Matiyu 7
7
Mɔgɔ Yiliki-Koe
(Luka 6.37-38, 41-42)
1Yisa ko, “Wo kana mɔgɛnu yiliki, woletɔ Alla ti wole fanan yiliki 2#Maraka 4.24 bawo wo ye mɔgɛnu yilikila nya min, Alla ye wole fanan yilikila wo nya na le. Wo wa a ma mɔgɛnu ye nya min, Alla si a ma wole fanan ye wo nya na le. 3Nfenna ko la, i si buriburi yen i ta-nyɔgɛ yɛ ma kɔnɔ kɔn-gbondon min bi ile nyɛrɛ yɛ ma, i hɛnkili sa tugula wo la? 4I ye i sisila a fɔla i ta-nyɔgɛ ma kama worɔ ko, ‘Na, n ni buriburi bɔ i yɛ ma,’ ado kɔn-gbondon ye ile fɔlɔn yɛ ma? 5Ile nyɛrɛ-mayiralɛ! Kɔn-gbondon bɔ ile fɔlɔn yɛ ma, wo kɔma, buriburi min bi i ta-nyɔgɛ yɛ ma, i si ke wo yenna ka wo bɔ a ma.
6“Wo kana fen-sɛnimɛ di wulinu ma bawo ala ban, anu si sɛgi wo kan ma ka wo kin. Wo kana kuru-da-gbɛlɛnu nakɛ kɔsɛnu kɔrɔ bawo anu si wonu tatɛntɛn anu kian kɔrɔ.
Mako Sa-Koe Alla Tontɛ Kɔrɔ
(Luka 11.9-13)
7“To tarali kɛla, wo si a sɔrɔn. To nyininɛ kɛla, wo si a yen. To dɛ matugula, a la si ka wo ye. 8Min ba to tarali kɛla, wo si a sɔrɔn. Min ba to nyininɛ kɛla, wo si a yen. Min ba to dɛ matugula, a la si ka wo ye. 9Yonna dan si a tara biredi ma, a ni kuri don a bolo? 10A wa a tara yɛgɛ ma, a ni duguma-fan don a bolo? 11Hali wole min yogo, wo ya a lɔn ko a kin ka fen-nyimɛ di wola dannu ma. Wo Fa min bi Arinyɛni tɔ don, wo ti fen-nyimɛ di wo ma min tenbira wo la, wa? Ale ma tenbi wo la, wole min bi a tarala, kɔni?
12 #
Luka 6.31
“Alla ya tɔn min di Nɛbi Musa ma anubɛ nɛbinuta karan, wo kɔrɛ le kɛ la ko, ‘Wo ye a fɛ, mɔgɛ donu ni min ma wo ye, wole fanan ni wo ma anu ye.’
Don-Da-Dɔgɔmanɛ Wara-Koe
(Luka 13.24)
13“Wo ni don da-dɔgɔmanɛ la bawo kilɛ min bi tala nyahanama rɔ, wo don-dɛ kolo. A tagama-ko ma gbɛlɛ, ado mɔgɔ siyaman bi tala wo le fɛ. 14Kilɛ min bi tala nimaya tinɛ, wo tagama-koe gbɛlɛ. A dɛ ma kolo, ado mɔgɔ siyaman sa a yenna.
Kɔlɔma anubɛ A Gbɔɛ Wara-Koe
(Luka 6.43-44)
15“Wo ni a ma wo fɛrɛma foninya-nɛbinuna ko la. Anu si a fɔ ko anu bi kumala Alla ye kɔnɔ anu foni. Anu kungban-kungban ye nala wo wara iko sagɛnu kɔnɔ anu sɔn mani de iko suluku-kɔnkɔtoe. 16Wo si anu lɔn anuna kɛwɔlɛnu fɛ. Mɔgɔ ti kɔn-gbɔɛ keri wɔnɔ-firɛ rɔ. Toro-gbɔɛ fanan ti keri tiri-wɔnɛ rɔ. 17Kɔlɔma min sabatira, wo le si gbɔ wɛ-kɛ. Kɔlɔma min ma sabati, wo gbɔɛ ti mɔgɛ munanfaga. 18Kɔlɔma min sabatira, wola gbɔɛ si mɔgɛ munanfaga. Kɔlɔma min ma sabati, wo le ti gbɔ wɛ-kɛ. 19#Matiyu 3.10; Luka 3.9 Kɔlɔma minna gbɔɛ ti mɔgɛ munanfaga, wo kuri si tɛgɛ ka a lakɛ tɛ rɔ. 20#Matiyu 12.33 Nba, wo si foninya-nɛbinu lɔn anu gbɔɛ fɛ wo nya na le.
Yisa Ban-Koe Mɔgɔ-Yogomɛnu Na
(Luka 13.25-27)
21“Min bɛɛ ye a fɔla ko ata Mari le nde la, wo bɛɛ ti don Allala mansayɛ rɔ fɔ minnu bi n Fa diyana-koenu kɛla, n Fa min bi Arinyɛni tɔ, kɔni. 22Tele-laban-lunyɛ, mɔgɔ siyaman si a fɔ ko ata Mari le nde la ko a ya wɔlɔyiya-kumɛnu fɔ n tɔgɛ rɔ. A si a fɔ fanan ko a ya nyina siyaman gben n tɔgɛ rɔ ka kabana-ko siyaman kɛ n tɔgɛ rɔ! 23#Yaburi 6.8 Nba, n si a fɔ wonu ye worɔ ko, ‘N ma wo lɔn mumɛ! Wo bɔ n fɛ, wole ko-yogoma-kɛlɛnu!’
Bon-Sɔla Filɛ Wara-Koe
(Luka 6.47-49)
24“Nba, mɔgɛ min bɛɛ ye nna kumɛ kɛ lamɔɛnna ka a bira, wo si ma iko kei-hɛnkilimɛ min ya ala bɔn sɔ fara-kole kuma. 25Banda-wɛ nara. Bɛnu fara. Fɔnyɔ tugura ala bɔn wo ma. Kɔnɔ bɔn wo ma bui bawo a sɔnɛ fara-kole kuma. 26Min bɛɛ ye nna kumɛ kɛ lamɔɛnna kɔnɔ anu sa a birala, wo si ma iko kei kun-takolɔn min ya ala bɔn sɔ kɛnkɛn ma. 27Banda-wɛ nara. Bɛnu fara. Fɔnyɔ tugura ala bɔn wo ma! Ala bɔn buira fugbu! A rakerikerita iko kolo lamurunɛ!”
Karan Kɛ-Koe Sɛnbɛ rɔ Yisa Bolo
28Yisa banta koe wonu fɔla tumɛ min, nyama kawara ala karan wo ma. 29#Maraka 1.22; Luka 4.32 Anu ko ale sa iko anuna tɔn-karan-mɔgɛnu bawo fanka ye ala karan la.
Kuranko Common Language Bible © The Bible Society in Sierra Leone, 2006.