Yilan-Yilan Koe 28
28
Tele-wo-Tele-Sarakɛnu
(Bɔ-Koe-Iyipiti 29.38-46)
1Mari ya a fɔ Musa ye ko, 2“I ni Isirɛla mɔgɛnu nabila saraka-bɔ-nya la. Anu si sarakɛ bɔ nde, Mari ye a wati-latɛgɛnɛ rɔ. Ni anu ya minnu mintan nde ye, wo sumɛ si a diya don n tɔ.”
Musa ya sarakanɛ kɛ latenbi Isirɛla mɔgɛnu ma iko Mari ya a fɔ a ye nya min. A ko, 3“Saraka-mintantɛ le kɛ la wo si min dantɛgɛ Mari ma. Tele-wo-tele, wo si na saga-yigi fila la wo bolo. Sagɛ wonu si ma san-kelen-sagɛ la fɛɛ sa minnu na. 4Sɔgɔma, wo si kelen mintan gburr! Suyi rɔ, wo si kelen fanan mintan gburr! 5Wo kɔma, wo si dɛgɛ-munke pani-kunbɛ-nya kelen bi ka a ramaga tulu-hakikɛ kilasi-nya nani na ka wo sa saga-sarakɛ wonu kuma. 6-8Wo ni nɔnbɔ-gbɔ-yi-feremɛ kilasi-nya nani bi ka a kɛ saraka-bɔ-tinɛ kuma sarakɛ wonu fɛ. Wo ni sarakɛ bɔ wurɛ la iko wo si sɔgɔmatɛ ma nya min. Wo si wo damasi mintan anu nyɔgɔn fɛ Mari ye gburr, anu bi minnu fɔlɔn bɔla sarakayɛ la Sinayi kɔnkɛ kuma. Wonu sumɛ si diya Mari ye bɛrɛkɛ!
Sulen-Tele-Sarakɛnu
9“Wola Sulen-Tele ma, wo si na saga-yigi fila la wo bolo. Sagɛ wonu si ma san-kelen-sagɛ la fɛɛ sa minnu na. Wo kɔma, wo si dɛgɛ-munke pani-kunbɛ-nya kelen bi ka a ramaga tulu-hakikɛ kilasi-nya fila la ka wo sa saga-sarakɛ wonu kuma anubɛ wo nyɔgɔn nɔnbɔ-gbɔ-yi. 10Wo si wo ma saraka-mintantɛ la Mari ye ka to wo sufa mala Sulen-Tele wo Sulen-Tele. Kɛnu si sa tele-wo-tele-sarakɛnu kuma.
Karɛnu Tele-Fɔlɔtɛ-Sarakɛnu
11“Karɛ-wo-karɛ a tele fɔlɔtɛ ma, wo si na tura-bulun fila la anubɛ saga-kɔndɔn kelen na anubɛ san-kelen-saga-yigi wɔrɔnfila la wo bolo ka wonu ma saraka-mintantɛ la Mari ye. 12-14Wo si dɛgɛ-munke yabasan tuli la ka wo ma kɔ-fan la. Wo tenbi nala sarakɛ la, ni a mara turɛ la, wo si na dɛgɛ-munke pani-kunbɛ-nya sawa la anubɛ nɔnbɔ-gbɔ-yi kilasi-nya nani la wo bolo. Ni a mara saga-kɔndɔn la, wo si na dɛgɛ-munke pani-kunbɛ-nya fila la anubɛ nɔnbɔ-gbɔ-yi kilasi-nya sawa la wo bolo. Ni a mara san-kelen-saga-yigi la, wo ni na dɛgɛ-munke pani-kunbɛ-nya kelen na anubɛ nɔnbɔ-gbɔ-yi kilasi-nya fila la wo bolo. Wo si wo damasi mintan anu nyɔgɔn fɛ Mari ye gburr! Wonu sumɛ si diya a ye kosɛbɛ! 15Wo kɔma, karɛ-wo-karɛ a tele karɛ fɔlɔt, wo si baa-kɔrɔn kelen ma hakɛ-sarakɛ la ka a sa kɛnu kuma.
Biredi-Yɛlɛbɛlɛ-Dɔn-Ladɛn
(Saraka-Masɔlɛnuta Tɔnnu 23.5-14)
16 #
Bɔ-Koe-Iyipiti 12.1-13; Tɔn-Fɔɛ-Fila-Nyɔgɛ 16.1-2 “San-bo-san, a karɛ fɔlɔtɛ tele tan-ni-nanɛ ma, wo si Kanan-Ko-Ladiyɛ kɛ Mari ye. 17#Bɔ-Koe-Iyipiti 12.14-20; 23.15; 34.18; Tɔn-Fɔɛ-Fila-Nyɔgɛ 16.3-8 A tele tan-ni-loli nyɔgɛ, wo si tele wɔrɔnfilɛ ladɛn dabira. Tele wo mumɛ kɔrɔ, wo kana biredi-wo-biredi dɔn fɔ biredi-yɛlɛbɛlɛ isiti sa min tɔ. 18Tele wɔrɔnfilɛ wo, a tele karɛ fɔlɔt ma, wo si Marita ladɛn kɛ. Wo kana wɔli-wo-wɔli kɛ wo tele rɔ wo nyɛrɛ ye iko wo duruta a kɛla nya min. 19Wo ni tura-bulun fila bi anubɛ saga-kɔndɔn kelen anubɛ san-kelen-saga-yigi wɔrɔnfila, fɛɛ sa minnu na ka wonu ma saraka-mintantɛ la Mari ye. 20-21Min tenbi nala tura-bulun kelen-kelen na a bolo, wo tigi ni na dɛgɛ-munke pani-kunbɛ-nya sawa-sawa la min tamaganɛ tuli la ka a sa tura-sarakɛ kɛnu kuma. Min tenbi nala saga-kɔndɔn la a bolo, wo tigi ni na dɛgɛ-munke pani-kunbɛ-nya fila la min tamaganɛ tuli la ka a sa saga-kɔndɔn-sarakɛ kɛnu kuma. Min tenbi nala saga-yigi kelen-kelen na a bolo, wo tigi ni na dɛgɛ-munke pani-nya kelen-kelen na min tamaganɛ tuli la ka a sa saga-yigi sarakɛ kɛnu kuma. 22Wo wa ban kɛnu bɔla tumɛ min, wo si baa-kɔrɔn kelen bɔ hakɛ-sarakayɛ la min si ma wo hakɛ-yamatogon-fan la. Wo si wo sɛninya Mari yala iko tɔn ya a fɔ nya min. 23Wo ni kɛnubɛ sɔgɔma-saraka-mintantɛnu bɔ anu nyɔgɔn fɛ. 24Wo si to sarakɛ kɛnu mintanna tele-wo-tele ha tele wɔrɔnfila da si fa. Wo sumɛ si diya Mari ye worɔ bɛrɛkɛ! 25Wo si kundɛn tele wɔrɔnfilɛ ladɛn rɔ. A tele wɔrɔnfilɛ ma, wo si Mari bato.
Dɔn-Fen-Kurɛ-Tɛgɛ-Ladɛn
(Saraka-Masɔlɛnuta Tɔnnu 23.15-22)
26 #
Bɔ-Koe-Iyipiti 23.16; 34.22; Tɔn-Fɔɛ-Fila-Nyɔgɛ 16.9-12 “Wo wa Dɔn-Fen-Kurɛ-Ladɛn tɛgɛ kɛ, wo si wola dɔn-fen-kun-fɔlɛnu ma kɔ-fan la Mari ye. Wo ni wo fara wo nyɛrɛta wɔlɛ la ka Mari bato wo tele nyɛrɛ rɔ. 27Wo ni saraka-mintantɛ bɔ min sumɛ si diya Mari ye. Wo ni tura-bulun fila bi anubɛ saga-kɔndɔn kelen anubɛ san-kelen-saga-yigi wɔrɔnfila ka wonu mintan Mari ye. Wo wa ban sɔgɔma-sarakɛ bɔla, wo ni tura-bulun fila bi anubɛ saga-kɔndɔn kelen anubɛ san-kelen-saga-yigi wɔrɔnfila, fɛɛ sa minnu na. Wo ni wonu ma saraka-mintantɛ la Mari ye. 28-29Min tenbi nala tura-bulun kelen na a bolo, wo tigi ni na dɛgɛ-munke pani-kunbɛ-nya sawa-sawa la min tamaganɛ tuli la ka a sa tura-sarakɛ kɛnu kuma. Min tenbi nala saga-kɔndɔn na a bolo, wo tigi ni na dɛgɛ-munke pani-kunbɛ-nya fila la min tamaganɛ tuli la ka a sa saga-kɔndɔn-sarakɛ kɛ kuma. Min tenbi nala saga-den kelen na a bolo, wo tigi ni na dɛgɛ-munke pani-kunbɛ-nya kelen na min tamaganɛ tuli la ka a sa saga-dan-sarakɛ kɛnu kuma. 30Wo wa ban kɛnu bɔla tumɛ min, wo si baa-kɔrɔn kelen bɔ hakɛ-sarakayɛ la min si ma wo hakɛ-yamatogon-fan la. Wo si wo sɛninya Mari yala iko tɔn ya a fɔ nya min. 31Wo kɔma, wo si sarakɛ wonu nyɔgɔn nɔnbɔ-gbɔ-yi bɔ ka a sa tele-wo-tele-sarakɛ wonu kuma.
Currently Selected:
Yilan-Yilan Koe 28: KCLB
Highlight
Copy
Compare
Share
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
