Matiyu 18
18
Yon Kolo Bɛɛ Ko?
(Maraka 9.33-37; Luka 9.46-48)
1 #
Luka 22.24
A ma mɛ ba kɛ, Yisala karan-dannu nara a wara ka a manyinika ko, “Alla min bi Arinyɛni tɔ, yon kolo bɛɛ ko ata mansayɛ rɔ?”
2Yisa ya denni-mɛsɛ do kele ka wo sɔ anu tɛma. 3#Maraka 10.15; Luka 18.17 A ko, “Wo ni wo hɛnkili to kɛ ko! Ni wo ma wo nyɛrɛ kɛ-nya yɛlɛma ka ma iko dennɛnu, wo ti don Allata mansayɛ kɔrɔ min bi Arinyɛni na muk! 4Min famayiginɛ ka ma iko dennɛ kɛ, wo le kolo bɛɛ ko Allala mansayɛ rɔ, 5ado mɔgɛ min ba den sifa kɛ rabira n tɔgɔ rɔ, wo ara nde rabira.
Mɔgɔ Lasamalɛnuna Koe
(Maraka 9.42-48; Luka 17.1-2)
6“Dennɛ kɛ minnu dɛnkɛninyanɛ n ma, ni mɔgɔ-wo-mɔgɔ ya a ma, wo ni don hakɛ rɔ ha a ni bɔ n fɛ, a fisa wo mɔgɛ ye, kuru-belebele-wɛ ni kiri a kan la ka a lakɛ kɔgɔ-yi-dumɛ rɔ. 7Gbalo ye duninya ye bawo fan donu bi a rɔ minnu bi mɔgɛnu nasamala! Ko sifa wonu bi kɛla tuma-wo-tuma kɔnɔ minnu bi wo mala, gbalo-belebele ye wonu kuma!
8 #
Matiyu 5.30
“Ni i bole, ni wo ma, i kian ya a ma, i ni hakɛ kɛ, a tɛgɛ a la ka a lakɛ a rɔ! A fisa, ni i bɔnɔta i bolo kelan, ni wo ma, i kin kelan rɔ ka ta nimayɛ rɔ wo nya, yanni i fɛrɛ bɛɛ la ni don habadan-tɛ rɔ. 9#Matiyu 5.29 Nba, ni i yɛ ya a ma, i ni hakɛ kɛ, a bɔ a rɔ ka a lakɛ a rɔ! A fisa, ni i bɔnɔta i ya-kelan rɔ ka ta nimayɛ rɔ wo nya, yanni i fɛrɛ bɛɛ la ni don habadan-tɛ rɔ.
Sagɛ min Tara A Kun fɛ, Wo Wara-Koe
(Luka 15.3-7)
10“Wo ni a ma wo fɛrɛma, wo kana dennɛ kɛ kelen bɛrɛn nafɛya. N bi a fɔla wo ye ko anuna kandan-melikanu bi Arinyɛni tɔ. Anu bi n Fa Alla da kɔrɔ Arinyɛni tɔ wati bɛɛ. [ 11#Luka 19.10 Minnu bara anu bɔ Allata kilɛ fɛ, nde, Hadama-dan nara wonu denuna ko la.]
12“Wo miriya ye kama? Saga kɛmɛ ye mɔgɛ min bolo, ni wo kelen tora-a-rɔ, wo tigi si nfen ma? A si saga bi-kɔnɔntɔ anubɛ kɔnɔntɛ to anu de-nyinina kɔnkɛ kuma ka ta saga kelan wo nyini tinɛ. 13Wo ni wo hɛnkili to kɛ ko! A wa wo yen, a si sewa saga kelan wola ko la ka tenbi saga bi-kɔnɔntɔ anubɛ kɔnɔntɛ la minnu bi a bolo. 14A ye wo nya le wo Fa Alla wara la min bi Arinyɛni tɔ. A ma di wo ye dennɛ kɛ kelen bɛrɛn ni to-a-rɔ.
I Ta-Nyɔgɛ Dɛnkɛninya-Mɔgɛ Wa Ko-Yogoma Kɛ I La
15 #
Luka 17.3
“I ta-nyɔgɛ dɛnkɛninya-mɔgɛ wa ko-yogomɛ ma i la, ta a fɔ a ye. Kɔnɔ i ni a kɛ dogɔn rɔ, wo filɛ tɛma. Ni a ya a sɔn-a-la ko a ara ko-yogomɛ ma i la ka i madiya, a ara ma i na-kelen-nyɔgɛ la tun. 16#Tɔn-Fɔɛ-Fila-Nyɔgɛ 19.15 Kɔnɔ ni a ma sɔn i bolo, i ni ta mɔgɔ kelen, ni wo ma, mɔgɔ fila gbɛrɛ la i bolo a wara bawo a sɛbɛnɛ Allata kitabu rɔ ko sereyɛ mɔgɔ kelen ti mɔgɔ yiliki fɔ fila, ni wo ma, sawa. 17Kɔnɔ ni a ma sɔn wonu fanan bolo, i ni koe wo bɛɛ rakaran wo ta-nyɔgɛ dɛnkɛninya-mɔgɛnu ye. Nba, ni a ma sɔn wonu fanan bolo, i ni a bira iko sibolo-gbɛrɛ, ni wo ma, duti-makelelɛ.
Sɔn-Koe Wo, Ban-Koe Wo
18 #
Matiyu 16.19; Yɔni 20.23 “Wo ni wo hɛnkili to kɛ ko! Wo ma sɔn fenfen ma duninya kɛ rɔ, Alla fanan ti sɔn wo ma Arinyɛni tɔ. Wo wa sɔn fenfen ma duninya kɛ rɔ, Alla fanan si sɔn wo ma Arinyɛni tɔ.
19“N ni a fɔ wo ye tun. Mɔgɔ fila wa sɔn ko-wo-ko ma duninya kɛ rɔ fenfenna ko la madiyalɛ rɔ, n Fa Alla min bi Arinyɛni tɔ, wo si a kɛ wo ye, 20ado mɔgɔ fila, ni wo ma, mɔgɔ sawa wa bɛn n tɔgɔ rɔ, n bi anu tɛma nyɔ.”
Wɔli-Kɛlɛ min Ti A Ta-Nyɔgɛ Makoto
21 #
Luka 17.3-4
Wo kɔma, Pita nara Yisa wara ka a manyinika koe do ma. A ko, “Mari, ni n na-kelen-nyɔgɛ tora hakɛ kɛla n na, n ni a makoto iko yili? Kinyama wɔrɔnfila, wa?”
22 #
Ko-Dabirɛnu 4.24
Yisa ya a yabi ko, “Ade, kinyama wɔrɔnfila ma de, fɔ kinyama bi-wɔrɔnfila sigi tinɛ wɔrɔnfila (490).#18.22 Wɔrɔnfila: Kitabu donu ko bi-wɔrɔnfila ani wɔrɔnfila (77). Wo kɔrɛ le ko i ni to a makotola feu! 23Alla min bi Arinyɛni tɔ, ata mansayɛ mani de iko mansɛ min ya a latɛgɛ ko ala yili minnu bi ala wɔli-kɛlɛnu na, a ni wonu dan. 24A ya wo dabira nya min wo, anu nara kelen na, ala wodi wulu siyaman yili ye min na. 25Min bi a bolo, a ma yili-sarɛ bɔ min kɛ, mansɛ ko ale wo, ala musi wo, ala dannu wo, anu ni anu mayira iko yɔɔnnu ka a bolo-fan bɛɛ mayira alako ala yili si sara nya min. 26Wɔli-kɛlɛ wo ya a sa mansɛ kɔrɔ. A ya a madiya ko, ‘I mun fɔlɔ, n si ila yili bɛɛ sara!’ 27Mansɛ kinikinita a ma. A ya a makoto yili wola ko la ka a boloka.
28“Mansɛ wo ya min makoto, wo tara ka a wɔli-kɛ-nyɔgɛ taran ala yili-nɛ ye min na. A ya wo bira a kan ma. A ko, ‘Nna yili sara!’ 29A wɔli-kɛ-nyɔgɛ wo sara a kɔrɔ ka a madiya ko, ‘I mun fɔlɔ, n si ila yili sara!’ 30Kɔnɔ a ma sɔn. A ya wo sa yele la ala yili-sarɛla ko la. 31A wɔli-kɛ-nyɔgɛ donu ya wo yen tumɛ min, wo ya anu yisi tɔrɔ bɛrɛkɛ! Anu tara mansɛ wara ka wo bɛɛ rakaran a ye. 32Woletɔ mansɛ fanan ya wɔli-kɛlɛ wo kele. A ko, ‘Ile, yɔɔn-fufafuyi! Nna yili min bɛɛ ye ile la nun, n bara i makoto wo bɛɛla ko la bawo i ya n madiya. 33A bɛnnɛ, i ni kinikini i wɔli-kɛ-nyɔgɛ fanan ma iko n kinikinita i ma nya min.’ 34Mansɛ diminyara kati! A ya wɔli-kɛlɛ wo sa yele la ka a tɔrɔ ala yili bɛɛla ko la.”
35Nba, Yisa ko, “Ni wo kelen-kelennamɛ-bɛɛ ma wo na-kelen-nyɔgɛ makoto wo yisi bɛɛ la, n Fa Alla min bi Arinyɛni tɔ, wo fanan si wo bira wo nya le.”
Kuranko Common Language Bible © The Bible Society in Sierra Leone, 2006.