɔ ye tɔnɛ sɔrɔnna ala kuma-nya-nyimɛ le fɛ,
ado a si barayi sɔrɔn iko a kɛ-nya-nyimɛ ye nya min.
15Tuma-wo-tuma, kuntan ye a mirila ko a ye tonyɛ le tɔ
kɔnɔ hɛnkilimɛ si kawandili-kan bira.
16Kuntan si kɔrɔtɔ tiriya
kɔnɔ manyini-kumɛ bɔrɔ ti taran hɛnkilimɛ ye.
17Sereya-bɔla-nyimɛ si tonyɛ fɔ
kɔnɔ sereya-bɔla-yogomɛ si foninyɛ le fɔ.
18Kuma-yogoma-fɔlɛla kumɛ si to mɔgɔ-sɔn sɔgɔla a rɔ
kɔnɔ hɛnkilimɛta kumɛnu si to mɔgɔ yisi-kimɛla.
19Siyi ye tonyɛ la burubukai
kɔnɔ siyi sa foninyɛ la feu!
20Minnu miriya bɛnnɛ ko-yogomɛ ma, yanfante le wonu na
kɔnɔ mɔgɛ min bi yisi-kimɛ lanala mɔgɛnu tɛma, wonu si sewa.
21Ko-yogoma ti ma mɔgɔ-latelennɛnu na
kɔnɔ karagbɛlɛ-sarɛ le yakɔrɔ-mamɔɛ la.
22Foninya-fɔlɛ ma di Mari ye
kɔnɔ mɔgɛ min si a darɔ-kan latɔnbagaya, wo le di Mari ye kosɛbɛ!
23Hɛnkilimɛ ya ko-wo-ko lɔn, a ti a nyɛrɛ matɔgɔ wo rɔ
kɔnɔ kuntan si lɔn ata kuntanya-kumɛnu fɛ.
24Mɔgɛ min sɛbɛ wɔlɛ ma, wo si sɛnbɛ sɔrɔn mɔgɛnu tɛma
kɔnɔ tinya-mansayɛ si mɔgɛ ma yɔɔn la.
25Hɔnya si sigi mɔgɛ kuma iko dunɛ
kɔnɔ kɔntɔ-diya-kumɛnu si a ma, a ni sewa.
26Mɔgɔ-latelennɛ si kila-nyimɛ sa a diyana-mɔgɛ kɔrɔ
kɔnɔ mɔgɔ-yogomɛ si a ta-nyɔgɛ bila kila-yogomɛ fɛ.
27Donse min tinyanta, sogo ti taran wola dagɛ rɔ
kɔnɔ mɔgɛ min si a raya a tanyinɛ ma, wo si ma fen-tigi la.
28Telenbagayɛ si simaya-kilɛ yira mɔgɛ la,
ado kilɛ wo dan sa.#12.28 Ado kilɛ wo dan sa: Kitabu donu ko, “Kɔnɔ wunduyogoyɛ le saya-kilɛ le la.”
Kuranko Common Language Bible © The Bible Society in Sierra Leone, 2006.