Matiyu 6
6
Mɔgɔ Kɔ-Koe-Karan
1 #
Matiyu 23.5
Yisa ko, “Wo wa wuli ko-nyimɛ kɛla tumɛ min, wo ni a ma wo fɛrɛma. Wo kana a ma gbɛ rɔ alako mɔgɛnu ni wo yen. Ni wo ya koe kɛnu ma gbɛ rɔ, wo ti barayi sɔrɔn wo Fa Alla bolo Arinyɛni tɔ.
2“Ni i ye a fɛ ka bolo-kolɔn kɔ, i kana a mayon alako mɔgɛ bɛɛ ni i yen mɔgɛ kɔla iko nyɛrɛ-mayiralɛnu. Wonu denu si wo ma Yahudiya-dina-bɔnnu na anubɛ barɛnu tɔ bawo anu bi a fɛ, mɔgɛnu ni anu matɔgɔ. Wo ni wo hɛnkili to kɛ ko! Wonu bara ban anu sarɛ sɔrɔnna feu! 3Kɔnɔ i wa mɔgɛ kɔ, hali i diyana-mɔgɔ#6.3 Diyana-mɔgɛ: Min sɛbɛnɛ kɛ rɔ, a ko ni i bolo-nyimɛ ya ko-nyimɛ kɛ, i bolo-maran ka ko lɔn a rɔ. bɛrɛbɛrɛ kana a lɔn. 4I ni a ma dogɔn rɔ. Woletɔ i Fa Alla min bi i yenna a kɔla dogɔn rɔ, wo si i barayi.
Madiyali-Koe-Karan
(Luka 11.2-4)
5 #
Luka 18.10-14
“Wo tenbi madiyali kɛla, wo kana a ma iko nyɛrɛ-mayiralɛnu! A di wonu ye ka madiyali kɛ anu kulu-mayɛlɛnɛ la Yahudiya-dina-bɔnnu na anubɛ sere tɛma alako mɔgɛnu ni anu yen. Wo ni wo hɛnkili to kɛ ko! Anu bara ban anu sarɛ sɔrɔnna feu! 6Kɔnɔ i tenbi madiyali kɛla, i kelan ni don ila konko la ka a dɛ latogon. I ni i Fa Alla madiya, i sa min yenna. Ale i Fa Alla min bi i yenna a kɛla dogɔn rɔ, wo si i barayi.
7“Wo tenbi madiyali kɛla, wo kana sɛgi wo gbɛ ma ka to kuma kelen fɔla ka a fɔ ka a fɔ iko Alla-lɔnbɛlɛnu si a ma nya min. Anu bi anu mirila ko Alla si anu kan lamɔɛn ka a tɛgɛ anuna madiyali-yannu fɛ. 8Wo kana ma iko wonu. Yanni wo ni Alla madiya, wo makoe ye min na, wo Fa Alla ya wo bɛɛ lɔn.
9“Wo ni madiyali kɛ ka le ko,
‘Ma Fa min bi Arinyɛni tɔ,
i tɔgɛ ni sɛninya.
10Ila mansayɛ ni na ma kuma.
I sako ni kɛ duninya rɔ iko a ye kɛla Arinyɛni tɔ nya min.
11I ni bita dɔn-fan di ma ma.
12Ma ara bila i la minnu na, i ni ma makoto wonu na
iko male bɛrɛn bi wonu makotola nya min, minnu bara bila ma la.
13I kana sɔn, ma ni don kɔrɔbɔlɛ rɔ
fɔ ka ma tanka Setanɛ ma.’#6.13 Kitabu donu si do sa kɛ kuma. Anu si a fɔ ko, “bawo mansayɛ, itɛ le anubɛ sɛnbɛ anubɛ gbiliyɛ habadan! Amina!
14“Ado nfan, minnu bara ko-yogomɛ kɛ wo la, ni wo ya anu makoto, wo Fa Alla min bi Arinyɛni tɔ, wo si wo fanan makoto. 15#Maraka 11.25-26 Kɔnɔ ni wo ma sɔn anu makoto-koe ma, wo Fa Alla fanan ti sɔn wo makoto-koe ma.
Sun-Don-Koe-Karan
16“Wo wa sunyɛ don tumɛ min, wo kana wo yakɔrɛ sa-a-rɔ iko nyɛrɛ-mayiralɛnu si a ma nya min. Anu kɛnɛna anu nyɛrɛ makinikinina alako mɔgɛnu ni a lɔn ko anu bi sunyɛ le tɔ. Wo ni wo hɛnkili to kɛ ko! Anu bara ban anu sarɛ sɔrɔnna feu! 17I wa sunyɛ don, i ni i yɛ laku ka i kunyɛ rabɔ, 18woletɔ mɔgɔ ti a lɔn ko i ye sunyɛ rɔ. I ya sa i Fa Alla min na, wo si wo lɔn. I Fa Alla min bi i yenna a kɛla dogɔn rɔ, wo si i barayi.
Nɔnfulu-Tigiya-Koe
(Luka 12.33-34)
19 #
Yemesi 5.2-3
“Wo kana wola nɔnfuli lamara wola bɔnnu na duninya kɛ rɔ, kɔrɔkɔrɔyɛ anubɛ kisinu si a tinya kan min. Kankannu fanan si ila bɔn keri ka a kankan. 20Kɔnɔ wo ni a lamara Arinyɛni tɔ, kɔrɔkɔrɔyɛ anubɛ kisinu ti ke a tinyana kan min. Kankannu ti ke a bila nyɔ, 21ado mɔgɔla nɔnfuli ye kan min, a hɛnkili si ta nyɔ tuma-wo-tuma.
Fɛrɛ-Bɔnkɛta Waan Wara-Koe
(Luka 11.34-36)
22“Mɔgɔ yɛ mani de a fɛrɛ-bɔnkɛ ye iko lɛnpu-lamalannɛ. Ni mɔgɛ yɛ kɛndɛ,#6.22 Yɛ kɛndɛ: Kɛ kɔrɔ ma ban gbɛla. Donu ya a lɔn ko ni i yɛ kɛndɛ, i ye fen kelen yenna, fila ma. I hɛnkili bɛɛ ye tola Alla kelen pe le ye worɔ. a fɛrɛ-bɔnkɛ bɛɛ si to waan rɔ. 23Kɔnɔ ni mɔgɛ yɛ ma kɛndɛ, a fɛrɛ-bɔnkɛ si to pinpi rɔ. A yɛ min si waan ladon a fɛrɛ-bɔnkɛ rɔ, ni a yɛ wo ma kɛndɛ, a si ma pinpi-makilannɛ la worɔ!
Alla anubɛ Nɔnfuli
(Luka 16.13; 12.22-31)
24“Mɔgɔ ti ke wɔli-kɛla tigi fila ye wati kelan rɔ. Ni a ya wo ma, kelen si diya a ye, kelen si gboya a ye. A si kelan gbiliya ka kelan lafɛya. Wole fanan bi wo nya le. Wo ti Alla anubɛ nɔnfuli nyini nya-kun-kelen.
25“N bi a fɔla wo ye worɔ, wo makoe ye fan min bɛɛ la, a mara dɔn-fan la wo, a mara fɛrɛya-bɔɛ la wo, wo kana hɔn wonuna ko la. Niyi ma tenbi dɔn-fan la, wa? Fɛrɛ-bɔnkɛ ma tenbi fɛrɛya-bɔɛ la, wa? 26Wo ni konanu mafɛlɛn. Anu ti sugi fui. Anu ti a tɛgɛ. Anu ti a sa birɛ la. Kɔnɔ wo Fa min bi Arinyɛni tɔ, wo le ye anu dama kandanna! Wole ma tenbi konanu na, wa? 27Yon bi wo tɛma min si hɔn koe do la ha a ni san do sa a nyɛrɛ siyi kuma?
28“Wo ye hɔnna fɛrɛya-bɔɛ la nfenna? Wo ni kɔn-ferenu sabatinɛ mafɛlɛn. Anu sa wɔlila ka anu nyɛrɛ fɛrɛya bɔ. 29#1 Mansɛnu 10.4-7; 2 Ko-Kɔrɔta-Karan 9.3-6 Kɔnɔ n bi a fɔla wo ye ko, hali Silamɛni min mara bana la nun, a makiri-nya ma ke kɔn-fere kɛ kelen tɔ. 30Binyɛ don? A ye nyɔ wati-ni dɔrɔn, wo kɔma, tɛ ni a mintan. Alla ye binyɛ wo fɛrɛya bɔla. Alla ti to wole fanan fɛrɛya bɔla wo nya na, wa? Wola dɛnkɛninyɛ dɔgɔ de!
31“Woletɔ wo kana hɔn ka a fɔ ko, ‘N si dɔn-fan sɔrɔn mintɔ? N si yi mintan min? N si fɛrɛya-bɔɛ nyamintan don?’ 32(Hali Alla-lɔnbɛlɛnu bi nyinina kɛnu denu ma tuma-wo-tuma.) Kɔnɔ wo Fa Alla min bi Arinyɛni tɔ, wo ya a lɔn ko wo makoe ye fan kɛ bɛɛ la. 33Wo ni Allala mansayɛ anubɛ ata telenbagayɛ fɔlɔn nyini. Wo kɔma, ale ni na to fan kɛ bɛɛ dila wo ma. 34Woletɔ wo kana hɔn sinanna ko la. Sina ye nala yakɔrɔ-mamɔɛ min na a bolo, wo ara a bɔ. Wo kana tɔrɔyɛ do sa bita tɔrɔyɛ kuma bawo tele bɛɛ anubɛ ata tɔrɔyɛ le.”
Kuranko Common Language Bible © The Bible Society in Sierra Leone, 2006.