Yilan-Yilan Koe 26
26
1 #
Yilan-Yilan Koe 1.1-46
Isirɛla mɔgɛnuna fagalɛ kɔma, Mari ya a fɔ Musa anubɛ Saraka-Masɔla Ɛliyasa ye ko, 2“I ni Isirɛla mɔgɛnu dan kebilɛnu ma, kei minnu sɔrɔn ara san mogan bɔ ha ka tenbi wo la, minnu si ke tala kɛlɛ rɔ, kɔni.” 3-4Musa anubɛ Ɛliyasa ya a ma iko Mari ya a fɔ anu ye nya min. Anu damasi ladɛnta Yorodan bɛ dafɛ Yɛrikɔ ya-telen ma.
Isirɛla mɔgɛ le kɛnu na minnu bɔra Iyipiti.
Rubɛn Bɔnsɔn Mɔgɛnu Dan-Koe
5-6Yakobala den-kei-sarɛ le Rubɛn na. Rubɛn fanan ya den-kei mɔgɔ nani sɔrɔn. Wonu tɔgɛ le Hanoki, Palu, Hɛsirɔn, anubɛ Karimi.#26.5-6 Fasi kɛ donta fasi 11 kɔma. 8-9Ala den Palu ya den-kei do sɔrɔn min tɔgɛ le ko Ɛliyabu. Ɛliyabu fanan ya den-kei mɔgɔ sawa sɔrɔn. Wonu fanan tɔgɛ le Nɛmuwɛli, Datan, anubɛ Abairam. Isirɛla mɔgɛnu ya Datan anubɛ Abairam ma kun-tiginu na nun. Kun-tigi kɛnu denu wulita Musa kan ma ka kofu Kora anubɛ a gba-fɛ-bilalɛnu ma nun. 10Dugi dɛ lakara anu kɔrɔ ka anu nakunu. Tɛ ya Kora gba-fɛ-bilalɛ mɔgɔ kɛmɛ fila mɔgɔ bi-loli (250) mintan gburr! 11Kɔnɔ Korata den-keminɛnu ma faga anu fɛ wati wo rɔ. Mɔgɛ kɛnu wara-koe mara kawandili-ba la Isirɛla mɔgɛnu tɛma. 7Rubɛn bɔnsɔn bɛnta mɔgɔ waga bi-nani mɔgɔ waga sawa mɔgɔ kɛmɛ wɔrɔnfila ani mɔgɔ bi-sawa (43,730) ma.
Simiyɔn Bɔnsɔn Mɔgɛnu Dan-Koe
12-14Simiyɔn ya den-kei mɔgɔ loli sɔrɔn. Wonu tɔgɛ le Nɛmuwɛli, Yamin, Yakin, Seraha, anubɛ Sala. Simiyɔn bɔnsɔn bɛnta mɔgɔ waga mogan mɔgɔ waga fila ani mɔgɔ kɛmɛ fila (22,200) ma.
Kadi Bɔnsɔn Mɔgɛnu Dan-Koe
15-18Kadi ya den-kei mɔgɔ wɔrɔnfila sɔrɔn. Wonu tɔgɛ le kɛnu na, Sɛfiyon, Hagi, Suni, Asini, Ɛri, Arada, anubɛ Arɛli. Kadi bɔnsɔn bɛnta mɔgɔ waga bi-nani ani mɔgɔ kɛmɛ loli (40,500) ma.
Yuda Bɔnsɔn Mɔgɛnu Dan-Koe
19-22Yuda ya den-kei mɔgɔ loli sɔrɔn. Wonu tɔgɛ le kɛnu na, Sela, Pɛrɛsi, Seraha, Ɛri, anubɛ Onan, kɔnɔ Ɛri anubɛ Onan fagara Kenan nyamanɛ rɔ. Yuda bɔnsɔn bɛnta mɔgɔ waga bi-wɔrɔnfila mɔgɔ waga wɔrɔ ani mɔgɔ kɛmɛ loli (76,500) ma. Pɛrɛsi ya den-kei fila sɔrɔn. Anu tɔgɛ le Hɛsirɔn anubɛ Hamula.
Isakari Bɔnsɔn Mɔgɛnu Dan-Koe
23-25Isakari ya den-kei mɔgɔ nani sɔrɔn. Wonu tɔgɛ le Tola, Pusa, Yasubu, anubɛ Simirɔn. Isakari bɔnsɔn bɛnta mɔgɔ waga bi-wɔrɔ mɔgɔ waga nani ani mɔgɔ kɛmɛ sawa (64,300) ma.
Sɛbulɔn Bɔnsɔn Mɔgɛnu Dan-Koe
26-27Sɛbulɔn ya den-kei mɔgɔ sawa sɔrɔn. Wonu tɔgɛ le kɛnu na, Sɛrɛdi, Hilon, anubɛ Yaliyɛli. Sɛbulɔn bɔnsɔn bɛnta mɔgɔ waga bi-wɔrɔ ani mɔgɔ kɛmɛ loli (60,500) ma.
28Yusufu ya den-kei mɔgɔ fila sɔrɔn. Kelan tɔgɛ le Manasa. A fila nyɔgɔn tɔgɛ le Ifɛrɛm. Mɔgɔ filɛ wonu mara bɔnsɔn-kun-tiginu na.
Manasa Bɔnsɔn Mɔgɛnu Dan-Koe
29-34Manasa fanan ya den-kei mɔgɔ fila sɔrɔn, Makiri anubɛ Asirɛli. Makiri fanan ya Kaliyadi sɔrɔn. Kaliyadi fanan ya den-kei mɔgɔ wɔrɔ sɔrɔn. Wonu tɔgɛ le kɛnu na, Iyasa, Helaki, Asirɛli, Sɛkɛm, Sɛmida, anubɛ Hifa. Manasa bɔnsɔn bɛnta mɔgɔ waga bi-loli mɔgɔ waga fila ani mɔgɔ kɛmɛ wɔrɔnfila (52,700) ma. Kaliyadila dan Hifa, wo fanan ya den-kei filasɔrɔn. Den kei filɛ kɛ, mɔgɔ kelen, anu bi a fɔla min ma ko Silafihadi, wole ya dunmusu mɔgɔ loli sɔrɔn. Wonu tɔgɛ le kɛnu na, Mala, Nowa, Hagila, Milaka, anubɛ Tirisa.
Ifɛrɛm Bɔnsɔn Mɔgɛnu Dan-Koe
35-37Ifɛrɛm ya den-kei mɔgɔ sawa sɔrɔn. Wonu tɔgɛ le kɛnu na, Sutɛla, Bika, anubɛ Tahan. Kɔnɔ Sutɛla kɛ ya Ɛran sɔrɔn. Ifɛrɛm bɔnsɔn bɛnta mɔgɔ waga bi-sawa mɔgɔ waga fila anubɛ mɔgɔ kɛmɛ loli (32,500) ma.
Bɛnyamɛ Bɔnsɔn Mɔgɛnu Dan-Koe
38-41Bɛnyamɛ ya den-kei mɔgɔ loli sɔrɔn. Wonu tɔgɛ le Bela, Asiba, Ahiram, Sefufam, anubɛ Hufam. Bela wo fanan ya den-kei mɔgɔ fila sɔrɔn. Mɔgɔ filɛ wonu tɔgɛ le kɛnu na, Adi ani Neyaman. Bɛnyamɛ bɔnsɔn bɛnta mɔgɔ waga bi-nani mɔgɔ waga loli ani mɔgɔ kɛmɛ wɔrɔ (45,600) ma.
Dan Bɔnsɔn Mɔgɛnu Dan-Koe
42-43Dan ya den-kei kelen pe le sɔrɔn. Wo tɔgɛ le Suham. Dan bɔnsɔn bɛnta mɔgɔ waga bi-wɔrɔ mɔgɔ waga nani anubɛ mɔgɔ kɛmɛ nani (64,400) ma.
Asɛra Bɔnsɔn Mɔgɛnu Dan-Koe
44-47Asɛra ya den-kei mɔgɔ sawa sɔrɔn. Wonu tɔgɛ le Imina, Yɛsuwi, anubɛ Bɛriya. A ya den musi kelen fanan sɔrɔn min tɔgɛ le Sera. Ala den-kei Bɛriya fanan ya den-kei mɔgɔ fila sɔrɔn. Kelen tɔgɛ le Makiyɛli, doi wo tɔgɛ le Hibɛri. Asɛra bɔnsɔn bɛnta mɔgɔ waga bi-loli mɔgɔ waga sawa ani mɔgɔ kɛmɛ nani (53,400) ma.
Nafatali Bɔnsɔn Mɔgɛnu Dan-Koe
48-50Nafatali ya den-kei mɔgɔ nani sɔrɔn. Wonu tɔgɛ le Yasila, Kuni, Yesa, anubɛ Silɛm. Nafatali bɔnsɔn bɛnta mɔgɔ waga bi-nani mɔgɔ waga loli anubɛ mɔgɔ kɛmɛ nani (45,400) ma.
51Mɔgɛ wo mumɛ bɛɛsi lakofunɛ bɛnta mɔgɔ waga kɛmɛ wɔrɔ mɔgɔ waga kelen, mɔgɔ kɛmɛ wɔrɔnfila anubɛ mɔgɔ bi-sawa (601,730) ma.
52 #
Yilan-Yilan Koe 34.13; Yasowa 14.1-2 Mari ya a fɔ Musa ye ko, 53-56“Wo ni nyamanɛ tala bɔnsɔnnu tɛma koron-nakɛ fɛ iko anu siya nya min. Bɔnsɔn min siya, nyamani-kinamɛ si to wonu ye. Bɔnsɔn min ma siya, nyamani-dɔgɔmɛ si to wonu ye.”
Lifayi Bɔnsɔn Mɔgɛnu Dan-Koe
57-59Lifayi ya den-kei mɔgɔ sawa sɔrɔn. Wonu tɔgɛ le Kɛrisɔn, Kohati, anubɛ Mɛrari. Wonu fanan ya anuta den-keinu sɔrɔn. Anuta dan do tɔgɛ le Libini, Hiburɔn, Mahali, Muuse, ani Kohati mamanɛ Kora. Den-kei do fanan bi Kohati bolo. A tɔgɛ le Amiram. Amiram wo ya a tɛnɛ-musi Yakabɛdi furu min sɔrɔnta Iyipiti. Wonu ya den-kei fila sɔrɔn anubɛ dunmusi kelen. Mɔgɔ filɛ wonu tɔgɛ le Aruna anubɛ Musa. Dunmusi kelan wo fanan tɔgɛ le Miriyam. 60#Yilan-Yilan Koe 3.2 Aruna ya den-kei mɔgɔ nani sɔrɔn. Mɔgɔ nani wonu tɔgɛ le kɛ la, Nedabu, Abaihu, Ɛliyasa, anubɛ Itamarayi. 61#Saraka-Masɔlɛnuta Tɔnnu 10.1-2; Yilan-Yilan Koe 3.4 Nedabu anubɛ Abaihu nara tɛ la Marila saraka-bɔ-tinɛ kuma a ma bɛn anu ni na min na. Wo le ya a ma, Mari ya anu faga nyɔ rɔ. 62Anu ya Lifayi keimɛnu dan ka a fɔlɔ min sɔrɔn ara karɛ kelen bɔ ha ka tenbi wo la, anu yatɛ bɛnta mɔgɔ waga mogan, mɔgɔ waga sawa (23,000) ma. Kɔnɔ anu bi Isirɛla mɔgɛnu danna tumɛ min, Lifayi mɔgɛnu ma kofu anu ma bawo anu ma nyamanɛ sɔrɔn anu nyɛrɛ ma.
63Musa anubɛ Aruna ya Isirɛla mɔgɛnu tɔgɛ sɛbɛ fɔlɔn Sinayi wulɛ rɔ. Wo tumɛ Isirɛla mɔgɛnu daga makɛnɛ Mohabu lɛɛ rɔ Yorodan bɛ dafɛ Yɛrikɔ ya-telen ma, Musa anubɛ Ɛliyasa ya mɔgɛ kɛnu tɔgɛ sɛbɛ tun. 64Ka dabira Musa anubɛ Aruna ya mɔgɛnu dan tumɛ min ka a sigi ha Ɛliyasa anubɛ Musa ya mɔgɛ dan tumɛ min, mɔgɔ-wo-mɔgɔ ma to a niyi la fɔ mɔgɔ fila pe. 65#Yilan-Yilan Koe 14.26-35 Mɔgɔ filɛ wo tɔgɛ le kɛnu na, Yɛfunɛla dan Kelabu anubɛ Nunna den-kei Yasowa. Mari ya a fɔ fɔlɔ nun ko a mɔgɛ toe kɛ bɛɛ si faga wula-da-rakolɔn rɔ. Wo bɛɛ mara iko Mari ya a fɔ nya min.
Currently Selected:
Yilan-Yilan Koe 26: KCLB
Highlight
Copy
Compare
Share
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
