Yilan-Yilan Koe 23
23
1Belam ya a fɔ Balaki ye ko, “I ni saraka-bɔ-tina wɔrɔnfila ladan n ye yan tɔ. I ni na tura wɔrɔnfila la anubɛ saga-yigi wɔrɔnfila la i bolo.”
2Mansa Balaki ya a ma iko a ya a fɔ a ye nya min. A ya turɛ anubɛ saga-yiginu mintan saraka-bɔ-tinɛ kɛnu kuma. 3Wo kɔma, Belam ya a fɔ Mansa Balaki ye ko, “I sɔ ila sarakɛ kɛnu dafɛ ka n makɔnɔ anu tɔgɔfɛ. N ni ta n dan na. Tumado Mari si kuma n na. N ni a lɔn a ye nala min fɔla n ye. A ya fenfen fɔ n ye, n si a ma, i ni wo lɔn.” Ale kelen pe yɛlɛta a ma a dan na. 4Mari tara a taran nyɔ. Belam ya a fɔ Mari ye ko, “N bara saraka-bɔ-tina wɔrɔnfila ladan. N bara tura kelen anubɛ saga-yigi kelen mintan saraka-bɔ-tina kelen-kelannu kuma i ye.”
Dankɛ Fɔlɔtɛ Tinya-Koe Belam Bolo
5Mari ya kuman-kan don Belam bolo a si ta min fɔ Mansa Balaki ye. 6A tara mansɛ anubɛ ala mɔgɔ-ba-sɛbɛnɛnu sɔnɛ taran anu gbɛ rɔ.
7Belam donta wɔlɔyiya-kuma-fɔɛ rɔ. A ko,
“Mohabu Mansɛ Balaki ara na n na ka bɔ Siriya nyamanɛ rɔ
tele-bɔɛ wara la kɔnkɔ-nyamanɛ rɔ.
A ya a fɔ n ye ko n ni na kuma ale ye.
N ni Isirɛla mɔgɛnu danka ale ye.
8Kɔnɔ nde si mɔgɛ kɛnu danka kama Alla ma minnu danka?
Nde si kuma-yogomɛ fɔ mɔgɛ kɛnu ma kama,
ni Alla ma min fɔ anu denu ma?
9N tenbi kɔnkɔ-kolo-wɛ kuma, n si anu yen.
N tenbi kɔnkɔ-layan-bɛ kɛ kuma, n bi anu tagbɛla feu!
Mɔgɛ le kɛnu na minnu ti basan sibolo-gbɛrɛkɛnu na.
Mɔgɛ le kɛnu na minnu si anu sigi anu dan na yiri!
10Mɔgɛ ti ke kɛnu danna.
Anu siya iko gbangban.
Alamɛ nna ban mara iko Isirɛla mɔgɛ kɛnu.
N ba faga wati min,
alamɛ n mara iko mɔgɔ-telennɛ kɛnu!”
11Mansa Balaki ya a fɔ a ye ko, “I wara nfen ma n na kɛ la? N nara ile la yan ka n yoge kɛnu danka nde ye. Kɔnɔ ile ma sɔn anu danka-koe ma mumɛ, fɔ ka duwa anu ye dɛɛ!”
12Belam ya a yabi ko, “Mari ye min fɔla nde ye, nde ye wo le dɔrɔn fɔla i ye.”
Danka Fila Nyɔgɛ Tinya-Koe
13Hali wo, Mansa Balaki yisi ma kima. A ya a fɔ Nɛbi Belam ye tun ko, “Ma ni ta kan-tina-gbɛrɛ i si Isirɛla tɔnkɔn donu yen kan min. I si ke anu dankala n ye nyɔ le.” 14Anu tara Pisiga kɔnkɔ-ralɛɛnɛ kuma. Kan tinɛ wo tɔgɛ le, “Nyamanɛ Mafɛlɛn Tinɛ.” Mansa Balaki ya saraka-mintan-tina wɔrɔnfila ladan nyɔ ka tura kelen anubɛ saga-kɔndɔn kelen mintan saraka-mintan-tina-kelen-kelannu kuma.
15Wo kɔma, Belam ya a fɔ a ye ko, “I sɔ ila sarakɛ kɛnu dala yan tɔ ka n makɔnɔ anu dafɛ. N bi tala Mari taranna pan tɔ.”
16Mari tara a taran nyɔ. Mari ya kuman-kan don Belam bolo ka ta a fɔ mansɛ ye. 17A tara mansɛ anubɛ ala mɔgɔ-banu sɔnɛ taran anu gbɛ rɔ saraka wonu dafɛ. Mansɛ wo ya Nɛbi Belam manyinika ni Mari ya min fɔ a ye. 18Belam ya wɔlɔyiya-kumɛ dabira ko,
“Mansa Balaki, i madon n na.
N bi nala min fɔla i ye, i ni i tolo masɔ wo la.
19Alla sa iko mɔgɔni-finyɛ minnu si foninyɛ fɔ.
A ti a miriya yɛlɛma iko hadama-dannu.
A ya lanyiri kiri fenfenna ko la, a si wo ma, yɔ!
Ni a kumara, a ara ban.
20A ya n sɔ ko n ni duwɛ kɛ.
Ni Alla ya duwɛ minnu kɛ, nde ti ke wonu yɛlɛmana tun.
21N bara a yen, wati ye nala,
Isirɛla mɔgɛ kɛnu ti nanparan mumɛ sɔrɔn.
Anuta Mari Alla ye anu fɛ.
Anu si a fɔ ka a gbɛ feu, ko anuta mansɛ le Alla la.
22Alla nara anu denu na ka bɔ Iyipiti.
A ye kɛlɛ kɛla anu ye iko sigi-dalamɛ.
23Bɛsi sa nyɔ min si ko ma anu na.
Suwagayɛ mako sa anu na.
Mɔgɛnu si kawa anu ma, anu ni a fɔ ko,
‘Wo ni mɔgɛ kɛnu mafɛlɛn ba, Alla ya min ma anu ye.’
24Isirɛla mɔgɛ kɛnu mani de iko yara-yuwan.
A ti a sulen fɔ a buyi wa fa.
Ni a ya min faga, fɔ a wa ban wo yele manɛla.”
25Mansɛ ya a fɔ Belam ye ko, “Ni ile ti sɔn mɔgɛ kɛnu danka-koe ma, nba, hali i ma duwa anu ye wo rɔ.”
26Belam ya a yabi ko, “N ma a fɔ i ye nun ko Alla wa min fɔ n ye, n bi wo le fɔla ile ye?”
Danka Sawa Nyɔgɛ Tinya-Koe
27Balaki ya a fɔ a ye tun ko, “Bila n fɛ. Ma ni ta kan-tina-gbɛrɛ. Tumado Mari si a ma, i ni mɔgɛ kɛnu danka n ye nyɔ.” 28A ya Belam bi ka ta a la Piyɔri kɔnkɛ kuma. Anu tenbi nyɔ, anu si wula-da-rakolɔn ragbɛ feu!
29Nɛbi Belam ya a fɔ a ye ko, “I ni saraka-mintan-tina wɔrɔnfila ladan yan tɔ. I ni na tura wɔrɔnfila anubɛ saga-kɔndɔn wɔrɔnfila la i bolo.” 30Mansa Balaki ya a ma iko a ya a fɔ a ye nya min ka tura kelen anubɛ saga-kɔndɔn kelen mintan saraka-mintan-tina-kelen-kelan bɛɛ kuma.
Currently Selected:
Yilan-Yilan Koe 23: KCLB
Highlight
Copy
Compare
Share
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
