Matiyu 19
19
Furu-Tinya Karan Yisa Bolo
(Maraka 10.1-12; Luka 16.18)
1Yisa banta kumɛ wo fɔla tumɛ min, a bɔra Kalili sigisɔn rɔ ka ta Yudiya nyamanɛ rɔ Yorodan bɛ kɔgɔma. 2Nyama-ba bilara a fɛ. A ya wonu nakɛndɛya nyɔ.
3Farisi donu nara a wara a kɔrɔbɔ tinɛ. Anu ya a manyinika ko, “Mala tɔn si sɔn ko a wa diya kei ye wati-wo-wati, a ni a ban ala musi la, wa?”
4 #
Ko-Dabirɛnu 1.27; 5.2 Yisa ya anu yabi ko, “A sɛbɛnɛ Allata kitabu rɔ ko kebi duninya dabirɛ, Alla ya kei anubɛ musi dan. Wo ma wo karan bɛ, wa? 5#Ko-Dabirɛnu 2.24 Wo le ya a to, kei si a na anubɛ a fa boloka ka tugun ala musi la. Anu filɛ si ma mɔgɔ kelen na iko a sɛbɛnɛ nya min. 6Mɔgɔ fila ma anu na tun fɔ mɔgɔ kelen. Nba, Alla ara min tugun anu nyɔgɛ na, mɔgɔ kana wonu fara.”
7 #
Tɔn-Fɔɛ-Fila-Nyɔgɛ 24.1-4; Matiyu 5.31 Farisinu ya a manyinika ko, “Nfenna worɔ, Nɛbi Musa ya tɔn di ma ma ko yanni kei ni ala musi boloka, a ni furu-tinya-kɛdi di a ma?”
8Yisa ya anu yabi ko, “Nɛbi Musa sɔnta wola musu-boloka-koe ma wo nya bawo wo karan-koe gbɛlɛ. Kɔnɔ a sa wo nya nun duninya-dan-wati. 9#Matiyu 5.32; 1 Kɔrɛnti 7.10-11 Nba, n ni kɛ fɔ wo ye. Ni kei ya ala musi boloka, ni a ma tɛgɛ yɛlɛnyɛ#19.9 Yɛlɛnyɛ: Matiyu miriyɛ ye musu-mabiranɛ le ma yan. Kɛ sɛbɛni ma Maraka anubɛ Luka kibarɛnu tɔ. Ni furi ara ban kirila gbɛ, a ti ke a bolokala tun. ma, a ni ta musu-gbɛrɛ furu, a ara yɛlɛnyɛ kɛ worɔ.”
10Ala karan-dannu ya a fɔ a ye ko, “Ni wo dɔrɔn si a ma, kei ni ala musi boloka, a fisa, furi kana kiri worɔ.”
11Yisa ya a fɔ anu ye ko, “Ka a fɔ kei ni a to, a ma nyaganɛ furu, mɔgɛ bɛɛ ti karan kɛ nɔ, fɔ Alla ara a di minnu ma, 12ado kei ti musi furu minna ko la, wo kɔrɛnu siya. Donu ti ke musi furula ka bɛn anu sɔrɔn-nya ma. Donu ti ke furi kɛla bawo anu hadama-den-nyɔgɛ ya wo kɛ anu na. Nba, donu ti musi furu ka a tɛgɛ Allata mansayɛ ma. Ni min si ke karan kɛ birala, a ni a bira worɔ.”
Duwa-Koe Dennɛnu ye Yisa Bolo
(Maraka 10.13-16; Luka 18.15-17)
13Mɔgɛ donu nara anuna dennɛnu na Yisa wara ko a ni a bole sa anu kuma ka Alla matara anu ye. Kɔnɔ ala karan-dannu ya mɔgɛ wonu makuma. 14Yisa ko, “Wo ni sɔn dennɛnu ni na n bara. Wo kana anu mabeli bawo anu denu denuta ye Allala mansayɛ la Arinyɛni tɔ.”
15Yisa ya a bole sa anu kuma. Wo kɔma, a bɔra nyɔ.
Fonike Bana Wara-Koe
(Maraka 10.17-31; Luka 18.18-30)
16Wati do, kei do nara Yisa manyinika tinɛ. A ko, “Karan-mɔgɔ, n si ko-nyimɛ nyamintan kɛ alako n ni habadan-nimayɛ sɔrɔn?”
17Yisa ya a yabi ko, “Nfenna i ye n manyinikala ko-nyimɛ wara-koe la? Alla kelen pe si ko-nyimɛ kɛ. Ni i ye a fɛ ka habadan-nimayɛ sɔrɔn, i ni to tɔnnu birala.”
18 #
Bɔ-Koe-Iyipiti 20.13-16; Tɔn-Fɔɛ-Fila-Nyɔgɛ 5.17-20 Kei wo ya nyinikalɛ kɛ fanan ko, “Tɔn nyamintan?”
Yisa ya a yabi ko, “I kana mɔgɔ faga. I kana yɛlɛnyɛ kɛ. I kana kankanyɛ kɛ. I kana foninya-sereyɛ bɔ. 19#Bɔ-Koe-Iyipiti 20.12; Tɔn-Fɔɛ-Fila-Nyɔgɛ 5.16; Saraka-Masɔlɛnuta Tɔnnu 19.18 I ni i na anubɛ i fa gbiliya. I ni i sigi-nyɔgɛ keni iko i nyɛrɛ.”
20Keminɛ wo ko, “N bara tɔn wo bɛɛ bira. A tonɛ nfen ma tun?”
21Yisa ya a fɔ a ye ko, “Ni i ye a fɛ, i ni kanbali, ta i bolo-fan bɛɛ feri ka wodi wo di bolo-kolɔnnu ma. I si nɔnfuli sɔrɔn Arinyɛni tɔ. Wo kɔma, i ni na bila n fɛ.”
22Keminɛ ya wo lamɔɛn tumɛ min, a yisi-magboyanɛ tara bawo bana le nun.
23Wo kɔma, Yisa ya a fɔ ala karan-dannu ye ko, “Wo ni wo hɛnkili to kɛ ko! Nɔnfulu-tigi don-koe Allata mansayɛ rɔ Arinyɛni tɔ, wo gbɛlɛ de, 24ado nɔnfulu-tigi don-koe Allala mansayɛ rɔ, wo gbɛlɛ ka tenbi nyomɛ don-koe la sɛgilan-woe rɔ.”
25Ala karan-dannu ya wo lamɔɛn tumɛ min, anu kawara kati! Anu ya nyinikalɛ kɛ ko, “Yon si kisi worɔ?”
26Yisa tora anu mafɛlɛnna sin! A ya anu yabi ko, “Mɔgɛ ti ke wo mala kɔnɔ Alla si ke koe bɛɛ mala.”
27Wo kɔma, Pita kumara. A ko, “I yɛ lana. Male ara fan bɛɛ to alako ma si bila i fɛ nya min. Male ye nfen sɔrɔnna worɔ?”
28 #
Matiyu 25.31; Luka 22.30 Yisa ya a fɔ anu ye ko, “Wo ni wo hɛnkili to kɛ ko! Dali-kurɛ wa ke tumɛ min, nde, Hadama-dan wa sigi nta mansaya-waganɛ gbiliyanɛ rɔ, wo tan-ni-filɛ bɛɛ si wo sigi mansaya-sigi-fannu tɔ ka Isirɛla bɔnsɔn tan-ni-filɛ kiti tɛgɛ, 29ado min bɛɛ ara ala bɔn to, anubɛ a na-kelen-nyɔgɛnu, anubɛ a sɔrɔnnɛnu, anubɛ ala dannu, hali ata sɛnɛ-kɛ-tinɛ ndela ko la, wo si wo nyɔgɔn kɛmɛ sɔrɔn anubɛ habadan-nimayɛ fanan. 30#Matiyu 20.16; Luka 13.30 Kɔnɔ minnu bi a fɔlɔtɛ la, wonu si ma a laban la. Minnu bi a laban la, wonu si ma a fɔlɔtɛ la wulɔn.”
Kuranko Common Language Bible © The Bible Society in Sierra Leone, 2006.