Yasowa 9
9
Yasowa Yanfa-Koe Kibiyon Mɔgɛnu Bolo
1-2Mansɛ minnu bi Yorodan tele-yigi wara la anubɛ mansɛ minnu bi kɔnkɔ-nyamanɛ rɔ anubɛ minnu bi kɔgɔ-yi dafɛ ha Lɛbanan dugula wara la, wonu bɔnsɔnnu tɔgɛ le kɛnu na, Hɛtinu, Amoranu, Kenannu, Perasanu, Hefanu, anubɛ Yebusinu. Mansɛ wonu ya a lamɔɛn tumɛ min ko Isirɛla mɔgɛnu bara nɔlɛ sɔrɔn, anu ya anu nyɔgɔn nadɛn ka anu miri anu si Yasowa anubɛ ala mɔgɛnu kɛlɛ nya min.
3Kɔnɔ Hefa do minnu bi Kibiyon soe burɔ, wonu ya a lamɔɛn min bara ma Yɛrikɔ anubɛ Eyai soenu na Yasowa bolo tumɛ min, 4anu ya yanfɛ rabɛn. Anu tara ka dɔn-fan donu tabɛn ka wo sa sofɛlɛ kuma anubɛ bɔrɔ-kɔrɛnu anubɛ gbolo-bɔrɔ-kɔrɛ minnu mabɛtɛrɛnɛ. 5Anu ya duruku-kore don anu kan na anubɛ sanbara-bɛtɛrɛnɛnu. Anu ya biredi-findikinɛnu fanan bi. 6Anu tara Isirɛla dagɛ rɔ Kiligali ka a fɔ Yasowa ye ko, “Ma bɔra nyamanɛ min tɔ, wo fɛ-yan alako wo ni lanyiri kiri ma ye ka a fɔ ko wo ti ma kɛlɛ.”
7 #
Bɔ-Koe-Iyipiti 23.32; 34.12; Tɔn-Fɔɛ-Fila-Nyɔgɛ 7.2 Kɔnɔ Isirɛla mɔgɛnu ya a fɔ anu ye ko, “Ma ye lanyiri kirila wo ye nfenna? Tumado, wole siginɛ ma da kɔrɔ, woletɔ ma ti lanyiri kiri wo ye.”
8Anu ya a fɔ Yasowa ye ko, “Ma ye ile bolo.”
Yasowa ya anu manyinika ko, “Yon bi wole la? Wo bɔra mintɔ?”
9Anu ya a yabi ko, “Male bɔra nyamani-fɛ-yanyanɛ rɔ bawo ma ya a lamɔɛn wota Mari Alla ara min ma Iyipiti nyamanɛ rɔ. 10#Yilan-Yilan Koe 21.21-35 Ma ya a lamɔɛn fanan a ya min ma Amora mansa mɔgɔ filɛ la Yorodan tele-bɔɛ wara la, Mansa Saihɔn min bi Hɛsibɔn soe burɔ anubɛ Mansa Ɔku min bi Asitɔra soe burɔ Basan nyamanɛ rɔ. 11Mala mɔgɔ-banu anubɛ mɔgɛ min bɛɛ ye nyamanɛ wo rɔ, wonu ya a fɔ ma ye ko ma ni dɔn-fan donu tabɛn mala tagamala ko la ka na wo taran. Anu ya a fɔ ma ye ko ma ni na ka lanyiri kiri ma tɛma alako mala nyamanita-mɔgɛnu ni ma wota wɔli-kɛlɛnu na. 12Kɔnɔ kaka, mala biredi mafɛlɛn. Ma bɔra ma warɛ tumɛ min, a ladan-san le nun kɔnɔ kaka, a bɛɛsi ara findiki. 13Ma ya gbolo-bɔrɛ kɛnu nafa yi la tumɛ min, anu kurɛ le nun kɔnɔ kaka, anu mafɛlɛn, bɔrɛ bɛɛsi ara tinya. Mala kurɛnu anubɛ mala sanbarɛ bɛɛsi ara tinya tagama kɛ rɔ.”
14-15Yasowa anubɛ Isirɛla mɔgɔ-banu ya anuna dɔn-fan donu mafɛlɛn. Anu lara Kibiyon kɛnu na kɔnɔ anu ma Mari manyinika. Anu ya lanyiri kiri anu ye ka anu keli ko anu ti anuna nyamanɛ kɛlɛ mumɛ!
16Tele sawa wo kɔma, Isirɛla mɔgɛnu ya a lamɔɛn ko anuna dagɛ fɛ-ma-yan bɛrɛkɛ Kibiyon soenu na, 17anu wulita tele wo rɔ ka ta mɔgɛ wonuna soenu tɔ. Soe wonu tɔgɛ le kɛnu na, Kibiyon, Kɛfira, Birɔti, anubɛ Kiriyati-Yirɔm. 18Kɔnɔ Isirɛla mɔgɛnu ma anu faga bawo Isirɛla mɔgɔ-banu ya lanyiri kiri Isirɛlata Mari Alla tɔgɛ rɔ. Mɔgɛ bɛɛ donta gbunya-kuma-fɔɛnu tɔ mɔgɔ-banu ma kɛla ko la. 19Kɔnɔ mɔgɔ-banu ya anu yabi ko, “Ma ya lanyiri min kiri Isirɛlata Mari Alla tɔgɛ rɔ, ma ti wo tinya tun, hali ka ko-yoge ma anu na. 20Ma si min ma, wo le kɛ la. Ma si anu kɛndɛ to iko ma ya lanyiri kiri nya min. Ni ma ya anu tinya, Mari si ma tɔrɔya. 21Ma kana anu faga fɔ ka anu ma sɔgɔ-nyininɛnu anubɛ yi-madununɛnu na ma ye.” Mɔgɔ-banu ya wo le tabɛn.
22Yasowa ya Kibiyon mɔgɛ wonu kele ka anu manyinika ko, “Nfenna wo ya ma yanfa ka a fɔ ko wo bɔra wula-yan la kɔnɔ wo fɛ-ma-yan ma la? 23Alla ara wo danka bawo wo ya foninyɛ kɛ fɔ. Ka a dabira kaka, wo si ma wɔli-kɛlɛnu na Allala saraka-bɔ-tinɛ ka sɔgɔ nyini anubɛ ka yi maduni Marila bɔn la.”
24Kibiyon mɔgɛnu ya Yasowa yabi ko, “Ma ya wo yanfa bawo ma kilannɛ ma niyi kuma. Ma ya a lɔn ko Mari Alla ara Nɛbi Musa lawuli nun ka nyamanɛ kɛ bɛɛ di ile ma ka a mɔgɛ bɛɛsi faga wo yarɔ. Woletɔ ma ya kɛ bɛɛsi ma. 25Kaka, ma ye wo bolo. Koe min kin wole yala, wo ni wo ma ma la.”
26Yasowa ya anu kandan alako Isirɛla mɔgɛnu kana anu faga. 27Kɔnɔ wo wati rɔ, a ya anu ma wɔli-kɛlɛnu na. Anu mara sɔgɔ-nyininɛnu anubɛ yi-bilɛnu na. Mari ya saraka-mintan-tinɛ min yabɔ a bato-koe la Isirɛla mɔgɛnu ye, anu bi wɔlɛ wo le kun na bɔn la nyɔ ha bi.#9.27 Ha bi: Kɛ sɛbɛra Hiburu-kan rɔ tumɛ min, a ye wo nya kɔnɔ bi, ma ma a lɔn.
Kuranko Common Language Bible © The Bible Society in Sierra Leone, 2006.