Yilan-Yilan Koe 24
24
1Kɔnɔ kaka gbɛ, Belam nyɛrɛ ya a lɔn ko a sɔgɛ ye Mari la, ale ni duwa Isirɛla mɔgɛ wonu ye. Woletɔ a ma a nyɛrɛ tɔrɔ iko a duruta nya-nyini-kɛla nya min. A ya a yɛ lamunun wula-da-rakolɔn la, 2ka Isirɛla mɔgɛnu daga-makɛnɛ yen. Anuna bɔnsɔn faranɛ iko anu siginɛ nya min. Marita Sɛnbɛ donta a sɔndɔmɛ rɔ 3ka wɔlɔyiya-kumɛ kɛ fɔ mansɛ ye ko,
“Sarakanɛ le kɛ la nde, Beyorila dan Belam bolo
ka a fɔ wo ye bi.
N bara wula-yanna-koe ragbɛ.
4N bara Alla kuman-kan nya-yen.
Alla Sɛnbɛ-Bɛɛ-Tigi ara ko-rayirɛ kɛ n ye.
N bara n sa dugi ma Alla kɔrɔ, n yɛ la ara ka.
Nde le nyɛrɛ ye kɛ fɔla wo ye yati!
5Hɛɛ! Isirɛla mɔgɛnuna sigi tinɛnu kin!
6Anuna fani-bɔnnu sɔnɛ tala anu sansan-yili ma
iko tin-kurinu.
Anu kin iko nakɔɛ minnu bi bɛ dafɛ.
Anu kin iko lɛnkɛ-gbɔngbɔn Marita nakɔɛ rɔ
iko bandan-kuru-wɛ min bi yi dala.
7Anu si yiri ka siyaya.
Anu kegeyɛnu si taran nyamani-siyaman tɔ.
Anuna mansɛ si fanka sɔrɔn ka tenbi Amalɛki Mansɛ Ekagi la.
Ata mansaya-sɛnbɛ si koloya ka ke kan-tina-siyaman tɔ.
8Alla ya anu nabɔ Iyipiti.
A si kɛlɛ kɛ Isirɛla mɔgɛnu ye iko sigi-dalamɛ.
Anu si anu yogenu faga ka anu kolenu takeri
ka anuna kalabɛnnu takerikeri.
9 #
Ko-Dabirɛnu 12.3; 49.9 Isirɛla mɔgɛnu manɛ iko yara-feremɛnu.
A tenbi kinɔgɔla, mɔgɔ-wo-mɔgɔ ti kerinteya a lakundenna.
Ni min duwara Isirɛla mɔgɛnu ye, wo tigi si duwɛ sɔrɔn.
Ni min ya anu danka, wo tigi si dankɛ sɔrɔn.”
10Mansa Balaki ya a bole lagbu yisi-tinya bolo. A ya a fɔ Nɛbi Belam ye ko, “N ya ile kele ko i ni n yogenu danka n ye. Kɔnɔ a sawa nyɔgɛ le kɛ la gbɛ, i ye duwala anu ye. 11Sɛgi i warɛ i bɔra kan min. N ya lanyiri kiri i ye ko n si i sara kɔnɔ Mari ya a ma, i ti fenfen sɔrɔn n bolo tun.”
12Nɛbi Belam ya a fɔ a ye ko, “N ma n sara ila kilayɛnu na nun ko 13hali i ya i bolo-fan damasi di n ma, n ti nta Mari kuman-kan boloka ka n nyɛrɛ diyana-kumɛ fɔ. Mari ye min fɔla n ye, n bi wo le dɔrɔn fɔla i ye!”
Wɔlɔyiya-Kumɛ Laban Nɛbi Belam Bolo
14A ya a fɔ mansɛ ye tun ko, “N bi sɛgila n kɔma nna mɔgɛnu bara. Kɔnɔ samani n ni ta, n ni i makawandinu to. Isirɛla mɔgɛnu bi nala min mala ila mɔgɛnu na wati-natoe, n si wo fɔ i ye.”
15Wo wɔlɔyiya-kumɛ le kɛ la Belam ya min fɔ ko,
“Sarakanɛ le kɛ la nde, Beyorila dan Belam bolo ka a fɔ i ye bi.
16N bara wula-yanna-koe ragbɛ.
N bara Alla kuman-kan nya-yen.
N bara hɛnkili sɔrɔn ka bɔ Alla Min Bi Fan Bɛɛ Kun Na.
Alla Sɛnbɛ-Bɛɛ-Tigi ara ko-rayirɛ kɛ n ye.
N bara n sa dugi ma Alla kɔrɔ. N yɛ la ara ka.
Nde le nyɛrɛ ye kɛ fɔla wo ye yati!
17‘N bi wula-yanna-koenu yenna nala kɔnɔ a ma ke wɛ fɔlɔn.
N bi mansɛ do yenna nala ka bɔ Isirɛla mɔgɛnu tɛma kɔnɔ a fɛ-yan fɔlɔn.
A ye malanna iko lolo-malanni-wɛnu.
A si Mohabu kun-tiginu kunyɛ ratii.
A si mɔgɔ-wasinɛnu anubɛ kɛlɛ-tɛgɛlɛ kɛnu tinya feu!
18A yoge minnu bi Idɔm nyamanɛ rɔ, a si wonu kasara.
A si nyamanɛ wonu ma a nyɛrɛtɛ la.
Kɔnɔ hali wo, Isirɛla mɔgɛnu si to fanka sɔrɔnna dɛɛ!
19Anu si to anu yogenu tadonna anu kian kɔrɔ iko bore.
Anu si to anu fagala ka anu ban fegba!’ ”
20Mari ya ko-rayirɛ kɛ Nɛbi Belam ye Amalɛki mɔgɛnuna ko la. A ya wɔlɔyiya-kumɛ doni fɔ anuna ko la.
“Fanka-tigi le Amalɛki mɔgɛnu na ka tenbi mɔgɛ kɛnu na
kɔnɔ hali wo, ala ban anu si kasara pɔ!”
21Mari ya ko-rayirɛ kɛ a ye tun Kena mɔgɛnuna ko la ka wɔlɔyiya-kumɛ donu fɔ anuna ko la.
“Wole siginɛ kan min, nyɔ latankani de!
Wole siginɛ kɔnkɔ wa latelennɛ kuma.
22Kɔnɔ Asiriya mɔgɛnu ba na wo bira tinɛ wati min,
wole Kena mɔgɛnu si halaki.”
23Nɛbi Belam ya wɔlɔyiya-kumɛ kɛ fɔ tun.
“Yon bi mɔgɛ kɛnu na minnu bi anu nadɛnna kantɔ-wara la?
24Mɔgɛ kɛnu si na yi kuma ka bɔ Saiparasi yi-tɛma-dugi rɔ.
Anu si Asiriya anubɛ Iburu mɔgɛnu nɔ.
Kɔnɔ mɔgɛ wo minnu bi nala ka bɔ Saiparasi, wonu si faga ka ban feu!”
25Wo le mara Belam wulumatoe la gbɛ ka ta, a bɔra kan min.
Currently Selected:
Yilan-Yilan Koe 24: KCLB
Highlight
Copy
Compare
Share
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
