Saraka-Masɔlɛnuta Tɔnnu 11

Isirɛla Mɔgɛnu Tanɛ ye min Na

(Tɔn-Fɔɛ-Fila-Nyɔgɛ 14.3-21)

1Mari ya tɔn kɛnu di Musa anubɛ Aruna ma 2Isirɛla mɔgɛnuna ko la ko, “Wo si gboloma-soge bɛɛ dɔn 3minnu kin-tore faranɛ fila la anubɛ anu bi anu dɔntɛ nunkula fanan. 4-6Kɔnɔ wo kana nyomɛ dɔn anubɛ kɔnkɔbarɛ anubɛ fasan. Kɛnu ma sɛninya wo ye bawo kɛnu bi dɔn-fan nunkula kɔnɔ anu kin-tore farani ma fila la. 7Wo kana kose anubɛ kungbilan dɔn bawo hali anu kin-torenu faranɛ, anu ti dɔntɛ nunku anu dɛ rɔ. 8Wo kana soge kɛnu dɔn, hali ka i bole tugu anu suyi la. Anu sɛninyani ma wo ye.

9“Yɛgɛ-wo-yɛgɛ min wɔrɛ anubɛ a wɔnɛnu bi a ma, wo ni wonu dɔn. 10-12Fenfen sufa min bi yi rɔ min wɔrɛ anubɛ a yole sa anu ma, wo kana wonu dɔn. Kɛnu sɛninyani ma wo ye. Wo kana wonu dɔn, hali ka wo bole tugu anu suyi la.

13-19“Wo kana kona minnu dɔn, wo le kɛnu na, kokɛ wo, gbingbinnyagan wo, anubɛ bibinu.#11.13 Kona kɛnu: Min ya a to, wonu mara tanɛ la bawo anu si fen-sɛninyabɛlɛ kɛ donu bira ka anu dɔn. Wo kana dogɛ anubɛ mansa-wala-kona dɔn fanan.#11.14 Kona kɛnu: Min ya a to, wonu fanan mara tanɛ la bawo anu si sogo-tulinɛ dɔn. Selekona wo, yi-fɛ-konanu wo, yɛgɛ-faga-kanko wo, yi-fɛ-sisinu wo, morobuwɛ wo, anubɛ tosɛnu, wonu fanan si ma wo tanɛ la.

20-23“Wo kana kɔinkian-wo-kɔinkian dɔn, fɔ kunantɔn-pɔrɛ anubɛ kɛran anubɛ kondɔn. Fen-mɛsɛ tomɛ min si tagama dugi ma anubɛ min si gban anu kanban rɔ, wonu sɛninyani ma wo ye. 24-25Ni min ya a bole tugu kɛ do sufa suyi la wa ka wo do-wo-do yatɔnbɔn, wo tigi ni ala kurɛnu ku kɔnɔ a sɛninyabɛlɛ si to ha wurɛ la iko tɔn ya a fɔ nya min.

26-28“Soge minnu tore latintannɛ anubɛ soge minnu kin-mɛnsannu bi a ma, mɔgɔ-wo-mɔgɔ ya a bole tugu wo do sufa suyi la, wo tigi ni ala kurɛnu ku kɔnɔ a sɛninyabɛlɛ si to ha wurɛ la iko tɔn ya a fɔ nya min.

29-30“Wo kana wo bole tugu tula-wo-tula la hali dugi-kɔrɔ-tulɛnu. Fenfen min manɛ iko basɛ anubɛ dandanma-yirɛ anubɛ nɔnsɛn, hali min kolo iko kana, wo kana wo bole tugu wonu na hali anu suyinu. 31Ni min ya a bole tugu kɛ do la, wo tigi-sɛninyabɛlɛ si to ha wurɛ la.

32“Ni kɛ do suyi buira fenfen kuma, hali sɛbɛna-wɔli si kɛ a la, fan wo sɛninyani ma tun. Ni a mara fenfen na min nadannɛ kɔlɔma la, wo sɛninyani ma. Ni a buira sogo-gbole kuma wo ladannɛ fenfen na, wo fanan sɛninyani ma. Ni a buira gbama-kurɛ kuma, ni wo ma, kura-dogbɛrɛ kuma, wonu fanan sɛninyani ma. Ni a buira fan min kuma, wo si wo bi ka a layigi yi kɔrɔ ka a layɛlɛ. Wo sɛninyabɛlɛ si to ha wurɛ la. 33Ni suyi kɛ do buira bɔnku-dagɛ do rɔ, a ni a taran, fan do ye bɔnku-dagɛ wo rɔ, fan wo sɛninyani ma. Wo kɔma, wo ni bɔnku-dagɛ wo bɛrɛn ratii. 34Ni a ya a taran, yi ye bɔnku-dagɛ kɛ rɔ, ni min ya yi wo bi ka a kɛ dɔnta-wo-dɔnta ma, wo fanan sɛninyabɛlɛ si to. Ni a mara fenfen sufa la min si min, a ni a taran, wo ye dagɛ kɛ rɔ, wo min-kɛ-yi fanan sɛninyani ma. 35Ni fan kɛ do suyi buira biredi mintan tinɛ do kuma, wo si biredi mintan tinɛ wo tinya. 36Ni fan kɛ do suyi buira tenke rɔ, ka, ni a taranta, yi kɛnɛ kuru-tasinnɛ do rɔ, a ni bui wo fanan tɔ, wonu filɛ sɛninyanɛ de! Kɔnɔ kɛ filɛ bɔnɛ a la, ni fan kɛ do suyi buira fenfen do rɔ, wo sɛninyabɛlɛ si to. 37Ni fan kɛ do suyi buira sugu-wo-sugu kuma, wo sɛninyanɛ de! 38Kɔnɔ a ni a taran, sugi wo kɛnɛ yi ma, wo sɛninyani ma worɔ.

39“Ni sogo-sɛninyanɛ do fagara a nyɛrɛ ma, mɔgɔ wa a bole tugu wo la, mɔgɛ wo fanan sɛninyabɛlɛ si to ha wurɛ la. 40Ni mɔgɛ do ya soge wo kan tinɛ do dɔn, a si ala kurɛnu ku kɔnɔ a sɛninyabɛlɛ si to ha wurɛ la. Ni a ya sogo-suyi wo do bi ka ta a la, fɔ a ni ala kurɛnu ku. A sɛninyabɛlɛ si to ha wurɛ la.

41-42“Wo kana fen-makisimiriyanɛ kɛnu dɔn min bi a saganna a bu-gbole ma anubɛ min bi tala anu kin nanɛ la anubɛ min kin-siyaman bi a kɔrɔ. 43Wo kana kɛnu dɔn. Ni wo ya anu do dɔn, wo sɛninyani ma. 44#Saraka-Masɔlɛnuta Tɔnnu 19.2; 1 Pita 1.16 Nde le wota Mari Alla la min bi a fɔla wo ye ko, ‘Wo ni wo nyɛrɛ mara sɛninyɛ rɔ bawo nde sɛnima. 45N ya wo labɔ Iyipiti nyamanɛ rɔ alako n ni ma wota Alla la. Wo ni ma mɔgɔ-sɛnimɛnu na iko nde, Mari.’

46“Sogenu anubɛ konanuna tɔn le kɛnu na. Fenfen sufa min bi yi rɔ anubɛ fenfen sufa min bi dugu-kole kuma, wonuna tɔn le kɛnu na. 47Wo si a ma wo fɛrɛma ka fen-sɛninyanɛ anubɛ fen-sɛninyabɛlɛ dan-nafarɛ lɔn. Wo ni a lɔn wo tanɛ ye soge min na anubɛ wo tana ma minnu na.”

Currently Selected:

Saraka-Masɔlɛnuta Tɔnnu 11: KCLB

Highlight

Copy

Compare