Luka 6:27-49

“Wole minnu bi n kan lamɔɛnna, n bi a fɔla wo ye ko wo ni wo yogenu keni. Minnu bara wo kɔn, wo ni ko-nyimɛ kɛ wonu ye. Minnu bi wo dankala, wo ni duwa wonu ye. Minnu sa wo birala a kin na, wo ni Alla madiya wonu ye. Minnu ba wo dɛ fan kelan ratii, a ni doi fanan tintan a la, a ni wo bɛrɛn tatii. Ni mɔgɔ ya wola duruki bi wo bolo fɔrɔsɛ la, wo ni wola duruku-kɔrɔ-don fanan don a bolo. Minnu ba wo tara fen ma, wo ni anu kɔ. Ni mɔgɛ ya wo bolo-fan bɔ wo bolo, wo kana a manyinika ala ko la tun. Wo ye a fɛ, donu ni min ma wo ye, wole fanan ni wo ma anu ye. “Ni wo ya wo diyana-mɔgɛ dɔrɔn keni, wo si duwɛ nyamintan sɔrɔn worɔ? Hali hakɛ-tiginu, minnu fɔlɔn ya anu keni, anu denu fanan si wonu keni! Minnu bara ko-nyimɛ kɛ wo ye, ni wo ya ko-nyimɛ kɛ wonu dɔrɔn ye, wo si duwɛ nyamintan sɔrɔn worɔ? Hali hakɛ-tiginu fanan si wo ma! Wo hɛnkili ye fen-sɔrɔn-koe ma minnu bolo, ni wo ya wonu dɔrɔn dɔndɔ, wo si duwɛ nyamintan sɔrɔn worɔ? Hali hakɛ-tiginu si anu ta-nyɔgɔ-hakɛ-tiginu dɔndɔ bawo anu yili ye a ma ko anu si wo nyɔgɔn-takɛn sɔrɔn tun! Wo ni wo yogenu keni ka ko-nyimɛ kɛ anu ye. Wo ni anu dɔndɔ, hali wo ma wo hɛnkili lamiri fen-sɔrɔn-koe ma anu bolo tun. Wo si barayi-ba sɔrɔn. Alla min bi Fan Bɛɛ Kun na, wo si ma ale Allata dannu na, ado Alla ye ko-nyimɛ kɛla fisiriwɔlɛnu anubɛ wunduyogenu ye. Wo ni kinikini mɔgɛnu ma iko wo Fa Alla kinikininɛ wole ma nya min. “Wo kana mɔgɛnu kiti, woletɔ Alla ti wo fanan kiti. Wo kana mɔgɛnu yiliki, woletɔ Alla ti wo fanan yiliki. Wo ni mɔgɛnu makoto, woletɔ Alla si wo fanan makoto. Wo ni mɔgɛnu kɔ, woletɔ Alla si wo kɔ, ado a si a suma wo ye a kin na! A la si fa pen ka a madɛndɛn ka a don wo bolo. Wo ye fan sumanna doinu ye nya min, Alla si a suma wo ye wo nya na le.” Yisa ya tili kɛ tɛgɛ anu ye ko, “Fiyɔn ti ke fiyɔn bole birala. Ni a ya wo ma, anu filɛ bɛɛ si bui denkɛ rɔ. Karan-den wo karan-den ma tenbi a karan-mɔgɛ la. Kɔnɔ karan-den wo karan-den wa ban karanna, a si ma iko a karan-mɔgɔ. “Nfenna ko la i si buriburi yen i ta-nyɔgɛ yɛ ma kɔnɔ kon-gbondon min bi i nyɛrɛ yɛ ma, i hɛnkili sa tugula wo la? I si a fɔ i ta-nyɔgɛ ye kama ko, ‘N bɔ, sɔ wa, n ni buriburi bɔ i yɛ ma,’ kɔnɔ i sa kon-gbondon wo yenna min bi i nyɛrɛ yɛ ma? Ile nyɛrɛ-mayiralɛ! Kon-gbondon fɔlɔn bɔ i nyɛrɛ yɛ ma, wo kɔma, buriburi minnu bi i ta-nyɔgɛ yɛ ma, i si ke wo yenna ka wo bɔ nyɔ. “Kɔlɔma min sabatira, wola gbɔɛ si mɔgɛ munanfaga. Kɔlɔma min ma sabati, wo le ti gbɔ-nyimɛ labɔ. Kɔlɔma bɛɛ si lɔn a gbɔɛ le fɛ. Mɔgɔ ti toro-gbɔɛ keri kɔlɔma-kuru-wɔnimɛ la. Mɔgɔ ti mankoro gbɔɛ fanan keri kɔlɔma-kuru-wɔnimɛ la. Mɔgɔ-nyimɛ si ko-nyimɛ labɔ a yisi rɔ. Mɔgɔ-yogomɛ si ko-yogomɛ labɔ a yisi rɔ, ado mɔgɔ yisi fanɛ min na, a dɛ ye wo le fɔla. “Nfenna wo ye a fɔla ko wota Mari le nde la kɔnɔ wo sa nna kumɛ birala? Min bɛɛ si na nde wara nta kumɛ lamɔɛn tinɛ ka a bira, n si na mɔgɛ wola muninyɛ yira wo la. Wo tigi mani de iko mɔgɛ min tenbi bɔn sɔla, a si denkɛ sin ka a layigi pon ha ka ke kuri ma alako bon-kurukɛ ni sigi farɛ kuma. Bɛ wa fa ka wara, a si tugu wo tigila bɔn burɔ kɔnɔ a la ti maga bawo ala bɔn sɔnɛ farɛ le kuma. Kɔnɔ mɔgɛ min bi nna kumɛnu namɔɛnna kɔnɔ a sa anu birala, wo tigi mani de iko mɔgɛ min tenbi bɔn sɔla, a ma a kurukɛ. Yi wa tugu wo tigila bɔn burɔ tumɛ min, a ti mɛ buila ka tinya! A rakerikerinɛ si to feu!”