Saraka-Masɔlɛnuta Tɔnnu 10
10
Hakɛ Si Allata Wɔli-Kɛlɛnu Bira Nya Min
1Arunala den-kei filɛ Nedabu anubɛ Abaihu, wonu ya ta-wɔlɔn bi ka a sa anuna ta-kɔ-mirannu tɔ. Anu ya isɛnti-munke bi ka a kɛ ta-wɔlɔn wo kuma miran wonu tɔ. Anu ya wonu bi ka anu di Mari ma kɔnɔ Mari ma sɔn wonu na bawo a ma bɛn, anu ni a ma wo nya na Mari ye. 2Woletɔ Mari ya tɛ layigi anu kuma ka anu mintan gburr! Anu fagara Mari nyɛrɛ yala nyɔ. 3Wo kɔma, Mari ya min fɔ nun, Musa fanan ya Aruna hɛnkili labila wo la ko, “Ni mɔgɔ-wo-mɔgɔ ye wɔlila Alla ye, fɔ wo tigi ni Marita sɛninya-koe mara bawo Mari ya a fɔ ko a si ata fanka yira ata mɔgɛnu na.” Kɔnɔ Aruna ma fenfen fɔ.
4Musa anubɛ Aruna fa-dɔgɔmɛ tɔgɔ le Yusiyɛli. Musa ya a fa-dɔgɔmɛ wola den-keminɛ mɔgɔ filɛ wonu kele anu nyɔgɔn fɛ. Wonu tɔgɔ le kɛ la, Misiyɛli anubɛ Ɛlisafan. Musa ya a fɔ keminɛ mɔgɔ filɛ wonu ye ko, “Wo ta wo na-kelen-nyɔgɛnu suyinu nabɔ Marita Fani-Bɔn la. Wo ni ta anu na dagɛ kɔma.” 5Anu ya anu bi anuna durukinu ma ka anu nabɔ dagɛ kɔma iko Musa ya a fɔ anu ye nya min.
6Musa ya a fɔ Aruna anubɛ ala den-kemini-to filɛ Ɛliyasa anubɛ Itamarayi ye ko, “Wo kana wo kunya-rabɔbɛlɛ to. Wo kana wola durukinu tafara yisi-tinya bolo alako ka a yira mɔgɛnu na ko wo ye dila. Ni mɔgɛnu ya a lɔn ko wo yisi magboyanɛ, wo si faga. Mari si diminya Isirɛla mɔgɛ bɛɛsi ma fanan. Mari nyɛrɛ le ya a ma, tɛ bɔra san ma ka anu faga. Ni di-kɛ-sɔgɛ ye wo ta-nyɔgɛ Isirɛla mɔgɛ toenu na, tana ma wo la. 7Kɔnɔ wole, fɔ ni wo tora Marita Fani-Bon-dɛ la bawo anu bara ban wo dantɛgɛla Mari ma tulu-sɛnimɛ la. Ni wo bɔra nyɔ rɔ, wo si faga.” Anu ya a ma iko Musa ya a fɔ anu ye nya min.
Saraka-Masɔlɛnuta Tɔn Donu Saraka-Sogela Ko La
8Mari ya a fɔ Aruna ye ko, 9“Ile anubɛ ila den-keminɛnu, yanni wo ni ta nta Fani-Bɔn la tumɛ min, wo kana baan min. Fenfen min si mɔgɔ kun tafin, wo kana wonu min. Ni wo ya wo ma, wo si faga. Tɔn le kɛ la ka a fɔlɔ ile Aruna ma ha i kegeyɛnu. Wo kana a tinya. 10Wole fanan ni fen-sɛnimɛ anubɛ fen-sɛninyabɛlɛ dan-natɛgɛ lɔn. Wo si a lɔn ni Allatɛ le min na anubɛ ni mɔgɛnutɛ le min na. 11Fɔ wo ni Isirɛla mɔgɛnu karan tɔn kɛnu damasi la n ya min di i dɔgɛ Musa ma ka a di ile Aruna ma.”
12 #
Saraka-Masɔlɛnuta Tɔnnu 6.14-18
Musa ya a fɔ Aruna anubɛ ala den-keminɛnu Ɛliyasa anubɛ Itamarayi ye ko, “Anu bi nala dɛgɛ min na ka a di Mari ma, wo toe min bi tola, wo ni wo bi ka a ma biredi la kɔnɔ wo kana isiti kɛ a rɔ. Fɔ ni wo ya a dɔn saraka-mintan-tinɛ tɔgɔfɛ bawo a sɛninyanɛ le. 13Wo ni a dɔn kan-tina-sɛnimɛ rɔ bawo wo dɔn-fan le kɛnu na mɔgɛnu ya min di Alla ma kɔnɔ wole halalɛ le. Wo le kɛ la Mari ya min fɔ n ye ka a fɔ wo ye. 14#Saraka-Masɔlɛnuta Tɔnnu 7.30-34 Saraka-soge bolo-nyimama-wore anubɛ a sisi, wonu maserengbanɛ de bawo wonu daganɛ wobɛ ila denbayɛnu ye. Mɔgɛnu ya wonu di Mari ma wole saraka-masɔlɛ denu denuna ko la. Wo si a dɔn kan-tina-sɛnimɛ rɔ. Saraka-dɔntɛ kɛnu bi bɔla yisi-kima-sarakayɛnu tɔ. 15Kɔnɔ wo tenbi a kɛɛn dila Mari ma ka a mintan, wo si na a sisi anubɛ a wore wonu na ka anu dantɛgɛ Mari ma anu nyɔgɔn fɛ. Kɔnɔ a sisi anubɛ a wore wonu si ma wobɛ i kegeyɛnutɛ la habadan iko Mari ya a fɔ nya min.”
Ɛliyasa anubɛ Itamarayita Sama-Koe
16Musa tara baa-saraka-soge manyinika mɔgɛnu na, Isirɛla mɔgɛnu ya min ma anu hakɛ-sarakɛ la, kɔni. A ya a lamɔɛn ko anu bara baa-soge wo mintan, a bɛnta saraka-masɔlɛnu ni min dɔn. Woletɔ Musa diminyara Ɛliyasa anubɛ Itamarayi#10.16-20 Ɛliyasa anubɛ Itamarayita Sama-Koe: Saraka-Masɔlɛnuta-Tɔnnu 6.24-30 anubɛ 10.1-3 mafɛlɛn ka anuna sama koe yen. ma. 17#Saraka-Masɔlɛnuta Tɔnnu 6.24-26 Musa ya anu manyinika ko, “Nfen ya a to, wo ma saraka-soge kɛ dɔn? A bɛnta, wo ni a dɔn kan-tina-sɛnimɛ kɛ rɔ nun. Fen-sɛninyanɛ le kɛ la. Mari ya kɛ di wo ma mɔgɛnuna hakɛ-yamatogon-koe la. 18A yele ma don min kɛ Marita Fani-Bɔn burɔ, wo si a dɔn nun kan-tina-sɛnimɛ do rɔ iko n ya a fɔ wo ye nya min.”
19Aruna ya a fɔ a dɔgɛ Musa ye ko, “Mɔgɛnu nara anuna hakɛ-sarakɛ anubɛ saraka-mintantɛnu na Mari ye bi. Kɔnɔ hali wo, tɔrɔyɛ kɛ nyɔgɔn sufa ya n sɔrɔn. Nna dannu fagara bi. Ni n ya baa-sarakɛ kɛ dɔn nun bi, wo si a ma, Mari ni nyagalen n na, wa?” 20Musa ya Aruna kuman-kan kɛ lamɔɛn nkɛkuna, a yisi-kimara.
Currently Selected:
Saraka-Masɔlɛnuta Tɔnnu 10: KCLB
Highlight
Copy
Compare
Share
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
