Yilan-Yilan Koe 27
27
Den-Keibɔnɛnu Kɛɛ Tala-Bole
(Yasowa 17.3-6)
1Yusufu ya den-kei do sɔrɔn min tɔgɛ le Manasa. Manasa fanan ya den-kei do sɔrɔn min tɔgɔ Makiri. Wo fanan ya Kaliyadi sɔrɔn. Kaliyadi fanan ya Hifa sɔrɔn. Wo ya Silafihadi sɔrɔn. Silafihadi wo ma den-kei sɔrɔn fɔ dunmusi mɔgɔ loli pe. Wonu tɔgɛ le kɛnu na, Mala, Nowa, Hagila, Milaka, anubɛ Tirisa. 2Dunmusi wonu wulita ka sɔ Marita Fani-Bɔn don-dɛ la Musa anubɛ Saraka-Masɔla Ɛliyasa yakɔrɔ anubɛ bɔnsɔn-kun-tiginu anubɛ Isirɛla mɔgɛ bɛɛ min bi nyɔ. Dunmusi wonu ya a fɔ anu ye ko, 3“Ma fa fagara wula-da-rakolɔn rɔ a ta-nyɔgɛnu fɛ iko Mari ya a fɔ nya min kɔnɔ a ma den-kei wo den-kei to. A ma bila Korata mɔgɛnu tɛma minnu ya murutiyɛ lawuli Mari kan ma. 4A bɛnta, ma fa tɔgɛ ni tunu Isirɛla mɔgɛnu tɛma, wa? Wo yandi, wo ni kan tinɛ do di ma ma.”
5Musa ya anu kuman-kan latenbi Mari ma. 6Wo kɔma, Mari ya a fɔ Musa ye ko, 7#Yilan-Yilan Koe 36.2 “Silafihadila dunmusinu bara min fɔ i ye kɛ la, tonyɛ le wo la, yɔ! Wo ni kan tinɛ do di anu ma. A bɛnta, anu fa ni min sɔrɔn, wo ni wo di anu ma. 8Kɔnɔ a fɔ Isirɛla mɔgɛnu ye ko ni kei do fagara, a ma den-kei to a kɔma, a kɛɛ si to ala dunmusi ye. 9Ni dunmusi sa a bolo, a si to a na-kelen-nyɔgɔ-keimɛnu ye. 10Ni a na-kelen-nyɔgɛnu sa nyɔ, a si to a fa na-kelen-nyɔgɛnu ye. 11Ni a na-kelen-nyɔgɛ sa nyɔ, anubɛ a fa na-kelen-nyɔgɛnu sa nyɔ, a si to a kebila-nyɔgɛ do ye anubɛ min gbɛrɛnnɛ anu nyɔgɔn ma. Wo si a bi iko a halalɛ. Nde, Mari kan le kɛ la. Kɛ si ma tɔn la wobɛ Isirɛla mɔgɛnu ye. Wo ni a bira gben!”
Lanyiri-Nyamanɛ Mafɛlɛn-Koe Musa Bolo
12 #
Tɔn-Fɔɛ-Fila-Nyɔgɛ 3.23-27; 32.48-52 Mari ya a fɔ Musa ye tun ko, “Ta Abarim kɔnkɛ kuma. N bi nala nyamanɛ min dila Isirɛla mɔgɛnu ma, i ni wo bɛɛ mafɛlɛn. 13I wa ban nyamanɛ wo mumɛ mafɛlɛnna tumɛ min, i si so-sɛgi-kɛ iko a mara i kɔrɔ Aruna la nya min 14bawo wole mɔgɔ filɛ ya n kuman-kan tinya wo tumɛ wo ye Sini wulɛ rɔ. Mɔgɔ damasi ya gbunya-kumɛ fɔ n ma Sɔnkɔ-Sɔnkɔ Tenke dafɛ. Wo ma sɔn ka nta gbiliyɛ anubɛ nta fanka yira mɔgɛnu na.” (Sɔnkɔ-Sɔnkɔ Tenke kɛ le Sini wulɛ rɔ Kɛdɛsi soe dala.)
Yasowa Sigi-Koe Musa Gbɛ Rɔ
(Tɔn-Fɔɛ-Fila-Nyɔgɛ 31.1-8)
15Musa ya a fɔ Mari Alla ye gbɛ ko, 16“E, Allatala, ile min si niyi di mɔgɔ ma anubɛ ile min si niyi bɔ mɔgɔ rɔ, n bi i manyinikala ko kelen pe lela ko la. I ni ita mɔgɛ do yabɔ min si sɔ Isirɛla mɔgɛ kɛnu yarɔ kɛlɛ rɔ. 17#1 Mansɛnu 22.17; Isikiyɛli 34.5; Matiyu 9.36; Maraka 6.34 Isirɛla mɔgɛ kɛnu kana ma iko sagɛ minnu kandanna sa.”
18-19 #
Bɔ-Koe-Iyipiti 24.13
Mari ya Musa yabi ko, “N bara a lɔn ka a fɔ ko Nunna den Yasowa, wo si ke le ka sɔ mɔgɛ kɛnu yarɔ. A kele. A ni a sɔ Saraka-Masɔla Ɛliyasa yakɔrɔ anubɛ Isirɛla mɔgɛ bɛɛsi yakɔrɔ. Ile, Musa ni i bole sa a kun tɛma ka a dantɛgɛ nde, Mari ma. I si ale yira mɔgɛnu na. 20Ita sɛnbɛ do di Yasowa ma. Wo le si a ma, Isirɛla mɔgɛnu si anu tolo masɔ a la. 21#Bɔ-Koe-Iyipiti 28.30; 1 Samuwɛli 14.41; 28.6 A si a yɛ bɛn Ɛliyasa ma. Wo si ke ka nde diyana-koe lɔn fen fila#27.21 Fen fila: Fan min bi saraka-masɔla-wɛla kɔgɔ-dala-kurɛ ma, wo si anu dɛnbɛ ka Mari diyana-koe lɔn. Anu tɔgɛ le Hiburu-kan rɔ ko Yurim anubɛ Tumin. fɛ min bi saraka-masɔla-wɛla kɔgɔ-dala-kurɛ ma. Yasowa anubɛ Isirɛla mɔgɛnu si min ma, kɛnu si a ma, Ɛliyasa ni wo rakaran anu ye.”
22Musa ya a ma iko Mari ya a fɔ a ye nya min. A ya a ma, Yasowa sɔra Ɛliyasa anubɛ mɔgɛnu yakɔrɔ iko Mari ya a fɔ nya min. 23#Tɔn-Fɔɛ-Fila-Nyɔgɛ 31.23 Musa ya a bole sa Yasowa kun tɛma ka a dantɛgɛ Mari ma. A ya a fɔ Isirɛla mɔgɔ damasi ye ko, “Wo ara Yasowa kɛ yen? Kɛ le nde, Musa gbɛ rɔ gbɛ, yɔ!”
Currently Selected:
Yilan-Yilan Koe 27: KCLB
Highlight
Copy
Compare
Share
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
